Naunau Kovana saili auala si’itia ai auaunaga vaega Fa’asalalau

ausage@samoanews.com

I le faigata ai ona tau saili e le vaega fa’asalalau a le atunu’u ni fa’amatalaga mai Fa’atonusili o Matagaluega eseese a le malo, aemaise lava i le taimi e fesiligia ai e le atunu’u i le auaunaga a le malo, na maua ai loa le avanoa e feiloa’i ai le Kovana ma le au fa’asalalau i le vaiaso na te’a nei, mo le tau sailiina o auala e foia ai lea fa’afitauli.

 

Saunoa le ali’i kovana ia Lolo Matalasi Moliga e fa’apea, o le a ia taumafai ina ia fa’ataunu’u se feiloaiga ma le au tusitala i masina ta’itasi, ina ia mafai ai ona tali ni isi o fesili o lo o fia maua ai se fa’amatalaga e tusa ai o le fa’agaioiga o le malo.

 

O le fa’afitauli e pei ona fa’ailoa e le au fa’asalalau i le kovana, o le to’atele o afioga i Fa’atonusili, e fiu e tau tuli tuli mo le tuuina mai o ni a latou saunoaga e tusa ai o mataupu o lo o fia malamalama ai le atunu’u, ae le maua lava se avanoa. O ni isi o taimi, e manatu ai ni isi o Fa’atonu e tu’u le avanoa e saunoa mai ai le kovana i mataupu e fa’atatau i a latou matagaluega.

 

E le i nofo lelei lea tulaga i le finagalo o le ali’i kovana. Saunoa Lolo e fa’apea, e mafua ona tuu atu le avanoa i Fa’atonusili e talanoa ai i le au fa’asalalau e fa’atatau i gaioiga a latou matagaluega, aua o i latou ia e sili atu ona malamalama i le tulaga o lo o i ai gaioiga a latou matagaluega.

 

Ae foliga mai o le fa’afitauli ua ia maitauina, e vave tele ona tulioso ni isi o ana Faatonusili i le au fa’asalalau pe afai o ni mataupu e lelei ma ta’uleleia ai le matagaluega, ae a o o loa i mataupu e le lelei ma ta’uleagaina ai le matagaluega, ona fiu loa lea e tau tuli tuli a ua sola sola solo.

 

Na fa’afetaia e Lolo le auaunaga a le au fa’asalalau, e ala i le fa’asalalauina o fa’amatalaga i mataupu o lo o tutupu ma fia malamalama ai le atunu’u, ina ia mafai ai fo’i ona iloa e laua ma le Lutena Kovana ia Lemanu Peleti Mauga auala e tali atu ai i le atunu’u.

 

Saunoa Lolo e fa’apea, soo se taimi lava e faitio ai le atunu’u, o iina e ta’u atu ai le ata moni o lo o tupu, ona mafai ai fo’i lea ona maua le avanoa la te fa’amanino mai ai mataupu o lo o fia malamalama i ai le atunu’u.

 

O se tasi o faitioga mai le au fa’asalalau sa tuuina atu i le ali’i Kovana, o le faigata lea ona maua o se fesootaiga ma lona Ofisa i polokalame fa’ataoto a le Kovana i vaiaso ta’itasi. O le tulaga o lo o maitauina, fa’atoa iloa lava e le au fa’asalalau ni isi o gaioiga o lo o tutupu i le malo, e pei o fa’aulufalega o galuega tetele, fa’apaiaina o le amataina o ni galuega a le malo, atoa ai ma isi lava polokalame, i le taimi e fa’asalalau mai ai i luga o le ala ata a le malo, le KVZK-TV.

 

Ua fautuaina e le ali’i Kovana le au fa’asalalau ina ia mulimulita’i i le gaioiga o lo o faia e le KVZK-TV, o le siaki lea i luga o le Ofisa o le Kovana o le kalena a le Kovana mo le vaiaso atoa, ina ia mafai ai ona maua gaioiga uma ma polokalame o lo o tutupu i totonu o le vaiaso.

 

Sa ia taua fo’i lona lagolagoina pea lea o le tulaga o lo o faia i le taimi nei, o le auai lea o le au fa’asalalau i soo se taimi e fono ai le Kapeneta, ina ia mafai ai ona fa’asalalau atu e le au fa’asalalau fa’amatalaga e fa’atatau i le auaunaga a le malo mo le fa’afofoga a le atunu’u.

Comment Here