Olaga Le Tumau

Vaega: 204

 

Fa’afeiloa’i atu ma fa’atalofa atu i le mamalu o le atunu’u i lenei taeao fou, e i ai le fa’amoemoe o lo’o maualuga le aoina o le masina i le soifua laulelei o le atunu’u, e ao ai ona o tatou fa’apea ifo, “Le Atua e, matou te tu’u atu pea o matou mana’oga lilo i Lau Afio, ia e alofa ma fa’amatunu’u i le manuia, a’o le vi’iga matou te fa’afo’i atu lava i a te Oe Tama e fa’avavau, Amene.”

 

O le olaga ua i ai nei Keisi, ua toe tula’i mai i lona malosiaga sa i ai muamua, o mea uma fo’i sa le mafai ona ia faia, a’o fa’atasi ma Loleni, o lea ua ia galue e fa’atino uma.

 

O pisinisi ma kamupani a lona tama lea ua ia galue e fa’agaioi, o mea uma fo’i e patino tonu i a Lulu, ua uma ona fa’amautu atu i ona lima. O lea la ua punou nei e fa’afoefoe lelei mea uma, ona e tele mea o lo’o alu i ai vaega tupe e pe ona faia e lona tama.

 

O le falema’i, o falea’oga o le polokalama mo nai tagata matitiva, o fanau ua fa’asauaina, o tina ua sauaina, o mea uma nei ua tu’u atoa i ai le loto o Keisi.

 

O Polokalama fo’i nei, o lo’o fa’atupe uma e Keisi, o lea fo’i ua maua le avanoa e feiloa’i ai ma le Kovana, ma ua amata ona fa’amautu nisi fuafuaga lelei. O nei mea uma, na mana’o Keisi ia o la fa’aauauina ma Loleni, ae peita’i, e le i mana’o i ai Loleni, ona ua i ai le manatu o Loleni, e tele tupe e fa’aalu ai.

 

O lea la ua toe liliu nei Keisi e toe fa’amautu mea na faia e lona tama, ae fai mai e moni lava e alu tupe, ae e tele fo’i vaega tupe o lo’o maua mai ai.

 

Ua talatalanoa nei Keisi ma Keneti ua tatau ona nonofo lelei ma amata lo la aiga, ma ua tapena fo’i le to’atele o tagata i fuafuaga uma. Ae fai mai o le lo’omatua lava o Lila na fa’afoefoeina mea uma. O uo fo’i a Keisi le tenei o Keli ma Lenina, o i la’ua fo’i ia, na tu malosi ina ia fai le fa’aipoipoga a Keisi ma Keneti.

 

Ua fa’ailoa fo’i e Keneti ia Keisi, e maua fo’i e nai ona matua mea uma, ma o le a galulue fa’atasi pea, ina ia fa’aauau mea e pei ona mana’o i ai Keisi ina ia fai. O nisi itu e pei ona ta’ua e Keisi, sa le i toe mana’o e faigaluega Keneti, ae alu ane la te to’alua i le fa’atinoina o mea uma. Peita’i, e le i mana’o i ai Keneti, ona fai mai a ia e mafai lava ona ia lagolago i mea uma, ae o lana galuega e le mafai ona tu’ua.

 

Ua fa’apea lava ona fai, na va’aia e tagata uma le fiafia o Keisi, le fealofani o Keisi ma Keneti i mea uma lava, o le mea lea na toe tula’i mai ai le loto tele o Keisi, aua ua i ai le tagata ua fesoasoani i a te ia, ma tu’u ane lona taua’u e tauave ai mea uma.

 

E faia pea….

Comment Here