Molia se tama’ita’i faigaluega i le ASPA i le gaoi


[ata: archive]
ausage@samoanews.com

Ua tu’uaia nei e le malo o Amerika Samoa se tama’ita’i sa avea ma tagata faigaluega o le Pulega o le Eletise ma le Suavai a Amerika Samoa (ASPA) i le motu o Aunu’u, i moliaga mamafa e 2 o le gaoi atoa ai ma le ave faagaoi o ni vaega tupe sa tu’uina atu i lalo o lana vaavaaiga, e mafua mai i le fa’alavelave lea ua leiloa ai se vaega tupe a le ASPA e lata i le $20,000.

 

O le alia’e mai ai o lenei mataupu i fa’amaumauga a le Ofisa o le ASPA i Aunu’u, na fa’agasolo ai loa su’esu’e fa’alotoifale a le Ofisa e uiga i le fa’alavelave ua tupu, ma i’u ai loa i le tu’uina atu o lenei mataupu i luma o le Ofisa o Leoleo mo su’esu’ega atili, ma fa’ai’u ai loa i le faila e le malo o le latou tagi fa’asaga ia Makerika Leituane i luma o le fa’amasinoga.

 

E pei ona taua i fa’amaumauga a le fa’amasinoga e fa’apea, o tiute tauave a le ua molia ao galue ai i le Ofisa o le ASPA i le motu o Aunu’u, o lona fa’amaopoopoina lea o vaega tupe uma e totogi atu e tagata Aunu’u mo le fa’aaogaina o le eletise e ala i le ‘debit meter’.

 

Na umi se taimi e lei toe maua mai e le Ofisa autu a le ASPA ni fa’amaumauga mai le latou Ofisa i Aunu’u i tulaga o tupe o loo maua mai le tautua a le Ofisa, ma mafua ai loa ona fesiligia e le Ofisa le ua molia e tusa ai o tupe ma fa’amaumauga, peita’i na fa’ailoa i ai e le ua molia i le latou Ofisa, sa osofaia e ni tagata lona Ofisa i Aunu’u ma ave fa’agaoi uma ai vaega e pei ona fesiligia.

 

E leai ma ni fa’amaumauga e fa’atatau i ‘debit card’ poo pepa fo’i ia e valuvalu na mafai ona toe maua, e oo lava fo’i i se tupe mai le vaega tupe atoa na iloa mai e $18,050, e leai ma se vaega o nei meatotino a le ASPA ma mafai ona toe maua.

 

A o fa’agasolo pea su’esu’ega e uiga i lenei mataupu, sa toe suia le fa’amatalaga a le ua molia ma ia ta’utino ai le mea moni, i lona fa’aaogaina lea o se vaega o lenei tupe, ma ua ia sauni fo’i e toe totogi le paleni o loo mana’omia.

 

E lei manatu Leituane e fa’ataunu’u lana ulua’i iloiloga i luma o le fa’amasinoga fa’aitumalo, ae ua ia manatu e tu’u sa’o atu loa lana mataupu i luma o le fa’amasinoga maualuga e fa’agasolo ai lana ulua’i iloiloga, ma fa’atulaga ai loa se aso e faia ai lona fa’amasinoga autu ma le fa’amoemoe e fa’amuta aloaia ai tuutuuga uma o lana mataupu.

 

Na teena e le ua molia tu’uaiga fa’asaga ia te ia, ina ua tula’i i luma o le fa’amasinoga maualuga i le aso Faraile o le vaiaso na te’a nei, ma ua toe taofia nei o ia i le toese i Tafuna ina ua le mafai ona ia totogi le tupe e $10,000, e fa’atali ai le isi ana iloiloga lea ua fa’atulaga e faia i le amataga o le masina o Aperila.

 

Afai ae mafai ona tatala o ia i tua, ua poloaina o ia e le fa’amasinoga maualuga ina ia aua ne’i ona toe taumafai e fa’afeso’ota’i molimau a le malo, aua fo’i ne’i ona toe solia se tulafono, a ia avea o ia ma tagatanu’u lelei e tausisi i tulafono uma a le malo.

 

O le moliaga o le gaoi fa’apea ai ma le ave fa’agaoi o ni tupe poo ni meatotino sa tu’uina atu i lalo o lau vaavaaia, o se solitulafono C lea i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, poo le fa’asala fo’i i le salatupe e le silia il e $5,000, po o le fa’asala fo’i i fa’asalaga uma ia e lua.

Comment Here