Ads by Google Ads by Google

Onosa’i ‘The Lion’ Moana - alo o Samoa fusu i Alaska ma manumalo ai


O se va’aiga i le taimi na tula’i ai le taule’ale’a mai Auma Leone e talia lona siamupini i le AFC Boxing in Anchorage Alaska, Onosa’i “The Lion” Moana, faamalo le tauivi, sauniuni pea aua nisi fusu’aga fa’avaomalo. [ata: foa’i Ta’ase Moana]

O se vaaiga i le fanau e tausia lelei e lo latou tama “Onosa’i Moana” ma koleni i aso uma e saili ai sona manumalo i le AFC ma ua avea nei o ia ma Siamupini o le Heavy Weight i fusuaga i Anchorage Alaska i le 2017. O lona faletua o Ta’ase Toli-Tafua Moana o le tama’ita’i mai Samoa. [ata: foai]

Ua fa’alauiloa mai le taumafaiga a se tasi o alo o Amerika Samoa, Onosa’i “Lion” Moana, na soifua a’e i Auma Leone, lea ua ta’uta’ua lana taumafaiga i le setete o Alaska i le fusu ma manumalo i lana paga i le heavy weight i le Alaska Fighting Championship (AFC).

 

“O ituaiga mea nei e mo’omia tele e le tatou Asosi Fusu i le atunu’u, e ao ina feso’ota’i mai le fanau o lo’o tauva i so’o se ituaiga o ta’aloga i fafo, ae maise o fusuaga ma pi’iga, ina ia maua atu iinei so’otaga, aua a oo i taimi o sailiga siamupini iinei, e mafai ona vala’auina e o mai se’i fetaui ma tama o lo’o i le motu, e saillia ai suli sili ona agava’a o le atunu’u e koleni fa’apitoa mo fusa’aga ma piiga fa’avaomalo lea e aofia ai le Oceania ma le Olimipeka, ae tainane fo’i ta’aloga o le Pasefika,” o se tala fiafia lea a le ali’i presetene o le Asosi Fusu, Mapu Jamias ina ua fa’ailo i ai lenei fo’i tala matagofie mai le setete o Alaska.

 

O le tala’aga o Onosa’i i lea fo’i fa’agatama, e le’i umi ona ia faia, peita’i, e o’o mai i le taimi nei, e le’i faiaina lava, ma ua siamupini fo’i o ia i lana paga Heavy Weight i le 2017.

 

“Ou te mautinoa i lo’u ola mai na ou mana’o lava ou te fusu, peita’i, e leai fo’i se kalapu fusu mai Leone e mafai ona alu i ai, ma le isi sa pisi lava i ta’aloga masani lea e una’ia i totonu o aoga maualuluga a le malo, le football, volleyball, Baseball, ma sa iloga la la’u taumafaiga i le Football mo le matou ‘au a Leone High School,” o sana fa’amatalaga mai lea.

 

Ina ua maua le avanoa e koleni ai mo fusuaga a le AFC, sa fiafia e fa’amalositino ai ma oso ai i luga o le fua mo le fusu’aga muamua. Oso atu manumalo, soso’o mai le lona lua, ma ua maua ai le tulaga siamupini o le Heavy Weight i le taimi nei.

 

E ese mai fo’i i le fusu, ua ta’alo fo’i i le lakapi i le taimi nei, ma matua ave lana fa’amuamua i le tausiga o si la’ua fanau e to’aono ma lona to’alua o Ta’ase Toli-Tafua Moana.

 

“O le fautuaga lava mo le tupulaga, aua le fefe e taumafai i isi taumafaiga e ese mai le mea sa e matele e fai. Ete le iloa lava, poo e taofia lou tagata mai se faaeaga sili i le isi ta’aloga sa e le tauva muamua ai. Ia te a’u, o lea ua ou avea nei le fusu ma fa’agatama o le a ou taumafai atili ai aua o lea e talu lava ona fusu mai e le’i maua se faia’ina. Fa’afetai i le Atua mo lea manuia ma le tino malosi, fa’afetai i lo’u aiga mo le tapua’iga,” o  sana tala  lea.

 

O lenei alii sa a’oa’oina i Leone High ma sa lauiloa i le ta’aloga football i lona tulaga o le Safety ma na fa’au’u ai 2003-2004. Na maua mai lona avanoa e a’oga ai ma ta’alo Football i le San Joaquin Delta College ma sa ia ulufale loa i ai ma taumafai. Peita’i e le’i mae’a le lua tausaga ae ua le gafatia e ia ona totogi lana a’oga.

 

Na ia tu’ua le Kolisi lea sa a’oga ai i le tausaga 2006, ae nofo loa o ia i Indiana State ma amata ona ta’alo ai i le Lakapi. Na ta’alo mo le ‘au a New Hampshire fa’apea ma isi setete e aofia ai ma le setete o Alaska.

 

I le tamia nei, o Moana o se tasi e fiafia e fa’atasi ma lana fanau. O lo’o ia faia lena galuega i aso uma, tausia lelei o lana fanau ma koleni malosi ai mo ana fusuaga.

 

“A maua lava le taimi e tausia lelei ma va’aia la’u fanau, ae fa’amama avega fo’i i le tina o le aiga, Ta’ase i ana galuega fa’atina i le lotoifale, ua mae’a fo’i galuega mamafa o le aso. E o si a’u fanau i le a’oga, ma ua momoe pe avea fo’i ma a’u tagata maimoa, ae koleni Dad mo fusu’aga.”

 

O le tagata e fa’asili i le mafaufau o Onosa’i mai lona la’ititi se’ia oo i lenei vaitau, o lona tama, Iosefo Moana. “E le o se tasi e maualuga i le silasila a le to’atele o le atunu’u peita’i, e ta’i alalo lava le i’a a Sa Sa’umani, i si ona olaga. Fa’afetai i le Atua mo le tama sa ia aumaia mo a’u, ma ua ou faia lava fa’ata’ita’iga lelei sa ia fa’ailoa ia te au, i le tausiga o lo’u aiga ma taumafai i ta’aloga ou te fiafia e tauva ai, ma fa’aaoga tatau ai le taimi e koleni ai.”

 

“I lo’u ola mai sa na’o i ma’ua ma lo’u tuafafine ma le ma’ua tama le aiga. E le’i faigofie lava le olaga, aua sa leai se tina o i ma’ua, na tete’a lava matua i le nao le 5 tausaga lo’u matua.”

 

Sa ia fa’ailoa mai pea, “O le tele o tausaga e nonofo ma si o’u tama i Leone ma fai le fa’atoaga, e tapena ai suavai e tautua ai le aiga potopoto. Ua lauiloa lava si o’u tama i lana lea tautua o le saunia o le umu mo le aiga. E oo mai i le aso, o lo’o talavou ma malosi lava si o’u tama ona o lona ola galue.”

 

“O le aso sili ona fiafia ai lo’u tama ina ia manumalo i le fa’amasinoga na te tausia i ma’ua, ae le malo ai si o ma’ua tina. Masalo o se isi lea ala ua aumai mo a’u, ou te fa’aea ai fo’i si o’u tama ma lana tausiga,” o sana tala mai lea.

 

Ina ua manumalo i lana fusu’aga a le AFC i Alaska, na ia tula’i ma ia fa’apea ane le leoa i lona loto, “O le ta manumalo lenei Tama, fa’afetai mo lau tausiga!” O lo’o tumau pea le so’otaga a Onosa’i ma lona tuafafine o Pule Moana fa’apea si o la’ua tama.

 

I le tamia nei, ua mafaufau fo’i Onosa’i o le a suia lana ta’aloga e tauva ai, fa’asolo atu i le UFC ona o lo’o to’atele i latou e fia maimoa i lea fa’agatama i luga o televise ma le initeneti, peita’i ua fa’ailoa atu ia te ia, “Tauva ai pea i le fusu, o loo mana’omia lava e Amerika Samoa se tama fusu lelei i le heavy weight e sipa atu mo le Olimipeka ma le Oceania.”

 

O lo ua avea nei lea fo’i fa’ailo na oo atu ia Onosa’i, o le a taumafai ai e koleni pea ma fusu, pe tua ma ni a sana taumafaiga mo le Olimipeka 2020.

 

O se tasi ua mana’o Onosa’i e ave i ai lana fa’afetai o si ona to’alua o lo’o fa’amaoni lana tausiga ia te ia ma le fanau, Ta’ase Toli-Tafua Moana o lo’o faigaluega o ia i le HDR Engineering Inc., ma o le tama’ita’i mai Samoa.

 

O lona tina o Tuvale Vaimoe, peita’i o lo ua fiafia o ia e momoli mai ona alofa’aga i si ona aiga atoa Le Aiga Sa Aigamaua ma Helshium i Auma, Leone.

 

“Fa’afetai mo la outou tapua’iga mau, talosia ae mafai ona ou fusu mo Amerika Samoa i le Heavy Weight i le Olimipeka.”

 

“Fa’afetai fa’apitoa mai mo Peni ma Matalena Ape mo le tausiga o si ona tama o Iosefo Moana, ia outou manuia i le agalelei.”