Ads by Google Ads by Google

Molimau le tamaititi e 9 tausaga fa’asaga i lona Tama

ausage@samoanews.com

O le molimau lona lua na valaau e le itu a le malo i le ulua’i aso o le fa’amasinoga autu a le susuga ia Mataupu Mamona, lea o loo tu’uaia i le fa’alavelave lea na maliu ai lona faletua i le masina o Fepuari 2016, o lona atali’i lea e 9 tausaga le matua, o ia fo’i lea o loo avea ma molimau autu a le malo mo lenei mataupu.

 

O le mae’a ai ona fa’atauto o le tamaititi i luma o ali’i fa’amasino le vaega iloilo iuga, na ia fa’amatala ai loa mea uma sa ia vaai i ai, amata mai lava i le taimi na tula’i mai ai se taugaupu i le va o ona matua, seia oo lava i le taimi na fa’aaoga ai e lona Tama le uaea uliuli e titina ai le ua o lona Tina, e pei fo’i ona tu’uaia ai o ia e le malo.

 

Na taua e le tamaititi i lana molimau e fa’apea, o se pasese a lona Tina e alu ai e faigaluega le mafua’aga na tula’i mai ai se tauga upu i le va o ona matua, ma ia vaaia ai le ita o lona Tina ma aga’i atu ua kiki le faitoto’a o le potu, sosoo ai loa ma le savali atu o lona Tama ma fasi loa lona Tina, ina ua mae’a, sa oso lona Tama i lana ta’avale ma alu ese loa.

 

Na toe fo’i mai lona Tama ma fa’aauau le fasiga o lona Tina, sosoo ai loa ma le aumai e lona Tama o se maea uliuli ma nonoa i le ua o lona Tina seia oo lava i lona vaai atu ua mole lona Tina ua le mafai ona toe manava.

 

Na fesili le loia a le malo ia Gerald Murphy i le molimau, pe na fa’afefea ona ia iloaina uma nei gaoiga sa faia e lona Tama, ae na tali le molimau, o se pu i le faitoto’a o le potu a ona matua, na mafai ai ona ia iloaina atu gaioiga uma a lona Tama sa faia.

 

Sa taua fo’i e le molimau le fai atu o lona Tama ia te ia, na te fasia o ia pe afai na te ta’uina i se tagata le mea sa tupu. Na taua atili e le tamaititi lona vaaia o mata o si ona Tina ua aliali mai lanu papa’e.

 

Ina ua mae’a gaioiga sa faia e lona Tama, na taua ai e le tamaititi le tago atu o lona Tama ua sui ofu o lona Tina, ona ia fai atu lea ia te ia e alu e aumai se vai aisa, ae o le taimi fo’i lea na vili ai loa e lona Tama le ta’avale a le falema’i mo se fesoasoani.

 

Na taua atili fo’i e le molimau e fa’apea, na fa’ailoa e lona Tama i sui o le EMS i le taimi na taunu’u atu ai i le fale, o lona Tina o loo maua i le ma’i sela, ae ina ua fesili Murphy i le molimau pe sa ma’i sela lona Tina, tali le molimau “e leai”.

 

O tagata na taua e le tamaititi sa ia fa’ailoa i ai le fa’alavelave na tupu i lona Tina, e le gata o ona tausoga, o ana uo i le aoga ae fa’apea ai fo’i ma le Faiaoga, o ia lea na logoina le Ofisa o Leoleo e uiga i lenei mataupu.

 

E lei umi se taimi na fesiligia ai e le loia a Mamona le molimau a le malo ae mae’a lona lana molimau.

 

Na fesili le loia a Mamona o Douglas Fiaui i le molimau, pe aisea na ia le taua ai lona Tama o se tasi o lona aiga, ina ua fesiligia o ia e le loia a le malo poo i ai ni isi o lona aiga i totonu o le potu faamasino, ae na taua e le molimau e fa’apea, na mafua lana tali lea ona sa faatonu o ia e lona grandfather.

 

Na toe fesili Fiaui i le molimau poo ai uma tagata sa ia ta’uina i ai le fa’alavelave sa tupu, ae na tali le molimau, o ona aunties, uncles, o ona tausoga fa’apea ai ma le faiaoga.

 

Na taua muamua e le tamaititi i se tasi o vaega o lana molimau ina ua fesiligia o ia e Fiaui, o le aso To’ona’i na tula’i mai ai le fa’alavelave, peita’i ao fa’agasolo pea le fesiligiaina o ia, na ia toe fa’asa’o ai lana molimau, e le o le aso Too’ona’i na tula’i mai ai le fa’alavelave i lona Tina, o le aso Tofi.

 

O le itula e 9:00 i le taeao nei lea ua faamoemoe e toe fa’aauau ai le iloiloga o lenei mataupu.