Vaega: 113

Alo maia, o le a toe fa’aauau atu la tatou tala. Fai mai, ua ma’itaga nei le tama’ita’i o Mataniu, ma e fa’apelepele lava e si ona to’alua le tama’ita’i, ina ua iloa e le tamaloa Palagi, o le a maua sa la’ua tama.

Ua uma ona fa’ailoa e William i ona matua i Amerika le tulaga ua o’o i ai Mataniu, ona fai mai lea i ai o ona matua, e sili pe a o atu e ola i Amerika. Na mafaufau nei le ali’i Palagi, pei e sili fo’i le manatu ua talatalanoa mai ai ona matua, ae o le mea ua tupu, ua toe mafaufau Viliamu, afai ae o, o lona uiga ua oti ai ie faleoloa ia o lo’o taumafai e lona to’alua.

Fai mai, ua tele le tamaoaiga ua maua e Mataniu ma lona to’alua, ua fa’apena fo’i Filipina ma si ana taumafaiga. Ua i’u a’oa’oga a le tama o Ali’ioaiga, ae fai mai, na tau fetaui ai fo’i Filipina ma lana tama, ona ua maua sikolasipi a le tama e alu ai e a’oga i fafo. Ae fai ane i ai lana tama, o ia e alu i e tautua i Vaeg’au a le Malo. Fai mai, ma alu le nap o atoa o tagi Filipina, i le mana’oga ua fai ane nei e lana tama i a te ia.

Ua matutua fo’i Lilo ma Loleta, Filipina, Luisa ma Vesi, ae o a latou fanau ia ua faia le aiga i so’o se itu, ma e le fa’ama’ima’i lava le alu lea ua alu ai nei le aiga atoa. O a lava mea e fai, po’o le a le tele o se fa’alavelave, ua matua’i tagolima le aiga atoa i so’o se mea.

Ua le mapu le mafaufau o Filipina, talu ona ta’u ane e lana tama, o ia e alu i le Malo, ua toe manatua ai lava e Filipina lona to’alua o Roger, lea ua alu lava i le va’atu’u sa’o ua le toe fo’i mai. Ae ui lava i ia manatu, ua uma ona fa’amagalo e le tama’ita’i o a fo’i tiga ma mafatiaga na o’o i a te ia, ua lagona le filemu ma le fiafia o lona loto, ina ua va’ai atu i si ana tama ua matua.

O a fo’i manatu na mafaufau i ai lona tuagane o Lilo, ia toe fai se isi ona to’alua, o lo’o laualuga pea i le loto o Filipina e toe fo’i mai lava Roger ia te ia, pea umi le ola ma le malosi. Ua mafaufau nei Filipina, o lea ua fasefulu iva ona tausaga, a’o Roger ua limasefulu tasi ona tausaga. O si a la tama o Ali’ioaiga, o lea ua luasefulutasi ona tausaga.

Fai mai, o a lava manatu ma mafaufauga na o’o i a Filipina, na tasi lava le itu na lalago i ai lona loto ma ana fa’aiuga, o le mea ua loto i ai Ali’ioaiga e fai, o le mea le na, e alu aso, sau fo’i aso o le olaga, ma e le mafuta pea i lenei olaga. Ua talia nei e Filipina le mana’oga o lana tama, ma ua tu’u loa Ali’ioaiga e alu e fa’ataunu’u ana fuafuaga mo le lumana’i.

O le la tala mulimuli ma si ana tama, “Mama, tatalo mai mo a’u, ia taunu’u si o’u fa’amoemoe, a manuia, ou te toe fo’i mai lava i ou lima.” Ua manatua vave e Filipina tala a lona to’alua o Roger na fai ane ia te ia, ina ua alu le malaga a Roger, ua atili ai ona maligi ifo ona loimata i lea taimi.

“Ali’ioaiga, pau le mea o lo’o o’u mana’o i ai, ia e toe fo’i mai i a te a’u, ae sau ina alu, ia manuia au taumafaiga, ma e le galo oe i a’u talosaga, o a fo’i a’u a’oa’oga ua tu’u atu ia te oe, ia e tausi i ai, ae e te alu ma lo’u loto ma lo’u fatu Ali’ioaiga, e leai se isi, na o oe lava la’u tama, ia e usita’i ma ia e loto tele.”

“Afai lava, o le mea lea ua e mana’o i ai, ia ua ou malie atoatoa fo’i i ai, o le na fo’i ua uma ona ou ta’uina atu ia te oe lou tama, fa’afetai ia te oe si a’u tama, i lou loto malamalama, ia e fa’amagalo i si ou tama, pau lava lea o le mea ou te mana’o i ai Ali’ioaiga, ae sau ina alu, ia manuia lau taumafaiga.”

E faia pea...