Ads by Google Ads by Google

Ofo Kruse pe na fa’afefea leiloa faila alii pagota mai le Ofisa Femalagaaiga


Le afioga i le Fa’amasino Sili ia Michael Kruse [ata AF]
ausage@samoanews.com

Na taua e le afioga i le ali’i fa’amasino sili ia Michael Kruse i le vaiaso na te’a nei le matua ofo o le fa’amasinoga, pe na fa’afefea ona leiloa le faila a se ali’i pagota mai fa’amaumauga a le Ofisa o Femalagaaiga, ae o le latou tiute o le taulimaina lea o fa’amaumauga o soo se tagata mai fafo e ulufale mai i Amerika Samoa.

Na tolopo mai i le aso Faraile na te’a nei le lauina o le fa’asalaga a le ali’i o Va’afuti Tevita, ina ua ta’usala o ia i le moliaga mamafa o lona faia o uiga mataga i se teineititi e talavou i lalo o le tulafono, ina ia maua ai le avanoa o le loia a le malo ia Gerald Murphy na te sailia mai ai le faila a Tevita mai le Ofisa o Femalagaaiga, ina ia mafai ai e le fa’amasinoga ona maua se fa’amaoniga sa fa’ataga a le Komiti Fa’afoe a le Ofisa o Femalagaaiga ia Tevita e faigaluega i le teritori.

Ina ua toe valaau le mataupu a Tevita i le aso Faraile na te’a nei, na fa’ailoa ai e le loia a le malo ia Murphy e fa’apea, ua uma ona saili e le Ofisa o Femalagaaiga a latou fa’amaumauga e fa’atatau i le faila a Tevita, ma ua le maua le faila.

Na vaaia i le taimi lea le sui o foliga o Kruse ina ua ta’u atu e le malo le fa’amatalaga e fa’atatau i le faila a Tevita.

“Na mafua ona fia maua e le fa’amasinoga le faila atoa a le ali’i ua molia, o loo fia iloa pe sa i ai se fa’aiuga mai le Komiti Fa’afoe a le Ofisa o Femalagaaiga e fa’ataga ai o ia ona faigaluega i le atunu’u, aua o le fesili lena o loo taumafai le fa’amasinoga e tali, pe sa fa’ataga ona faiglauega o ia iinei, pe sa nofo fa’asolitulafono fo’i”, o le saunoaga lea a Kruse ma lona si’ufofoga ua amata ona si’isi’i i luga, peita’i sa maitauina le fai fai malie atu pea o le tali a le loia a le malo ma ia taua e fa’apea, sa lelei le ID a Tevita i le taimi na pu’e fa’apagota ai o ia i le tausaga na te’a nei, peita’i e 3 aso talu ona taofia fa’apagota o ia, ae mae’a loa le aoga o lona ID.

Na fa’aauau pea ona saunoa le ali’i fa’amasino sili e fa’atatau i le mataupu lenei ma ia taua ai e fa’apea, “O isi taimi e mafua ona fai mai ua leiloa le faila, ona e le manana’o tagata e fa’ailoa fa’amaumauga o loo i totonu o le faila”.

O le itu taua na mafua ai ona naunau le fa’amasinoga e fia maua le faila a Tevita, ina ia manino ai le fa’amasinoga i le tala’aga e fa’atatau i le ulufale mai o lenei ali’i i le atunu’u, aemaise ai le solitulafono matuia lea ua ta’usala ai o ia, o lona faia lea o uiga mataga i se teineititi e laititi i lalo o le tulafono.

Saunoa Kruse e fa’apea, e foliga e mama i le manatu o le malo le mataupu lenei peita’i e le manatu mama i ai le fa’amasinoga, ona o lo o maitauina pea le to’atele o tagata mai fafo o loo nonofo fa’asolitulafono i le atunu’u, ae emo ane le ata ua a’afia i solitulafono eseese, aemaise lava i solitulafono e a’afia ai le saogalemu o fanau laiti.

Sa ia taua lona le talitonuina o le fa’amatalaga a le malo e fa’atatau i le leiloa o le faila a Tevita, aua o le isi manatu lea ua tula’i mai i le fa’amasinoga, ailoga e i ai se faila a lenei ali’i i le taimi atoa sa nofo ai i Amerika Samoa.

I le fa’aiuga o le saunoaga a le afioga i le fa’amasino sili, sa ia tu’uina atu ai loa sana poloaiga i le loia a le malo ina ia nofouta i ai, soo se taimi e poloaina ai e le fa’amasinoga le Ofisa Fa’anofovaavaaia e saili mai se faila a se pagota mai le Ofisa o Femalagaaiga, e le toe mana’omia se fasi pepa, ae mana’omia e le fa’amasinoga le faila atoa, o loo aofia ai ma le fa’aiuga a le Komiti Fa’afoe e fa’ataga ai ona nofo ma faigaluega i Amerika Samoa.