Onosa’i I Mea Tiga

Vaega:  2

 

Fa’atalofa atu i lou alafa’i mai i le manuia i lenei aso fou, e i ai le fa’amoemoe o lo’o aoina le masina i le soifua laulelei o le autnu’u, ona o tatou fa’apea ai lea, “Le Ali’i e, e silisili lava Lau Afio i mea uma matou te manatu i ai. Ia E alofagia i matou uma i lenei aso, ia maua e i matou le loto fa’amagalo, le onosa’i ma le fa’apalepale i mea uma, ae ia fa’asilisili lo matou alofa, aua o mea lelei ia ua E finagalo ia o matou faia, fa’afetai i lou alofa, fa’amalo i Lou agalelei, Amene”.

 

O le ulugali’i o Lilo ma Loleta, e to’a lima le la fanau, e to’a fa teine ae to’atasi le tama. O le teine ulumatua, o Mataniufeagaimaleata, o Ataataota’ulelei, Alofagiaimeauma, o Onosa’iimeatiga ma le tama o Tiaseuoali’i. O a tatou faitau i olaga o le fanau a Lilo ma Loleta, a’o fa’agasolo la tatou. O le ulugali’i lenei, e mata’ina e tagata o le nu’u, ona e fai mai le tala, o se ulugali’i e ‘ese le fealofani. So’o se fa’atasiga a le aulotu, po’o mea fo’i e fai a le nu’u, e le mafai ona alu le tasi ae tu’u le isi, e o uma lava.

 

O le isi itu, e fai le la pea ‘ofu i aso uma lava e fai ai le fa’atasiga a le aulotu. Na i’u lava ina fa’apea le lauga a le Faifeau i le isi Aso Sa, “Le mamalu o le tatou Ekalesia, ia avea ma fa’ata’ita’iga lelei le ulugali’i po’o le aiga o Lilo ma Leta, a tatou va’ai i ai, o se ulugali’i ua mautu le la mafutaga ma le Atua, ia fai ma fa’ata’ita’iga i a i tatou uma.”

 

Ina ua ma’ea le sauniga o lea Aso Sa, fai mai ua matua’i gugulu le aulotu, ona o upu ua saunoa mai ai le latou Fa’afeagaiga. O nisi ua fa’apea, “Se o le lolo o le susu a Paulo, ai fo’i ua magiagia taenifo o le Faifeau i se fa’alifu talo lololo a Lilo, lea fo’i ua saunoa mai ai fa’apea.” O nisi o le aulotu ua na o le tilotilo o le tasi i le isi ma lulu o latou ulu.

 

Ua galo i le Fa’afeagaiga, o saunoaga fa’apea ae maise o le fa’avi’ivi’i, e le manuia ai se galuega, aua o upu moni lava ua si’i le isi ae toso le isi, ona le manuia ai lava lea o le galuega a le Atua. Ia tatou te le fa’amasino lea tulaga, aua e fai fo’i o le aumai, ae o le toe avatu. Tatou talosia, ia ‘aua ne i tupu ia tulaga, ae ia fafaga ma tausi le lafu mamoe, ina ia ola lelei ma ola manuia tagata uma.

 

O Lilo o lo’o soifua uma ona matua, ma o lo’o nonofo fa’atasi ma ona matua, o Mose le tama, a’o Malia lona tina. O lona to’alua o Leta ma le la fanau e to’alima. Fai mai le tala, ina ua ma’ea le fa’aipoipoga a Lilo ma Leta, na fai ai loa le tonu e sili pe a nonofo i le aiga o Lilo, ona e na o Lilo lava ma lona tuafafine e to’atasi o Filipina lo latou aiga. Na toe manatu fo’i Lilo, o Leta, e lelei lava lona aiga, ona e to’atele ona tuagane, e mafai lava ona o latou tausia matua o Leta, a’o Lilo e na o ia lava ma lona tuafafine e to’atasi.

 

Ua fa’apea lava ona fai, ae fai mai le tala, o matua o Lilo, o ni matua e ‘ese le maualuluga o o la loto, e le fia to’ilalo i se tagata, e fai ai lava tala a tagata o le nu’u ma le aulotu, e fa’apea, ua fanau mai e le toeaina o Mose ma Malia se fanau ua sili le loto maualalo, e pei la o le tama o Lilo ma lona tuafaine o Filipina.

 

E fai o le le tagolima o le toeaina o Mose ma le lo’omatua o Malia, ae le tu’u mai ai i lalo le fu’a a le lo’omatua, e fa’alealea a’e lava i luga, e le fia to’ilalo i se tagata.

 

E fai fo’i la o le lo’omatua, ae ua alu atu ai ma le toeaina latou, e fa’alala le sapelu a le toeaina i so’o se tagata lava e fa’aletonu i totonu o le nu’u. Fai ma na i’u lava ina fai le fonotaga a le nu’u, na i’u lava ina fa’amataga e se tasi o taule’ale’a, ina ua lafo upu a le taule’ale’a e fa’apea, “O a’u o le tautua, ma e leai se mea e tasi o le aiga o lo’u to’alua e fa’aletonu, o lena fo’i ua silafia e lo tatou nu’u, o la’u tautua e le mafai ona ou moe, ou te mafaufau pe ua mago lo’u ‘iei’e, pe ua maoopoopo a’u ‘ato’ato, pe ua ma’ai fo’i la’u aga’ese, o la’u aga’ese la a ou fai atu lava i ai e sau ma au  mai uma uluulu o la’au maualuluga ma isi la’au, e fai lava e la’u ‘aga’ese.”

 

E faia pea…

Comment Here