Ads by Google Ads by Google

Musu se ali’i pagota e tula’i i luma o le fa’amasinoga

ausage@samoanews.com

Na avea le musu o se ali’i pagota e sau i le fa’amasinoga mo lana iloiloga ma itu na sainia ai e le afioga i le ali’i fa’amasino ia Fiti Sunia se poloaiga ananafi, e poloaina ai le Komesina o Leoleo, Pule o le Falepuipui i Tafuna, fa’apea ai ma le Leoleo sa tu’u atu i ai le poloaiga e pu’e fa’apagota mai ai le ali’i pagota, ina ia oo atu i luma o le fa’amasinoga e fa’amanino le mafua’aga ua le mafai ai ona tula’i le ali’i pagota mo lana mataupu.

O le aso Lulu na te’a nei na fa’a kalena ai e le fa’amasinoga le mataupu a le ali’i pagota ia Michael Agasiva e tatau ona fofogaina ai, ae ina ua le tula’i o ia i le taimi e pei ona fa’atulagaina, na toe fa’a kalena ai loa e le fa’amasinoga lana mataupu e toe fofogaina i le taeao ananafi, peita’i sa tumau pea le le oo atu o Agasiva i luma o le fa’amasinoga.

Na taua e se molimau fa’atuatuaina i le Samoa News le musu o Agasiva e sau i le fa’amasinoga mo lana iloiloga, e ui ua mae’a ona oo atu i ai Leoleo e tu’u aloaia atu i ai le tusi saisai (arrest warrant) e pu’e fa’apagota mai ai o ia.

Ina ua toe valaau le mataupu a Agasiva i le taeao ananafi, na toe fa’ailoa ai fo’i e lana loia fautua ia Mathoni McCormick le tumau pea lea o le musu o le ua molia e oo atu i luma o le fa’amasinoga mo lana iloiloga, ae ina ua fesili le afioga i le ali’i Fa’amasino ia Sunia i le loia a le malo i se gaioiga a le malo ua faia ina ia mafai ai ona oo atu le ua molia i luma o le fa’amasinoga, na tali le loia a le malo, “o loo matou taumafai pea”.

Na si’itia e le itu a le malo vaega o le tulafono o lo o lima ta’ita’iga ai auala ma ta’iala e fa’atinoina ai mataupu fa’apenei. Sa ia taua fo’i e fa’apea, o loo manino Tulafono ma Ta’iala mo mataupu fa’a fa’amasinoga, o le taimi lava e sainia ai e le fa’amasinoga le poloaiga e pu’e fa’apagota ai se tagata, e tatau loa ona galulue le malo ma Leoleo e saili le tagata ina ia auina mai i luma o le fa’amasinoga i le aso e sosoo ai.

Ae talu ai o le fa’afitauli o loo tula’i mai i le mataupu a Agasiva, atoa ai ma le amanaia lea e le malo o ona aia tatau i lalo o le tulafono, ua talosagaina ai e le malo le fa’atali o le fa’amasinoga seia atoa aso e 13 e tatau ona oo mai ai le ua molia i luma o le fa’amasinoga mo lana iloiloga, afai loa e leai, ona fa’aaoga loa lea o se isi malosi i luga atu.

Saunoa le afioga a Fiti e fa’apea, o le taimi na sainia ai e le fa’amasinoga le poloaiga e pu’e fa’apagota mai ai le ua molia, o le taimi fo’i lea ua poloaina ai le Komesina o Leoleo ina ia fa’atinoina loa le poloaiga e sailia mai ai le tagata ua molia, o le malosiaga lava fo’i lea o loo tu’uina atu i le Leoleo na te fa’atinoina le galuega.

“O i ai se Komesina o Leoleo a le malo i le taimi nei”, o le fesili fia malamalama lea a le afioga ia Sunia, ae na tali ali’i loia a itu e lua, “Pei uma lava o lo o i ai le Komesina le tumau”, o le tali lea a loia na taua ai loa e le afioga a Sunia lona sainia o se poloaiga e poloaina ai le Komesina le tumau o Leoleo ua i ai, o le Pule o le Falepuipui i Tafuna, atoa ai ma le Leoleo sa tu’u atu i ai le pu’e fa’apagotaina mai o Agasiva, ina ia oo atu i luma o le fa’amasinoga i le taeao nei e fa’amanino atu le mafua’aga ua le mafai ai ona tula’i Agasiva i luma o le fa’amasinoga mo lana mataupu.

O Agavisa o loo tuli sana fa’asalaga fa’a falepuipui e 5 tausaga i le toese i Tafuna, e mafua mai ina ua ta’usala o ia e le fa’amasinoga maualuga i le moliaga o le fa’ao’olima i le tulaga lua i le 2011, e mafua mai i le fa’alavelave lea na ia fa’aaogaina ai se agaese e fa’aoo ai manu’a i se isi ali’i i le aso 29 Setema 2009.

E le o manino lelei i le Samoa News poo le a tonu moliaga fou ua toe faila e le malo fa’asaga ia Agasiva, lea ua mafua ai ona mana’omia o ia e tula’i i luma o le fa’amasinoga fa’aitumalo.