Ads by Google Ads by Google

Onosa’i I Mea Tiga

Vaega: 116

 

Alo maia, o le a toe fa’aauau atu la tatou tala, ae ia manuia lou alo atu i faiva ma tiute o lenei aso. Ua fa’asolosolo pea aso o le olaga, ae fai mai, o le tulaga o lo’o i ai nei Roger i Amerika, e le mafai ona mavae pe galo i le tamaloa i a Filipina. Fai mai, o aso uma, e faitau lava e Roger aso, ma tausaga ua matua ai loa atali’i po’o sona afafine fo’i i a Filipina.

 

E le gata i lea, ae ua faitau fo’i e Roger tausaga ua o’o i ai le soifuaga o Filipina. O le mea ua tupu, ua le mafai ona toe fo’i mai le tamaloa mai Amerika ona ua taofiofi e lona to’alua, a’o le mea e leaga ai, ua fa’aaoga e le fafine Palagi tamaiti e taofiofi ai Roger.

 

Fai mai, o se avega mamafa na tau ave e Roger mo tausaga e tele, o lea ua ma’ea lana tausiga i lona to’alua ma lana fanau teine, aua ua matutua teine, ma ua fai fo’i o la ta’ito’alua. Na gaioi loa le tamaloa, e fai pepa e tete’a ai ma le fafine palagi lea, ae toe fo’i mai i Samoa e asi ma va’ai Filipina.

 

O a lava le tele o mafatiaga na o’o i ai le tamaloa, e le mafai ona galo le la mafutaga ma Filipina. Atonu, o le mafua’aga fo’i lea na malosi ai le le loto o Filipina, ona o lo’o tumau pea i lona mafaufau, e i ai se aso e toe va’ai ai i si ona to’alua o Roger.

 

Ua tapena nei e le tamaloa ana fuafuaga uma, ma fai mai, o le aso lava na saini ai e le fafine pepa e tete’a ai ma Roger, o le taimi fo’i, lea ua sauna ai le tamaloa e toe fo’i mai lava se i va’ai Filipina, ae maise ai o lona fia iloa po’o a mai, ma lona fia va’ai i si ona atai’i, ia po’o sona afafine fo’i. Manatua fo’i, e alu ‘ese atu Roger, po’o Lota e pei ona fa’aigoa ai e le lo’omatua o Malia, e le i fanau Filipina, o lea la e tau matemate e le tamaloa po’o se teine, po’o se tama.

 

A’o nofo pea le tamaloa o Roger i Amerika, fai mai, sa avea pea o se kapeteni i va’alele tetele o lo’o femalaga’ai solo i totonu o Amerika, ma ua mautu fo’i ana mea uma lava. O le manatu sa i le tamaloa, afai e toe fo’i mai i Samoa, o le a sau e avatu Filipina ma lana tama i Ameirka latou te nonofo ai.

 

Ua sauna nei ma tapenapena le malaga a Roger e toe fo’i mai ai i Samoa, fai mai, ua lagona le fiafia o le tamaloa, a’o le taimi lea, ua limasefulu lua, ona tausaga. Ae i le va’ai a tagata i le ali’i kapeteni, o se tagata e toa lona loto, o se tagata fo’i e fuafua lelei le faiga o mea uma, e le ave’esea lava le lalelei o le tamaloa, lea e so’o i ai lona atali’i, o Ali’ioaiga.

 

Manatua fo’i, e alu ‘ese atu Roger, ua mautu le fale e nonofo ai Filipina ma lana tama, o mea lava na saunia e le tamaloa ina ne i tutupu mai nisi mea i luma atu, ae ua mautu Filipina i Samoa nei. Fai mai, o se aso fiafia i le tamaloa, ina ua o’o i le aso e fo’i mai ai i Samoa. O a lava mea uma sa feagai ma ia, a’o mafuta ma le fafine palagi, e pei e fofo’e ‘ese atu mai ia te ia. A’o le fesili ua tula’i mai nei i le mafaufau o Roger, pe o le mea ua toe fai se isi to’alua o Filipina, ae po’o tumau pea le alofa o Filipina ia te ia.

 

E faia pea...