Nofovaavaaia le ali’i na ia fa’afefe le to’alua lona uso i le naifi

ausage@samoanews.com

O le ali’i lea na ta’usala e le fa’amasinoga i le moliaga mamafa o lona fa’aaoga fa’asolitulafono lea o se a’upega, e mafua mai i le fa’alavelave lea na ia fa’aaoga ai se tama’i naifi e fa’afefe ai le to’alua o lona uso, ua tuuina atu nei e le fa’amasinoga maualuga aso e 30 na te tuua ai le teritori, o se tasi lea o tuutuuga o lana nofovaavaaia.

 

E 2 tagi na fa’aulu e le malo fa’asaga ia Solomona Teofilo. O le tagi muanua na faila i le 2016, lea na molia ai o ia i le moliaga mamafa o le fa’aaoga fa’asolitulafono o se a’upega, o se tama’i naifi, fa’apea ai ma le moliaga mama o le fa’aoolima i le tulaga tolu.

 

O ia moliaga na alia’e mai ina ua alu atu le ua molia e fa’anoi mai le ta’avale a lona uso na te fa’aaogaina, ae fai i ai le to’alua o lona uso, e vili muamua i lona uso o loo i fafo e fa’ataga mai ai lona fa’aaogaina o le ta’avale.

 

I fa’amaumauga a le fa’amasinoga o lo o taua ai e fa’apea, a o taumafai le to’alua o lona uso e fa’aola le ta’avale, na savali atu le ua molia ma taumafai e se’i ese le ki o le ta’avale.

 

Na alu ese le ua molia ma toe fo’i mai ai ma le tama’i naifi ma tu’u i le ua o le na a’afia, ma le fa’amoemoe e fa’afefe ai o ia.

 

Na alu ese le na a’afia mai le vaega sa i ai le ta’avale, peita’i sa ia molimauina le toe aga’i atu o le ua molia ma se samala, ma sasau atu ai le ta ia te ia, peita’i e le i lavea.

 

E $5,000 le tupe na totogi e le ua molia ma tatala ai loa o ia i tua e fa’atalitali ai taualumaga o lana mataupu, ae i le amataga o le tausaga nei, na toe tula’i mai ai fo’i le isi vevesi i le va o le ua molia ma lona aiga, ma faila ai loa e le malo le tagi lona lua fa’asaga ia te ia, e mafua mai i tu’uaiga i lona faia o ni gaioiga e save’u ai le nonofo filemu o lona aiga.

 

I le mae’a ai ona faila e le malo o le latou tagi lona lua fa’asaga ia Teofilo, na fa’aleaoga ai loa e le fa’amasinoga ma tuutuuga na tatala ai o ia i tua, ae poloaina loa le toe taofia o ia i le toese e fa’atali ai taualumaga o lana fa’amasinoga.

 

I le maliliega na sainia e le ua molia ma le malo, lea fo’i na talia e le fa’amasinoga, na tali ioe ai le ua molia i le moliaga mamafa o le fa’aaoga fa’asolitulafono o se a’upega. I le talia ai e le fa’amasinoga o le maliliega a itu e lua, na talosaga ai loa le malo ina ia solofua isi moliaga o lo o totoe ai i le tagi sa latou fa’aulu.

 

Na fa’atoese ma loimata Teofilo i luma o le fa’amasinoga maualuga e tusa ai o lana solitulafono sa faia, ma ia talosaga ai mo se isi avanoa e toe fo’i atu ai i lana fanau i Amerika latou te mafuta fa’atasi.

 

Na taua e le ua molia e fa’apea, o ia na malaga mai e asi lona aiga ma fa’amalolo lona mafaufau mai le tele o galuega, ae fa’afuase’i ai ona tula’i mai le fa’alavelave e pei ona taofia ai o ia i le toese mo le 8 masina.

 

Sa ia fa’ailoa i le fa’amasinoga mea lelei sa ia faia mo le atunu’u ma lona aiga, peita’i ua fa’afuase’i ona a’afia lona olaga ina ua a’afia o ia i lenei solitulafono. Na ta’utino Teofilo i le fa’amasinoga, o ia e a’afia i le fa’afitauli o le ita gofie, e mana’omia fo’i se fesoasoani e foia ai lea fa’afitauli.

 

Na lagolago e le loia a le malo ia Robert Morris le talosaga a le loia a le ua molia ia Michael White, ina ia talia e le fa’amasinoga le fautuaga a le Ofisa Faanofovaavaaia, ina ia faasala le ua molia i se fa’asalaga faanofovaavaaia, e aofia ai ma le fa’aaoga o le umi lea na taofia ai o ia i le falepuipui e fai ma ana fa’asalaga i lenei mataupu.

 

Pau le itu faaopoopo na fa’ailoa e le itu a le malo, o fa’amaumauga e fa’atatau i moliaga eseese na ta’usala ai le ua molia i totonu o le Iunaite Setete, e aofia ai moliaga o le talepe fale, umia o fualaau fa’asaina, faatupu vevesi i totonu o lona aiga, atoa ai ma tu’uaiga o lona le usitaia lea o tuutuuga o lana nofovaavaaia, amata mai lava i le tausaga e 1979 e oo mai i le 2016.

 

O ni isi o tuutuuga o le faasalaga faanofovaavaaia a Teofilo e 5 tausaga, o lona tuli lea o masina e 20 i le toese. O le tuliina o lana faasalaga faa falepuipui, e aofia ai lona tuliina muamua o le 8 masina, o le umi fo’i lea na taofia ai o ia i le falepuipui, ae o le umi o loo totoe ai o le a taofia lona tuliina, fuafua lava i lona usitaia o isi tuutuuga o lana nofovaavaaia.

 

O se tasi o tuutuuga o lana nofovaavaaia, o lona tuua lea o le teritori ae toe fo’i atu i Amerika i totonu o le 30 aso. Afai e tuana’i aso e 30 ae o lo o i ai pea o ia i le atunu’u, o le a toe fo’i loa i totonu o le toese mo le tuliina fa’amae’a o masina o lo o totoe o lana fa’asalaga fa’a falepuipui.

 

Na fa’ailoa e le afioga i le fa’amasino sili ia Michael Kruse i le ua molia e fa’apea, o se tasi o ona tiute tauave, o le saili lea o se polokalame e fesoasoani ai i le fa’afitauli o le ita vave.

 

“Afai e te fa’aauau pea ona e a’afia i le fa’afitauli o le ita vave, e o no tula’i mai ai se isi fa’afitauli e sili atu le matuia i le lumana’i, ma i’u ina a’afia ai saogalemu a lou aiga ae sili ai lava le aafia o lou saogalemu,” o le saunoaga lea a Kruse.

 

Na fa’ailoa atili fo’i e Kruse ia Teofilo e fa’apea, “afai e moni lou naunau e saili se auala e fesoasoni ai i le fa’afitauli o le ita o lo o e a’afia ai, ia e matua galue ma saili ina ia maua se auala e foia ai lena fa’afitauli. Ua a’afia lou aiga, ua a’afia atu ai fo’i ma oe ona o lou fa’atamala.”

 

O le mae’a ai ona tuuina atu o le fa’aiuga a le fa’amasinoga fa’asaga i le ua molia, na faia ai loa ma le faaiuga e tatala ai o ia i tua i le aso Faraile na te’a nei.

 

O le afioga i le ali’i fa’amasino lagolago ia Fa’amausili Pomele ma Muasau T. Tofili na lagolagosua i le fa’amasino sili i le tuuina mai o lenei fa’aiuga.

Comment Here