Ads by Google Ads by Google

Onosa’i I Mea Tiga

Vaega: 111

 

Alo maia, o le a toe fa’aauau atu la tatou tala, ae ia manuia lou alo atu i faiva ma tiute o le a feagai ai ma oe i lenei aso. Ua uma nei le fa’aipoipoga a Mataniufeagaimaleata ma le ali’i Palagi o William, ma ua alu nei le tafaoga a le ulugali’i fou i Amerika, se i o’o Mataniu i le aiga o Viliamu.

 

Ua tu lelei fo’i le tama’ita’i o Filipina ma si ana tama o Ali’ioaiga ina ua uma ona tatala le la faleoloa fou, lea ua fa’aigoa nei i a Mary’s Family Store i totonu o le nu’u. A’o le i faia lea fa’aiuga a le tama’ita’i, na muamua talanoa i ai lona tuagane o Lilo, ona o nisi tulaga e ono tutupu mai ai.

 

“Filipina, ou te le taofia oe, o mea lelei na, e tausi ai aiga ma maua ai fo’i se lua seleni ma si au tama, ae o tulaga fo’i fa’apenei, e alu alu lava i’u ina toe tapuni, ae afai lava o lou loto lea, ia fai ia lelei.”

 

Ua fa’apea lava ona fai, fai mai, e alu alu fo’i tau oso le toto maualuga ma le ma’i suka o Filipina, e fai o le au fai aitalafu, ae o le fa’anoi fo’i ia. Ae e le fa’avaivai ai le tama’ita’i.Fai mai e ta le lima o le vaveao, ua matala le faleoloa, ta le sefulutasi i le po ua tapuni.

 

E uma a’e le aso, ua matua’i oloa lu’ulu’u lava Filipina, ae o le na fo’i seleni e toe alu e toe fa’atumu mai ai fata o le faleoloa. O le mantu o le teine, afai ae manuia a’oa’oga a si ana tama, o le mea lea e tua i ai Ali’ioaiga ma sa’ili ai sona lumana’i. Ua sefululua nei tausga o Ali’ioaiga, fai mai le tala, o le tuputupu a’e o le tama, ma atili ai ona lalelei.

 

Ae e le gata i lea, a’o le mafaufau o le tama e matua’i atamai lava le ali’i. O se mitamita lea ia Filipina, ua fa’asolosolo fo’i ina matutua Lilo ma Loleta, o Filipina, o Vesi ma Luisa, ae ua ola a’e fanau, o se mitamita lea mo i latou.

 

Fai mai, e aveave sili lava Ali’ioaiga i tausaga uma, o le fanau fo’i a Vesi ma Luisa, e fa’apena fo’i tamaiti. O le galuega e le mafai ona tu’ua e Lilo, Filipina ma Luisa, o le taulaga lea a nai o latou matua o Mose ma Luisa i Aso Sa uma. O le tausiga fo’i o Fa’afeagaiga e le fa’apito le tausiga, o Fa’afeagaiga uma lava o lo’o i totonu o le nu’u, e le mafai ona misi i le tausiga a Lilomaiava ma lona aiga.

 

A tonu, o le mafua’aga fo’i lea, ua manuia ai si o latou aiga, ona o lo latou lima foa’i i so’o se tasi. Ua olaola a’e lava le faleoloa o le tama’ita’i o Filipina, fai mai, ua le toe i ai se faitoto’a fo’i lea e susu’e ona tu mai lea o le tagata i fafo ma fai lana fa’atau, ua leai.

 

Ua tioata atoa le faleoloa o Filipina, ma ua amata fo’i ona fai ana tagata faigaluega e galulue e fesoasaoni ia te ia. Ua le gata la i le faleoloa, ae ua o’o atu le galuega a Filipina i le fa’atoaga, ona i le va’ai a le teine, ua matutua fo’i Vesi ma Luisa, ae e sii pea fai se isi fuafuaga ina ia fa’amausali ai pea le tamaoaiga o lo’o maua, aua le tausiga o nu’u ma Ekalesia.

 

E o’o mai i le taimi lea, e le i toe faia lava se isi to’alua o Filipina, ae e to’atele fo’i taulele’a na o’o ane i a Lilo, ae tasi lava le tala a Filipina, e le toe fa’aluaina le tama o lana tama. ia ua ta’atia ai lava fa’apea, ae e le o iloa atu e Lilo, ia tatalo ma talosaga a Filipina, ina ia alofa le Atua ma fa’amagalo i a Roger, ia foa’i fo’i le loto onosa’i ma le loto fa’amagalo ia te ia.

 

Fai mai, ua amata ona fesilisili Ali’ioaiga, i lona tina, po’o fea o i ai lona tama, ua le va’ai i sona tama. Fai mai, e tasi lava le tali a Filipina, “O lou tama o lo’o alu i Amerika, e sau se taimi ona toe fo’i mai lea.”

 

E faia pea...