E tusa ma le afa o pagota ali’i o lo o taofia i le toese i Tafuna i le taimi lea, lea ua auina atu e nofoia le falepuipui fou a le malo lea na tatalaina i le masina o Oketopa na te’a nei.

O le taeao ananafi na maua ai e le Samoa News se ripoti e fa’atatau i le amata nofoia lea e se vaega o pagota o le falepuipui fou, ma le fa’amoemoe o le a fa’asolosolo malie pea le la’uina atu o pagota e fa’amautu i le latou nofoaga fou, lea ua mae’a ona fausia i le va o le Falepuipui o Tamaiti ma le nofoaga o lo o i ai le falepuipui i Tafuna.

E lei maua mai se fa’amatalaga mai le Ofisa o le afioga i le ali’i Komesina e uiga i lenei mataupu, peita’i na fa’amaonia mai e se sui sinia o le Matagaluega o Leoleo le amata la’u o pagota e nofoia le falepuipui fou.

E silia i le to’a 60 ali’i pagota ua mae’a ona auina atu e nofoia le falepuipui fou, lea e fefiloi ai lava soo se ituaiga pagota o lo o taofia ai.

“E le o faapitoa poo a ituaiga pagota e ave i le falepuipui fou, o lo o fefiloi uma, atoa ai ma i latou o lo o tuli a latou fa’asalaga i le fa’atinoina o soo se solitulafono”, o le saunoaga lea a le sui sinia o le Matagaluega o Leoleo.

O le fa’afitauli numera tasi o lo o i ai i le taimi nei i le falepuipui fou, o le tulaga i le vevela o totonu o le fale, peita’i o lo o taumafai lava le Pulega a le Toese atoa ai ma le Matagaluega o Leoleo e tapena ni ili e fesoasoani ai i le tau fa’amalulu o totonu o le fale, ina ia fa’a faigofie ai i ali’i pagota ona nofoia.

Na fesiligia e le Samoa News le sui sinia o le Matagaluega i le mafua’aga fa’atoa nofoia ai le falepuipui fou e pagota i le vaiaso lenei, pe ona ua faia lenei suiga ona o le vaiaso fou lea ua fa’atulaga ai le asiasiga masani a le ali’i kovana ma lana Kapeneta i le falepuipui, ae na taua e le sui sinia e faapea, na mafua ona tuai lenei fesuiaiga, ona sa taumafai lava e fa’amae’a ni isi o vaega sa moomia ona faatinoina mo le falepuipui fou e aofia ai moega ma mea uma e fa’aaoga e pagota.

“Ua leva lava ona i ai le fuafuaga a le Komesina ma le Matagaluega o Leoleo e amata lona ona nofoia e pagota le falepuipui fou i le taimi na faatoa mae’a ai ona tatala, peita’i sa fa’atalitali laititi mo le fa’amae’aina o ni isi o galuega sa totoe, lea la ua mae’a, ma ua amata nei fo’i ona la’u pagota e nofoia le fale”, o le saunoaga lea a le sui sinia o le Matagaluega.

O le aso na tatala aloaia ai le falepuipui fou a le malo i Tafuna mo ali’i, na maitauina ai e le Samoa News le mausali o le fausaga fou lea ua fausia ai le toese, e le gata i le malupuipuia mai le toe sosola ese o pagota, ae o se nofoaga fo’i e mafai ona nonofo ai pagota e silia i le to’a 100.

E ta’i to’a 4 pagota i totonu o le potu, ua i ai uma fo’i masini pu’eata e mafai ai ona mata’ituina ai gaioiga uma a pagota i soo se taimi, lea o lo o fa’atonutonu atu i totonu o le Ofisa autu o Leoleo o lo o i totonu o le falepuipui fou.

O le itula e 11:30 i le aso Lulu o le vaiaso fou, Tesema 21 ua fa’atulaga ai le asiasiaga masani a le ali’i kovana ia Lolo Matalasi Moliga mo le toese i Tafuna, o se tasi o ana polokalame sa amata faagasolo mai i le 2013 ina ua fa’atoa tofia i laua ma Lemanu Peleti Mauga e avea ma ta’ita’i o le malo.