Ads by Google Ads by Google

O tagata o loo sapalaiina fualaau fa’asaina e tatau taofia toese


[ata: foa'i]
ausage@samoanews.com

Na taua e le afiogai le ali’i Fa’amasino Sili ia Michael Kruse i le vaiaso na te’a nei, i le taimi na tuuina atu ai le fa’aiuga a le Fa’amasinoga Maualuga fa’asaga i se ali’i e 24 tausaga na ta’usala i lona umia fa’asolitulafono o vaega o le pauta fa’asaina o le aisa, o i latou o lo o sapalaiina fualaau fa’asaina, gaosi, toe tulei ma fa’atau atu i isi tagata, o tagata tonu ia e tatau ona tumu ai le falepuipui, ae le o i latou o lo o taliaina.

 

“E tatau ona fa’aoo atu i le Vaega Fa’amalosi Tulafono atoa ai ma le Fono Faitulafono le manatu lenei, o le tagofia o fualaau fa’asaina, o se gasegase e tatau ona togafitia. Ae le mafai ona togafitia lea gasegase pe afai e le lava ni polokalame i totonu o le atunu’u e fesoasoani ai ia i latou o lo o a’afia i ‘auga o lenei gasegase”, o le saunoaga lea a Kruse.

 

O le ali’i o Methodist Kuka Mika, 24 tausaga le matua na ta’usala i lona umia fa’asolitulafono o vaega o le pauta fa’asaina o le aisa. O lea moliaga na afua mai ina ua maua e leoleo ia te ia i le tausaga na te’a nei se paipa tioata o lo o i ai vaega o le pauta oona o le aisa i totonu.

 

Na taua e Mika i lana fa’atoesega i luma o le Fa’amasinogae fa’apea, o ia sa avea ma Fuimu i le Vaega o Fuimu a le Ofisa o Leoleo, a o le i tula’i mai le fa’alavelave e pei ona taofia ai o ia i le toese mo le umi e silia i le 4 masina. Sa ia faailoa i le fa’amasinoga lana galuega sa faia i lona aiga, o le tausia lea o lona Tina matua e 83 tausaga le matua, atoa ai ma lona aiga atoa. Sa ia talosaga mo se avanoa e toe fo’i atu ai i lona aiga e fa’aauau lana tautua. Sa ia fa’atoese fo’i e tusa ai o lana solitulafono sa faia, ma ia talosagaina ai se isi avanoa mo ia.

 

Na talosaga fo’i lana loia ia Michael White mo se avanoa e toe fo’i atu ai le ua molia i tua e fa’aauau lana tausiga i lona aiga, ma faia se isi suiga i lona olaga. Na taua e White e fa’apea, o le fa’afitauli o le tagofia o fualaau fa’asaina o lo o a’afia ai Mika, o se fa’afitauli e mana’omia ona foia. Sa ia fa’ailoa i le fa’amasinoga, o Mika o se tagata e agava’a ona fa’asala i se fa’asalaga fa’anofovaavaaia.

 

Na lagolagoina e le loia a le malo ia Woodrow Pengelly le fa’afinauga a White, ma ia talosagaina ai fo’i le fa’amasinoga ina ia fa’anofovaavaaia ia Mika, e aunoa ma le toe tu’uina atu o se isi taimi e tuli i le falepuipui, ae ua lava le 4 masina lea na taofia ai o ia e avea ma ana fa’asalaga i lenei mataupu.

 

“O le fa’alavelave e pei ona ta’usala ai o ia, o se toe fafagu lea i lona mafaufau ina ia aua ne’i toe a’afia o ia i le fa’afitauli o le tagofia lea o fualaau fa’asaina, a ia avea o ia o se tasi e ola mama mai ia fualaau oona”, o le saunoaga lea a Pengelly.

 

Saunoa Kruse e fa’apea, e tumau pea le talitonuga o le fa’amasinoga, o i latou uma o lo o a’afia i le tagofia o fualaau fa’asaina, e mafua mai ona o se gasegase e tatau ona togafitia. O le fa’afituali o lo o maitauina i le atunu’u e pei ona taua e le Fa’amasinoga, e le o lava polokalame o lo o maua i Amerika Samoa e mafai ai ona togafiti le gasegase o lo o a’afia ai le to’atele o tagatanu’u e aofia ai ma Mika, i le tagofia lea o fualaau fa’asaina.

 

“O se tasi o tulaga na matua fa’ateia ai la maua fa’alogo ma le afioga i le ali’i Fa’amasino Lagolago ia Sala Mamea Jr ao ma fetufaa’i mo se fa’asalaga mo Mika, o le ripoti sa fa’ailoa atu e le Taitai o le Ofisa Faanofovaavaaia, fai mai o le to’atele o tagata o lo o toe molia atu i le fa’amasinoga i le le usitaia o tuutuuga o a latou nofovaavaaia ina ua mae’a ona ta’usala i latou i le umia fa’asolitulafono o fualaau fa’asaina, o i latou ia sa auai i poloakalame o aoaoga faufautua”, o le saunoaga lea a Kruse.

 

Saunoa atili Kruse e fa’apea, afai o le to’atele o tagata nei ua toe molia atu sa auai i aoaoga fa’a faufautua, lona uiga e le o i ai se aoga o nei polokalame o lo o maua i le atunu’u.

 

E 20 masina na manatu le fa’amasinoga e tuli e Mika i le toese i Tafuna, o se tasi lea o tuutuuga o lana nofovaavaaia e 5 tausaga, peita’i ua manatu le fa’amasinoga e lava le 4 masina lea ua maea ona ia tuliina e fai ma ana faasalaga i le taimi nei, ae o le a tatala o ia i tua e faatalitali ai le tuliina fa’amae’a o isi masina o loo totoe o lana fa’asalaga.

 

O le isi 10 masina o le a fa’atoa amata ona tuli i le aso 20 Aperila 2019, ma le 6 masina o lo o totoe ai o le a fa’atoa tuli i le aso 1 Iulai 2020. Ua poloaina fo’i o ia e totogi na o le $2,000 o le salatupe, ae o le isi $3,000 o le a fa’amalumalu.

 

O le agaga o le fa’amasinoga ua mafua ai ona fa’atulaga faapea le auala e tuli ai le fa’asalaga a Mika, ina ia mafai ona tulimata’i e le fa’amasinoga lona i ai i lalo o le polokalame fa’anofovaavaaia.