Ono tausaga o fa’asoa atu mo aiga tuaoi


O se va'aiga i se tasi o aiga na agava'a mo le foa'i a lana afioga Lenamuaiao Senatoa Galea'i LK Tuufuli i le aso Kerisimasi 2017. [ata: Leua Aiono Frost]

O le ono ai lenei o tausaga o saunia pea e le afioga Lenamuaiao, Senatoa Galea'i L. Tuufuli ma le Fanau ma Aiga foa'i mo aiga tuaoi mai lona maota i Fagatogo lava. O lea fa'amoemoe, e toe fafagu ma fa'ataua atili ai le 'auga o lenei vaitau, "Ola foa'i ma fa'asoa atu ou manuia i nisi!"

 

"E le o mamao lava oe ma se isi o lo'o i ai se mana'omia i o latou lotoifale. Ona o aiga fo'i e to'atele ina fa'amoemoe i tagata faigaluega, ae ta'ito'atasi fo'i tagata faigaluega e tausia atoa ai le fanau, totogi pili ma toe faia mea fai a le ekalesia ma aiga potopoto, e le o faigofie ai le fa'asoa. Mo aiga na, fa'afetai pe afai ae o'o atu se fa'asoa mai ia te a'u ma le fanau. Ua na'o se fa'amalositino e tatalia ai le motusia o galuega i lenei vaitau, ma fa'afiafiaina atili ai le fanau i lenei vaitau fiafia o le tausaga."

 

Na tapena e le tama matua o mea taumafa eseese, e aoga tele mo le aiga atoa ae maise le fanauiti e fesoasoani i matua i le tausiga o la le tino o le fanau.

 

"Ua le agaga i ni meata'alo aua e le maua ai se malosi, ae sili ona avatu pea lava o mea tausami eseese ina ia fa'afiafiaina fa'atasi i tatou uma i lotoifale o tatou aiga i le aso Kerisimasi lava lenei,” o sana talanoa mai lea i le Samoa News.

 

I le taeao lava o le Kerisimasi na auva'a potopoto ai aiga na taua'aoina fa'apitoa i ai tusi vala'aulia ma fa'amanuia ai le Kerisimasi mai ia Galea'i ma le fanau. Na faia se sauniaga pu'upu'u i le maota o Galea'i i Fagatogo ma sa auai uma matua ma fanau nei na vala'aulia, o i latou ia o le a agava'a mo le foa'i.

 

I se tautalaga a le susuga Sauafea Sonny sa ia fa'ailoa ai, "O lenei foa'i e taumafai le matou Tama matua ina ia tofusia i tatou i le agaga o le fiafia i le aso lenei. O le aso e auga i le soifua fa'asoa pe foa'i atu i le tasi o ou uso a tuaoi. O le agaga o le alofa. Peita'i e leai lava se mea e mana'omia e le tama matua, ae tasi se fa'anaunauga o i matou le fanau, ia outou tatalo ia malosi ma fa'afualoa pea le soifua o le tama ia maua fo'i nisi aso fa'apenei i le lumana'i mo i tatou, ae silisili ia auauna ai pea le tama i le atunu'u ma le tatou Malo."

 

Matagofie mea uma na tapena mo le foa'i. Ua va'aia mea'ai si'iatoa ua aofia fa'atasi ai. O taga araisa 20 pauna, pusa saimini ipu ma paketi, pusa wahoo atoatoa, pusa apainu pusa o snack ma pusa supokeli, o Cereal tetele ma Pizza XL, o le aiga i le taeao a aiga ta'itasi e fa'amanuia ai le Kerismasi.

 

E leai se tasi na toe fa'au'u, peita'i sa gasolo atu nai aiga, ma fa'amanuia le Kerisimasi i le Tama ia Galeai.

 

E le'i galo i lana afioga Lenamuaiao nisi o e tino matutua o le afio'aga. I lona tuaoi le faletua o Tiumalu Telesia Scanlan na fa'ao'o i ai lana meaalofa ma sana foa'i na tapena mo lana tausiga. O lona uso fo'i o Duke Tuufuli ma le aiga, sa la'ua maua se Kerisimasi fiafia e toe talatalanoa ma le fiafia i le tele o tausaga, ae o loo tumau pea le nonofo fa'atasi o uso.

 

I sana fa'asoa mai sa fa'apea ai, "Ua ou fa'alogo fo'i i le matagofie o le saunoaga fa'amalosi a le Kovana ina ia e tagai toto'a i lou vaia'ai i se aiga o i ai se mana'omia, tula'i ma foa'i atu, o le agaga tonu lea o lenei vaitau, ae ua atoa ai nei le 6 tasuaga o faia lenei galuega alofa, ina ia tumau fo'i i le fanau ma latou fanau, se agaga lelei fa'apea, ia le tagai na'o oe lava ma lou aiga, ae ola fesoasoani atu i nisi, ma fa'asoa atu i isi ou manuia pe afai ua lava ma totoe lau fa'asoa i lou lotoifale,” o sana tala fiafia lea i lenei vaitau o le 2017.

 

O se tala fiafia a lona alo tama'ita'i Malamamaisaua Galea'i Tuufuli Sauafea, sa ia fa'apea ai, "O se mea fiafia ia te a'u le tapenapenaga o lenei fa'amoemoe o le tama, e ui ina matua ae le mafai ona galo ia te ia ona fa'amanatu mai ia te a'u le fa'amoemoe lenei e le tatau ona toe tu'ua. E le'i taitai mai i lenei masina, ae ua leva ona sau lana fa'amanatu. O lona ia iloa, e leai se isi e fia 'ai i le tatou atunu'u, pe afai e tumau pea Samoa i lona agaga foa'i atu ma fa'asoa atu manuia i lou tuaoi."

 

Na'o le alaga o le fa'afetai sa lagona o fa'aleo e i latou na autova'a mai lea fa'asoa taua, ma e mautinoa lava, e leai se tasi e tu ma taui galuega fa'apenei, na'o le Atua lava o i ai manuia e toe fa'atutumu mea ua fa'agaogaoina ona o le agaga alofa ma foa'i atu.

Comment Here