Ads by Google Ads by Google

Onosa’i I Mea Tiga

Vaega: 115

 

Ia manuia lou alo atu i faiva ma tiute i lenei aso, ae o le a toe fa’aauau atu la tatou tala. Na muta mai la tatou tala ina ua sauni nei le malaga a le tama o Ali’ioaiga. Fai mai, ina ua lele ‘ese le va’alele lea ua malaga ai nei Ali’ioaiga ma nisi o tama ua ma’ea ona fa’atauto i le Malo.

 

Fai mai, ua pei o timuga ua maligi ifo mai le lagi loimata o Filipina, ae o le taimi atoa na fa’atalitali ai, ae maise fo’i o le taimi na fa’amavae ai, e leai ma se va’ai atu o se isi o lona aiga o tagi. Ae fai mai na ona masi’i lava i luga o le va’alele, fa’alogo ma lona tuagane ma lona uso, ua fa’ataitai o Filipina.

 

Na a’apa ane nei i ai Lilo i lona alofa i si ona tuafafine, ona e to’atasi lava si ana tama ma fusi atu, “Filipina, na ou fa’apea o oe e tele lou loto, ua uma atu le tele o mea tiga sa feagai ma oe, ae maise lava o le alu ‘ese atu o lou to’alua a lea o lo’o e maua pea le loto tele, ‘aua e te tagi fa’apena, ae toaga e tatalo mo si au tama.”

 

Ua atili ona fa’ataitaio le lo’omatua o Filipina i lea taimi, ma tilotilo atu i le alu ‘ese o le va’alele. E moni lava le upu, o au o matua fanau, ae maise ai o le tulaga o lo’o i ai Filipina, e to’atasi lava si ana tama, o le mea fo’i lea e auau ai lava lona loto i lana tama. Fai mai, e le o’o i ai le lima o Filipina, ae e fasi e Filipina i upu ma tala.

 

Ae fai mai, o upu e tautala ai Filipina i lana tama, o upu lava ia e teu loto e Ali’ioaiga, ia usita’i, ia toaga i le a’oga, ma ia toaga e tatalo. O le ala fo’i lea ua fa’amanuiaina ai taumafai a Ali’ioaiga, ona o le fa’aaoga lelei o fautuaga a si ona tina.

 

Ua alu aso, sau fo’i aso, o le olaga, fai mai ina ua taunu’u le malaga a Ali’ioaiga i Amerika, ua amata loa ana toleniga fa’atasi ma isi tama na o latou o fa’atasi. O le tele o taimi e maua ai avanoa, e vala’au mai lava e asi mai si ona tina ma lona aiga. O le mea lea e sili ona taua i a Filipina, o le va’alau mai o lana tama ma maua se avanoa e talatalanoa ai.

 

O le fesili muamua lava a Filipina, pe o malosi, a’o fai lelei ni ana mea’ai, a’o fai lelei fo’i ona lavalava. Fai mai, a fesili atu fa’apena lona tina, ona ‘ata lea o Ali’ioaiga ma lulu lona ulu, ma fa’apea mai lana tala i lona tina, “Mom, ‘aua e te popole mai ia te a’u, o totonu o le Malo, o le usita’i lava ma le taumafai malosi, o mea uma ia na e a’oa’oina ai a’u, fa’afetai lava Mom, ‘aua e te popole mai i a te a’u, ae ou te alofa tele mo oe, alofa atu mo si o tatou aiga atoa.”

 

Fai mai, o taimi uma e vala’au mai ai Ali’ioaiga, e le mafai ona iloa mai e le tama o lo’o maligi loimata o si ona tina, ae ua na o le leo o lo’o ia fa’alogo mai ai. Sa i ai le tasi aso na vala’au mai ai le tama ma na tali e lona tina, a’o lea e i ai lona tuagane o Lilo ma lona afafine o Mataniu.

 

“Ali’ioaiga, ou te alofa tele mo oe si a’u tama pele e to’atasi, ia e usita’i ma ia e manatua a’u tala e fai atu pea ia te oe i aso uma, ia e fa’alogo lelei i e ua avea ma ou ta’ita’i, ua e fa’alogo mai ia te a’u.”

 

Fai mai, e fai lava tala a Filipina e a’oa’o ma toe a’oa’o ai lana tama ma maligi ifo lava ona loimata. Na maua fo’i le avanoa e talanoa mai ai Ali’ioaiga i a Lilo ma Mataniu. “Uncle, fa’amolemole va’ai fa’alelei si o’u tina, toetiti lava ma’ea a’u a’oa’oga ona maua lea o le taimi ou te toe alu atu ai, ona ou sau loa lea ma amata loa la’u galuega i totonu o le Malo, ae ou te alofa tele atu mo outou, ae alolofa ane i si o’u tina fa’amolemole, tofa alofa tele mo outou uma.”

 

E faia pea.