Molimau i le Tautua: Tui Perekina Enesi


O se vaaiga i le uso ma nisi o nai ona tei o le tama’ita’i faia’oga Tui Enesi i lona toe sauniga i lona aiga, sa faia lea i le Malumalu o Siona le Mauga Paria i Leone EFKAS i le vaiaso ua te’a. [ata: Leua Aiono Frost]

O se va’aiga i se tasi o ona tausoga ma o ia sa taina vi’iga o toe sauniga o si ona tausoga o Tui Enesi i le vaiaso ua te’a i Siona le Mauga Pa’ia EFKAS - Leone. [ata: Leua Aiono Frost]

“Ao Oe la’u auauna, o oe Iakopo e, le na ou filifilia, o le fanau a Apera’amo la’u uo, …. Aua e te fefe, aua ou te ia te oe, aua le fetepatepa’i, aua o a’u lou Atua, ou te fa’amalosia oe, e moni ou te taofia oe i lo’u lima taumatau e i ai le amiotonu.” Isaiah 41: 8-10.

 

O upu tomua ia o le tula’i ai o lana auauna, Pr Enesi Enesi e ta’ita’ia le sauniga mo le Aiga o lona tuafafine pele - Tui Perekina Enesi, lea sa loa foi tausaga o avea ma faia’oga, ona si’itia lea e galue mai le Ofisa Autu o le Matagaluega o A’oga a le Malo i le vaega o Sikolasipi a fanau aoga ma tu’umalo ai nei o ia.

 

O lea sauniga sa i ai molimau sa latou toe tepa i le mafutaga mafana ma le tama’ita’i faia’oga, ma sa latou toe fa’ailo ma fa’amanatu mai ona uiga tausa’afia, o lona tagata soifua tautua ma lana auaunaga foi i lona Atua.

 

“O le tama’ita’i e soifua fiafia, e le fa’anoanoa ma e agaga tele i le fanau talavou a lona aiga ae maise le afio’aga o Leone. O se tasi ua iloga lona soifua fesoasoani i tagata e ala lava i ana taleni, ae maise o le auaunaga i le EFKAS i Leone. O lana taleni e ese mai lona fiafia e fesoasoani i le fanau talavou e faufautua i o latou lumana’i ma fuafuaga fai ina ia sologa lelei le latou tausinioga ia soifua manuia, o lona fiafia lea e fa’avasega fugala’au mo so’o se ituaiga o teu matagofie. O ia sa ofo lava e fa’aauau le auaunaga a lona tina, ina ia tuia teu matagofie mo le malumalu o le Atua i le afio’aga i Ekalesia Katoliko ma le EFKAS,” o se molimau lea a Pr. Enesi.

 

I se molimau a lona uso, Makerita, sa tula’i ai ina ia faia lana molimau e tusa o le soifua o Tui, i ona toe taimi sa si’ima’i atu ai i Hawaii mo ona togafitiga. “O ona toe taimi e le’i fa’aalia lava e ia se fa’anoanoa po’o se tiga ia i matou sa i ai ma ia. Peita’i, sa va’aia le malosi o lona loto, ma ua ia fa’ailoa mai, ua mae’a faia lana filifiliga, ia taofia uma vaila’au ma togafitiga o ia, ae ua sauni lava o ia mo lana malaga.”

 

“O se tasi e talitiga, e leai lava so matou tigaina i le tausiga o ia, peita’i, ua matou iloa lava ua latalata i ona toe taimi, aua ua mana’o e te’a i tua i le matou fale i Hawaii e tausia ai o ia, aua ua le toe i ai ni togafitiga a le Falema’i e mana’o e toe talia e ia. Ua ia fa’ailoa mai, ‘ua tau’ave e Iesu ou tiga uma,’ ua ou sauni fo’i mo la’u malaga.”

 

O lea fo’i se molimau a le susuga le Faife’au sa latou mafuta i Hawaii i le tele o taimi sa faia ai ana toe talavai, Rev. Dr. Fa’afetai. “O Tui e matua ese lona soifua fa’atuatua, e le’i toe fesiligia e Tui ni uiga o tiga tau le tino i ona toe taimi ae ua ia fai mai, ua ou sauni lava mo la’u malaga, e ao ina ou alu fiafia i lo’u Ali’i. E leai se taimi e te asiasi atu i ai e le o nofonofo mai i luga o lona moega, ma ataata mai, ma lana fesili ma le talanoa e le foliga mai o se isi o ma’i tigaina. Ua iloga le olaga o le tagata o lo’o alu fiafia ua leva ona tapena mo lona toe taimi. E fesili i mea uma o fai i lona aiga, ma talatalanoa e leai se mea e mamafa i lona loto. Ua atagia ana galuega lelei, i lona soifua fiafia ma le matagofie, ma ua le fa’anoanoa lava ae fiafia e talia le vala’au.”

 

I le molimau a se tasi o tama o le aiga potopoto ma e galulue i le Ekalesia Katoliko i Leone, sa ia fa’ailoa ai lona fa’anoanoa, “O le a le toe matagofie fo’i teuteuga o le malumalu Katoliko i Leone, aua ua motu nei le avei, ua gasolosolo ao o le lagi aua ua alu lava le ‘au’auna o le a le toe vaaia ona foliga laumata fiafia, ma ua mou atu ai fo’i ma lana tautua matavela i lenei ekalesia. E i le Atua lava lona taui e tele, ma ua tautala foi galuega lelei a lenei alo o le afio’aga ma aiga i lenei ituvai o le tovine a le Atua, a’afetai tele Tui Enesi mo lau tautua.”

 

O le molimau mai lona tuagane sa ia fa’ailoa ai, “O lenei le tama’ita’i o le matou aiga sa fofoa ane lava lona soifuaga talavou i Vaivase, Samoa i le Ekalesia Fa’apotopotoga Kerisiano i Samoa, ma a’oga ai i le Kolisi o Samoa ma fa’aiu manuia ai.”

 

“Mai le iva o ona tausaga, sa molita’i ai o ia i Samoa e a’oga ai ma sa amata i le a’oga fa’aitumalo i Vaivase Primary School, peita’i na o’o loa i le tausaga 12 o lana aoga, su’e loa i le suera a le Malo o Samoa e maua ai se kolisi e fa’aauau ai lana a’oga. Na ausia lelei e Tui Enesi maka maualuluga e a’oga ai i le Kolisi o Samoa.”

 

“Na uma lelei lava tausaga o lana a’oba i le Kolisi o Samoa fa’ato’a sipela loa e Tui Perekina le tatou malo e aga’i mai i ai. O le tama’ita’i lava e fa’alagi o le tama’ita’i mai Upolu. E tele fo’i ina taliu atu Tui ma oso mananaía o televise, lavalava ma mea matagofie e momo’o i ai matou i si matou malo, mai le motu o meleke nei.”

 

“E i ai taimi e iloga ai le toa o lenei tama’ita’i, e oso fo’i o ia i fusuaga a tama pe a va’ai atu ua tau faaletonu mai i matou tama i matou misaga. O se tama’ita’i  fai aiga lelei, e alofa ia i matou ona tuagane ma ona uso i le mafutaga fa’aleaiga. E to’atele i latou na manatu e fia mafuta ma ia, peita’i, sa ia le tali ina ia avea o ia ma se faletua.”

 

“O lea fo’i se molimau tau lona soifua ma fanau a ona uso ma tuagane i totonu o le lotoifale i Leone. E nanau ia te ia loto o fanau a ona uso ma tuagane, e iloga lona loto fesoasoani i le fanau talavou ina ia gafatia e i latou ona pasi a’oa’oga maualuluga. E tele taimi sa manatu ai i matou o le a avea ma faletua i le galuega ona o ali’i sa latou paau atu i ona matua ina ia avea o ia ma latou ava. Peita’i sa ia fa’ailoa, e le aoga lea ia te a’u, aua e leai se isi e faia teu ma isi fe’au tau le lotoifale o lona aiga, pe afai ole a alu ese atu e amatalia lona aiga.

 

E to’atele i latou sa molimauina lona fa’amaoni i tiute fa’afaiaoga, i ona tiute fo’i sa ia tautua ai i le Ekalesia i tofi sa tutulai ai.

Comment Here