Onosa’i I Mea Tiga

Vaega: 3

 

Tatou fa’atagisia pea le tausiga alofa a lo tatou Matai oi le lagi, e ala i lana puipuiga ma lana foa’i mo i tatou e le mavae lea ua o tatou alafa’i mai ai i le manuia i lenei aso i Lona alofa ma Lona agalelei. Ona o tatou fa’apea ifo ai lea, “Le Atua mamana e, o a lava faigata ma mafatiaga o lo’o feagai ma i matou i lenei olaga, matou te tutu i lo matou fa’atuatua i a te Oe, ma fa’aeaea a’e o matou ulu, ma vi’ia pea Lau Afio e le aunoa.”

 

Na muta mai la tatou tala ina ua nonofo fa’atasi nei Lilo ma Leta ma matua o Lilo, manatua fo’i e to’alua lava le fanau a le toeaina o Mose ma Malia, o le tama o Lilo ma le teine o Filipina. I le amataga o lenei aiga, e ‘ese le tala tama o le lo’omatua o Malia, po’o le a lava sina mea e fa’alogo i ai le lo’omatua o fai ai se tala a se tasi i lana fanau, e oso i luga le fe’afe’a o le lo’omatua. Ma o tala lava nei e lafo e le lo’omatua o Malia, “E a tou te maua a, tou te fiu lava e loto leaga i la’u fanau, tou te le tai tai lava ona maua Lilo ma Filipina, e soli i o’u vae.”

 

O le isi itu e ‘ese le fulufulu lele ai o le lo’omatua, o le taimi e fai ai mea a le nu’u, aua fai mai le tala, o le nu’u lenei o Mose lava e fai le nu’u atoa, ona o lona suafa matai ua tu’u i ai e lona aiga. O le ala lea e le mafai ai lava e se tasi ona fa’afetoa’ia Mose i mea a le nu’u e fai. Ae na o le pau la le tagata e mafai ona ia faia le amio lea, o le faiava lea na lafo lana tala e uiga i lana aga’ese po’o lana sapelu, a fai lava i lana sapelu e sau ma au mai uma uluulu o la’au maualuluga e fai lava e lana sapelu.

 

Ua taumafai nei le toeaina o Mose e tau fa’avasega le uiga o le tala a le faiava tautua lenei, ma na i’u lava ina paso le mafaufau o le toeaina o Mose. Ae o le mea ua tupu, o lona atali’i o Lilo na ia fa’auigaina le tala. ina ua mautonu le mafaufau o le toeaina o Mose e uiga i le tala a lona atali’i, fai mai, ua pei o le ‘ia feai le toeaina i lea taimi.

 

Na tu a’e nei i luga ua savali loa ma le sapelu e agai atu i le fale o le faiava lea latou te tuaoi. O le mea na tupu, e taunu’u atu le toeaina o Mose, o lo’o i ai le asiasiga a le Fa’afeagaiga o le latou nu’u i le fale o le faiava. Ua pei e segia le muauli o le toeaina ina ua va’ai atu o tutula’i mai le Fa’afeagaiga o lo’o fai le tatalo, a’o lo’o to’atuli Vesi ma lona to’alua ma le la fanau e to’afa.

 

Na toe liua ai lava i ina le loto fa’amaualuga ma le loto maa’a na alu atu ma le toeaina o Mose. Ua tu nei ma tilotilo atu i le fale o Vesi ma lana fanau, ae maise ai o le Fa’afeagaiga o le nu’u lea o lo’o i ai. Ua tu le toeaina ma toe mafaufau, aua ua na o le tiapolo lava ma satani lea na o latou o atu, ae o faiga a le Atua ma Lona mana, e auala ‘ese’ese mai mo i tatou.

 

Ua toe liliu nei Mose ma toe savali i lona fale, ua nofo ifo i lalo ma fa’asolosolo ona mafaufauga e fa’apea, atonu ai e se se le fa’aliliuga e lona atali’i o le tala a Vesi, atonu fo’i, ai o se tala lava na lafo e le faiava latou, e aofia uma ai lava le nu’u. Na toe mafaufau loloto nei Mose i le tautua tuavae o lo’o fa’atino e Vesi ma lona to’alua, ae maise o si a la fanau mo la’ua fa’apea le aiga. O i’ina na oso a’e ai manatu alofa o le toeaina ma lona loto fa’amagalo.

 

E faia pea….

Comment Here