Vaega: 112

Alo maia, o le a toe fa’aauau atu la tatou tala mo lenei aso, ae ia manuia lou alo atu i faiva ma tiute o le a feagai ai. Ua fa’asolo pea aso o le olaga, ua toe fo’i mai le malaga a Mataniu ma lona to’alua lea na o, se i o’o Mataniu i le aiga o lona to’alua. Fai mai le tala, ua tau taofi e matua o Viliamu ia Mataniu latou te nonofo i Amerika. Ae tasi lava le tala a teine, o ia e toe fo’i mai ma lona to’alua i Samoa.

Ae ina ua taunu’u mai le malaga a Mataniu ma William, fai mai, ua fa’amatala nei e le teine i ona matua, le tamaoaiga o le aiga o Viliamu i Amerika. O le itu na manatu i ai Mataniu e le fia nofo i Amerika, ona o lona alofa mai i nai ona matua, ae maise o lona aiga. O le isi itu na manatu i ai le teine, o a ni pe fea e tutupu mai, a’o lea o lo’o mafuta pea ma ona matua ma lona aiga.

Ua fa’apea lava ona fai, fai mai, na talatalanoa nei Mataniu ma le tuafafine o lona tama o Filipina, pe a pe a o la’ua galulue fa’atasi i le fa’amautuina o le faleoloa, ona o lea ua fo’i mai ma le siea a lona to’alua i pisinisi a ona matua mai Amerika.

Fai mai, ua manatu nei Mataniu, e sili pe a fa’atau se fasi fanua e latalata i le taulaga, e fai ai le la pisinisi ma Filipina, ma fa’amautu i ai la’ua ma Viliami, ma asiasi ane i lona aiga. Ua ma’ea fo’i ona fetufa’ai ai ma talatalanoa ma ona matua, ma ua fa’apea fo’i ona malilie i ai Lilo ma Loleta.

Ua fai le fanua ma ua fa’amautu ai fale, o nei galuega uma, o Mataniu lava o lo’o fa’atinoina, fai mai, o lo’o faigaluega lava Viliamu i le Malo, ona ua ma’ea fo’i ona toe fa’aopoopo tausaga o lana konekarate. O Mataniu la lea ua malolo mai i lana galuega, ae ua liliu ane nei e fa’amautu mea uma o le la aiga. Ua fai nei le fale oloa si’i atoa a Mataniu ma lona to’alua, fa’atasi ai ma le faleoloa tele lava i le taulaga. Fai mai, e le mapu le mafaufau o Mataniu, ua ia lagona fo’i le faigata o le sa’iliga o le seleni e fai ai le tele o mea o lo’o manana’o mai ai ona matua.

O le isi itu, o lo’o fa’aauau pea e Mataniu le totogiina o le pili aoga a si ona tuanage e to’atasi lea ua matua nei le tama. O le tele o mea fa’alelotu ma mea fa’alenu’u a lona tama o Lilo, o lea ua fa’atino uma e Mataniu. O isi ona uso, o lo’o galulue fa’atasi ma le tuafafine o lona tama, le tina o Filipina i le faleoloa o lo’o i totonu o le nu’u.

O le tele lava la o sapalai, e alu atu uma lava i le faleoloa si’iatoaatoa a Mataniiu o lo’o i le taulaga. Ua matutua fo’i Vesi ma Luisa, ma ua tu lelei fo’i si a la fanau, o le isi teine, ua to’alua nei ma Mataniu i le va’aiga o le faleoloa si’i atoa i le taulaga. O se fiafiaga sili lea i a Mataniu, ona ua i ai se isi ona uso o lo’o la to’alua i le taumafai o le pisinisi.

Ua i ai fo’i fanau a tuagane o si ona tina, lea ua fesoasoani malosi i le taumafaiga o mea uma. Fai mai, e fai fai lava, liliu ane i ai le teine ua alu le otegia i fanau ia a tuagane o lona tina. Fai mai, e fiu Mataniu e fa’atali i le tele o taeao, ae usu a’e ua ta le sefulu, po’o le sefulutasi. Na i’u lava ina o’o tulaga ia i lona tina o Loleta, lele ane loa ma Loleta ua fai le otegiaga o fanau a ona tuagane e le i toe fa’atali.

“Fai fa’alelei tou amio e, e le fo’i lava la’u sasa, ua tou fa’alogo mai, ma afai e toe fai, e tuli lava oe e le toe fa’atali, e le fa’apea o le faleoloa o le aiga le faleoloa lenei, o se sese lava o le tagata Mataniu, tuli, e to’atele lava nai tagata o lo’o fia maua ni galuega, o tagata lelei na, ae a fai atu o faiga ia, e sili ona tu’u, tuli loa, ‘aua ne i toe fa’atali.”

E faia pea...