Onosa’i I Mea Tiga

Vaega: 1

 

“Le Ali’i e, e tumau atu lava i Lau Afio le vi’iga ma le fa’amanu, ona o Lau tausiga alofa mo i matou e le mavae i aso uma o lo matou ola, ia o matou manatua pea Lau taulaga togiola mo i matou, ona o matou maua ai lea o le onosa’i i mea tiga ma puapuaga e o’o mai,  a’apa  maia Ou aa’o alofa i a i matou, aua o Oe o lo matou malosiaga ma lo matou fa’amoeomoe i mea lelei, a’o le vi’iga ma le fa’amanu matou te fa’afo’i atu i Lau Afio e fa’avavau, fa’avavau lava, Amene.

 

Fa’afeiloa’i atu ma fa’atalofa atu i le mamalu o le atunu’u o lo’o alaala ma papaa’ao i so’o se itu o le lalolagi o lo’o maua mai a tatou tala fa’asolo i luga o upega tafa’ilagi. Malo le soifua, malo fo’i le onosa’i a’o outou alaala ai i atunu’u mamao, ia tumau pea le filemu o le Atua ia te outou i mea uma tou te faia.

 

Fa’atalofa atu ai i le paia ma le mamalu o le atunu’u i lenei taeao fou, malo le soifua, malo fo’i le onosa’i i faiva ma tiute o lo’o feagai ai I lenei aso, ia i ai pea le alofa o le Atua i mea uma tatou te faia, e i’u ai i le manuia fuafuaga uma.

 

Fai mai upu a le atunu’u, “E au i le tauola, e au i le fagota”, ae fai mai upu o le tusi tatalo a le Ekalesia Katoliko i Misitelio Mamalu, “O le amoga o le Koluse o Iesu i Kalevario, tatou te fa’atoga atu ai le onosa’i i mea tiga ma tofotofoga mai le Atua.”

 

Ua ou au maia lenei ulu tala e fai ma fa’ata’imuaga i la tatou tala fou. Aua o lo’u talitonuga, o lo’o fetaia’i pea I tatou ma faigata, o tiga, o mafatiaga ma puapuaga o le olaga nei, e le mafai ona tatou ‘alo ‘ese ai, ona o mea o lo’o tutupu pea i aso uma o lo tatou olaga.

 

O le manatu fo’i, e tele ma ‘ese’ese ituaiga tiga o le olaga nei. O se fa’ata’ita’iga, o tiga o le tagata pe afai ua motusia le mafutaga e ala i le maliu ma le oti. O tiga o le tagata, pe afai ua faia e se isi uso a tagata se mea leaga, ma ua manu’a ai lou loto. O uiga ma amioga a se isi tagata o lo’o faia pea i aso uma aso uma, ae ua uma ona e talatalanoa i ai, ina ia faia i ai se suiga. O tiga, ona o ma’i o le tino, o le loto ma le mafaufau.

 

O tiga nei, fai mai afai e fa’ataotolia i tatou i gasegase o le tino, e tasi lava lo tatou sulufa’iga, ua na o Iesu Keriso, e ala i Lana fa’amalologa mo i tatou. Ina ua amo le Koluse o Iesu e aga’i atu i le mauga o Kalevalio, sa ia lagona le tiga ma le mafatia, ae sa le i fa’afiti ai pe fa’apea ane, ua lava, e leai, sa ia talia tiga uma ona o lona alofa mo i tatou le tagata agasala.

 

Amuia le tagata soifua, aua e ui lava ina agasala ma agasala pea, ae o le alofa o le Atua, e fa’aauau pea mo i tatou. Tatou ‘ae’ae ia lea manu ua ulu ma tatou fa’afo’i le vi’iga i le Atua Soifua, ona o Lona alofa ma Lona agalelei lea ua o tatou ‘oa’oa ai i Faleseu ma o tatou sa’a ai i ma’a o malie i Ana fa’amanuiaga ma Lona alofa i aso uma o lou soifua fa’apea ma si o’u nei ola vaivai.

 

Ia tatou maua le agaga o le onosa’i i taimi o faigata, aua fai mai le upu, a leai ni tiga po’o ni mafatiaga, ua aunoa i tatou ma le onosa’i. A tatou le lavatia fo’i ona onosa’i, ona le maua lea e i tatou le alofa ma le mautinoa, e tupu ai le fa’amoemoe i mea lelei uma. E pei ona alofa mai o lo tatou Tama oi la lagi, o lea na ia auina mai ai lona Atali’i Pele e to’atasi ina ia le fano se tasi e fa’atuatua ia te ia, ae ia maua e ia le ola e fa’avavau.

 

Ia tatou manatua pea, o le Atua, o lo’o i ai le ola, o Ia fo’i na te foa’i, o Ia fo’i na te toe ave’ese. Ia o tatou loto tetele ma ia tumau pea lo tatou fa’atuatua i le Atua, i taimi o faigata ma puapuaga o le soifuaga nei.

 

“O le amoga o le Koluse o Iesu i le mauga o Kalevario, tatou te fa’atoga atu ai le onosa’i i mea tiga ma tofotofoga mai le Atua.”

 

Tatou feiloa’i i le aso a taeao pe a sopo lou soifua fa’apea ma si o’u ola vaivai mo le amatalia o la tatou tala, ae ia manuia lou alo atu i faiva ma tiute o le a feagai ai i lenei aso, ae ia maualuga pea le vi’iga o le Atua.

 

E faia pea...

Comment Here