"Le ava lelei e, o ao se ua maua, e silisili lou tau i Penina!"

Ua fa'amama'i le afioga le Tama a le Malo Aumoeualogo Te'o Joseph Fuavai, aua o le la'ua mafutaga na amata mai ia Novema 26, 1960 lea fa'ato'a tatala i le oti ia Tesema 11, 2017 ua atoa i ai le 57 tausaga o le mafutaga i le alofa fa'amaoni o le tina o Fatuiva Allen Salave'a i lana manamea e to'atasi ma le la'ua fanau e to'a 10, ono tama ae to'afa teine.

I le toe sauniga o Fatuiva i lona aiga i Aoa, sa fa'atautaia lea i le Malumalu EFKAS i Aoa lava, ona o tulaga e la'ititi le malumalu o lana Ekalesia Katoliko i le afio'aga, na fa'atumulia i le pa'ia maualuga o Auauna a le Atua, afioga le Kovana Sili Lolo Moliga ma le Faletua, le afioga le Lutena Kovana Lemanu Palepoi Mauga, ae maise o le pa'ia lasilasi o Aiga i ona itu tetele ma ona itu taulagi. O Aiga o le afioga le Tamaalemalo ae maise o le tina fo'i ua malaga, sa auai uma aua o le a fa'afofoga fo'i i se toe fa'amafanafana a le aufaigaluega totofi mo le sauniga pa'ia, le tama Epikopo Peter Brown, Moseniolo Viane Etuale ma le aufaigaluega i le fata mo lea sauniga.

Ese mai lea, a'o se molimau fo'i i le soifua o le tina, ma le tama o le aiga. I se upu fa'ala'eiau a le afioga Moseniolo Viane Etuale sa ia ta'ua ai le taua o le tautua ma le fa'atuatuaga o Fatuiva i lona Atua.

"E le'i tuua lava e Fatuiva lana Sosaiete a le Finagalo Pa'ia o le Sacred Heart, i latou nei e le'i i le mumu ma le pa'epa'e ae tusia le ata o le fatu i o latou la'ei. E le fa'avaivai i lona nofo tatalo mo lona to'alua ma le fanau. O faiva uma sa tautua ai le tama, o lana lea tautua i le Malo o Amerika Samoa, soso'o lea ma le tautua a le fanau ina ua taliu mai ua mae'a a'oa'oga, le tama'ita'i Foma'i Fa'silitama'ita'i Dr. Annie Fuavai, lea e gasolo i ai le to'atele mo togafitiga o gasegase ua maua ai, o le tautua lava lea a le tina. Peita'i o isi e to'atele ua tofu galuega i fafo ma iinei fo'i, o lo'o avea lava lena ma pine maualuga o le soifua galue o Fatuiva i le malo ma ona tagata, aua o ia sa fa'afailele, tausi ma fa'apelepele, a'oa'o ma a'oa'i, tatalo i le Atua ia latou ola ma ia manuia, toe aoga mai. Lea, ua tali le Atua, ua alu ma le filemu Fatuiva, ae fa'aauau pea galuega lelei e le fanau ma le tama o le aiga."

"I sona mana'oga i lana fanau tamaitai, ia fa'aauau lana tautua i le Sacred Heart, lea ua gasolo mai ua le to'atasi ae ua to'atolu i latou Annie, Filoi ma isi. E ui ina laiti i latou, ae o lea ua auai mai e fa'aauau le mana'oga o si latou tina, ia sisi pea le fu'a a le Atua i le auaunaga sa auai mai ai a'o talavou e o'o mai i lenei vaitau ua tu'ua ai faiva, ae malolo."

Ina ua mae'a lelei le sauniga pa'ia, sa tu'uina loa le avanoa mo le molimau a le tama o le aiga, peita'i, sa tula'i le tofa Olomua Jack Fuiava mo lea sao, ona ua matua fo'i le tama. O lana molimau sa tusitusia lelei, ma fa'ao'o i le atali'i na te fofogaina i le aofia na poto mo le toe aso o Fatuiva i lona afioaga.

Tautua a le tina i lana Ekalesia, e le fesiligia aua na soifua a'e i ona matua tausi, William Allen Jr ma Filoi Aulava Allen i Lauli'i ma Pago Pago, ma sa lotu i le Katoliko i Lauli'i i lona soifuaga talavou se'ia o'o mai ina fa'aipoipo i le tausaga e 1960.

O lana tautua i ona aiga, o se tina osiosi i ona aiga, ma sa ia fa'amaumauina atoa le afuaga o lona soifua i ona matua moni, Sipi Salave'a o Leone ma Fa'aitu Patea Salave'a o Pago Pago. Sa ia fa'amauina ma ua fa'ailoa i lana fanau, aua e talitonu o ia i le tulaga, o so'o se tagata e i ai lona fa'asinomaga, ma e tau lelei lona gafa na tupuga mai ai i le Le'iato i Fagaitua.

I le mafutaga ma le tama o le aiga, na amata mai ina ua fa'aipoipo lelei ia Novema 26, 1960, ae fanau mai ai le ulumatua, Fa'asilitama'ita'i Annie Fuavai, i le tausaga e 1961, ma taso'o mai ai le fanau se'ia maua le to'atolu i le 1963. O le fanau mulimuli sa maua i le 1980.

O le tele o le molimau a le tama o le aiga, sa matele i le fa'afetai i aiga, ae maise le vasega o le aufaigaluega a le Atua, sui mamalu o le Malo, ma le anoanoa'i o e uma e masani ma fa'auo ia Fatuiva fa'apea fo'i o ia i so'o se faiva sa tautua ai. Fa'afetai i lo latou fa'ataua o toe sauniga o lana Penina Tautele ua tu'ua nei le mafutaga ona o le oti.

"E le'i faigofie le mafutaga, ae na faavae sa'o le mafutaga. Na fetaui i la'ua i le Senior Ball a le a'oga maualuga na a'o'oga ai, ma ua mafua ai ona masani, a'o le tama'ita'i fo'i, o le teine o le taulaga. E tasi lava le galuga sa galue ai o le fa'atauoloa i le Faleoloa o Leala, ona amatalia loa le aiga, ma fa'atuina ai lona lava faleoloa i Atua ma galue loa i ai ma fa'aa'o'oga ai le fanau. Peita'i o tautua a le tama o le aiga, ua avea ma ala o le tautua a le tina i lana vaitau i le mamalu lautele. O lana lava tautua i lana pisinisi o le faleoloa, sa aoga atu ai mo i latou uma na faigaluega ai te ia, ma i latou uma na tautuaina e ia mai lona faleoloa.”

Molimau a le fanau, "E leai so o i latou uma e sili ia lo latou tina, e tutusa lava lana fanau ia te ia. Pe sa e alofa mai ma lafo mai sana tupe, pe leai, e tutusa lava lona alofa, e mana'o ia o ane uma e fa'afeiloa'ia o ia, aua e masi'i atu fo'i ma le anoanoa'i o mea'ai e la'u atu mai le faleoloa. E leai se isi e misi i lana fa'asoa pe a malaga atu i Amerika."

Molimau Annie, "O le aso na ou o'o mai ai i Amerika Samoa ua mae'a a'oga ma ua maua fo'i la'u galuega ou te galue ai nei i le falema'i, o le aso fo'i lea na tu'u ese atu ai e Fatuiva lana galuega i le pisinisi o le faleoloa i Atu'u, ma nofo loa i le fale. Ua le toe popole i se pili o tamaiti ma le va'aiga o mea uma, ua palasi mai lea tiute ia te a'u, lea ua fo'i mai."

"I ana tusitusiga mo lona olaga ma le fa'asologa mai o ona matua sa ola a'e ai, sa fa'ai'u i sana tusi ia i matou le fanau, Pe a outou matutua, ma maua ni o outou manuia, aua ne'i galo ia te outou aiga o o'u matua o Allen ma ia le galo fo'i le aiga o Aulava. Ia osi nai ou aiga."

"E le maluelue lona agaga i lana ekalesia katoliko, lea fo'i ua aga'i atu i ai le tama o le aiga, aua e malosi lava lana finau. Peita'i, o le tama o le aiga, o se LMS lea ua EFKAS maoioi lava."

Na fa'ai'iu le molimau a le tama'ita'i foma'i, "Peita'i o le alofa o le matou tina sa ufiufia ai mea uma, o lona alofa fo'i e fa'amama'i i lo matou tama sa lautua lea i tiga uma o le mafutaga ma taimi e louloua ai le folauga. Ae o se mea lea ua eseese ai i ma'ua ma le tina, ona ou te le iloa ona taofia so'i to'alua."

Ua lagomau nei o ia i le la'ua maota i Asofitu i Nuuuli lava, ina ua mae'a lona toe sauniga i Aoa.