Ads by Google Ads by Google

Naunau Jeremiah Masoli e ofo atu lana tautua mo fanau o AS


Susuga Jeremiah Malosi ma sui o le Matagaluega o Tupulaga Talavou, Tina ma Tama’ita’i e aofia ai le Fa’atonusili ia Jonathan Fanene ma sui o le Matagaluega e aofia ai J-Smooth ma Primo Manuma i le mae’a ai o se fa’atalatalanoaga ma le susuga ia Masoli i le taeao ananafi. [ata AF]
ausage@samoanews.com

O le vaiaso atoa lenei o le a fa’agasolo ai ni polokalame e aofia ai aoaoga mo fanau aoga i tulaga e feso’ota’i ma le ta’aloga o le lakapi fa’a-Amerika (Football), lea o le a fa’atautaia e le susuga ia Jeremiah Masoli ma lana au malaga e to’a 8, lea na taunu’u mai i le po anapo mai le va’alele a le Hawaiian Air.

 

O aoaoga ma mafutaga e pei ona fuafuaina e le susuga a Masoli e aofia ai le aoga lea ua fa’atulaga e faia i le Lions Park i le afiafi nei i le itula e 4-6, mo fanau aoga e amata mai i le 9 tausaga e oo atu i le 13 tausaga le matutua.

 

I se fa’atalatalanoaga ma le Samoa News i le aso ananafi, na taua ai e le susuga a Masoli lona naunau e fa’asoa lona tomai ma le iloa i le ta’aloga football fa’atasi ai ma ni isi sa latou e ta’aloga i le lakapi fa’apolofesa a Amerika (NFL), ina ia mafai ai ona fa’amanuiaina fanau aoga aemaise ai o faiaoga o loo koleniina fanau aoga a le atunu’u i lenei ta’aloga.

 

“O se moemitiga lea ua leva ona ou nofo ma a’u, o lo’u fia sau lea i Amerika Samoa e ofo mai la’u fesoasoani i fanau a le atunu’u, le atunu’u na tupuga atu ai o’u matua ma lo’u aiga, ina ia mafai ona ou fesoasoani atu i soo se auala e a’oa’o ma fa’amalosia ai le ta’aloga football i Amerika Samoa”, o le saunoaga lea a le susuga a Masoli .

 

O lea ua fai pa’aga nei le susuga a Masoli ma lana aumalaga ma le Matagaluega o Tupulaga Talavou, Tina ma Tama’ita’i (DWYA), i lalo o le ta’ita’iga a le ali’i Fa’atonusili ia Jonathan Fanene, o se tasi sa latou ta’aalo fa’atasi i le ta’aloga football i le NFL i tausaga ua mavae i Amerika.

 

Ae mo le susuga a Masoli, o loo galulue soosoo tauau o ia ma le Fa’alapotopotoga e taua o le CASEProject fa’apea ai ma le susuga ia McLeod Bethel-Thompson, o se tasi sa ta’alo i le NFL, o loo galulue e fa’alauiloa aoga mo fanau aoga i Amerika Samoa e fa’atatau i le ta’aloga football.

 

Na fa’amanino e le susuga a Masoli i le Samoa News e fa’apea, o le CASEProject o se Fa’alapotopotoga lea i Amerika e le galulue mo tupe fa’asili (nonprofit program), lea o loo galulue e fa’alauiloa le tele o aoaoga mo tupulaga e fa’atatau i le ta’aloga football.

 

“Ou te naunau e ofo atu la’u fesoasoani fa’atasi ai ma la’u au malaga e to’a 8, ina ia fesoasoani ai i mafaufau o fanau aoga i soo se auala e fa’aleleia ai aoaoga, fa’amalosia ai aganu’u atoa ai ma le unaia o le poto i ta’aloga football”, o se tasi lea o saunoaga a Masoli.

 

O le au malaga e to’a 8 lea na taunu’u mai anapo, o loo aofia ai ni faiaoga se to’atolu, ma o se tasi o i latou nei o se tama’ita’i Samoa o loo ia aoaoina tu ma aganu’u i aoga i Amerika, ma ua ofo mai fo’i lona taimi e fesoasoani ai i le polokalame.

 

O isi sui e to’afa o le au malaga e aofia ai ni isi sa ta’aalo mo le NFL, ma ua naunau uma i latou e ofo mai lo latou tomai ma le taimi e fesoasoani ai i le atina’eina o le ta’aloga football mo fanau aoga.

 

“O le agaga atoa ia mafai e nei polokalame ona suia mafaufau ma olaga o fanau aoga, ina ia taula’i ai lo latou iloa, malosi ma le poto i ta’aloga ma aoga, nai lo le fa’ama’imau i isi vaivaiga fa’atauva’a o le olaga. O le au malaga fo’i lea ua taunu’u mai, o le a fesoasoani malosi i aoaoga o le a fa’agasolo i aoga eseese i le atunu’u i lenei vaiaso, ma ua fa’amoemoe e le gata o le a fa’amanuiaina ai fanau aoga ae o le a fa’amanuiaina ai fo’i faiaoga”, o le saunoaga lea a Masoli.

 

O ni isi o vaega o le polokalame e pei ona fa’atulaga mo le vaiaso nei e aofia ai Aoga, koleniga e fa’atatau i le ta’aloga football, mafutaga (camps), semina mo faiaoga football, atoa ai ma isi lava polokalame eseese o le a to’atele fanau aoga e fiafia i ai.

 

“O le tomai sa maua mai i le ta’aloga football atoa ai ma aoaoga sa i ai, o le a fesoasoani malosi lea i le fa’aleleia atili o lenei polokalame”, o le saunoaga lea a lenei alo o le atunu’u.

 

O le susuga a Malosi na soifua a’e i San Francisco i Kalefonia, lea na aoga ma fa’au’u mai ai, ae o ona tuaa e malaga mai i Amerika Samoa nei i le afioaga o Iliili ma Taputimu.

 

Na taua e le afioga i le ali’i fa’atonusili ia Fanene lona fiafia tele e tatala atu le avanoa latou te galulue fa’atasi ai ma Masoli, i le unaia lea o polokalame e fesoasoani ai i olaga o tupulaga talavou i le atunu’u.

 

I le avea ai o Fanene o se tasi o tama fanau a Amerika Samoa sa taalo mo le NFL i le tele o tausaga, sa ia taua ai lona fa’anaunauga ina ia to’atele pea alo ma fanau a le atunu’u e maua le avanoa e ta’aalo ai i le NFL, e le gata e fa’alautele ai le iloa i le ta’aloga ae maua ai fo’i auala e fesoasoani ai i aiga.

 

O le mae’a ai o le polokalame ua fa’atulaga mo le afiafi o le aso, ona sosoo ai loa lea ma le polokalame e faia i le aoga maualuga a Fagaitua i le aso Lulu o le vaiaso nei, sosoo atu ai ma le polokalame i le aoga maualuga a Samoana i le aso Tofi, o le aso Faraile mo aoga maualuluga a le Poly Tech ma Tafuna, o le mafutaga tu’u fa’atasi e faia i le malae ta’aalo i Tafuna i le aso Toona’i, ma fa’ai’u ai loa i le aoga maualuga a Leone i le aso Gafua o le vaiaso fou, ma toe malaga atu ai loa le au malaga i le po o le aso Gafua o le vaiaso fou i Amerika.