E tasi le moliaga mamafa o le faia o taupulepulega poo faamaumauga tau fa’asese fa’asaga i le malo, ua molia ai se tagata faigaluega a le malo.

O le masina na te’a nei na pu’e fa’apagota ai e Leoleo ia Angelo Langkilde, ae ua toe tatalaina nei o ia i tua i le mae’a ai lea ona ia totogi o le tupe e $10,000 na faatulaga e le fa’amasinoga e tatala ai o ia i tua ao fa’agasolo ai taualumaga o lana mataupu.

O le moliaga mamafa e tasi lea ua tu’uaia ai Langkilde, o le vaega C lea o solitulafono mamafa, e mafai ona fa’asala ai se tasi i le toese mo le umi e le silia i le 7 tausaga, poo le fa’asala i le salatupe e le silia i le $5,000, poo le fa’asala fo’i i fa’asalaga uma ia e lua.

O Langkilde, o se tagata faigaluega a le ofisa o le Sports Complex a le malo o  Amerika Samoa, o loo tuuaia o ia i le sese o le ripoti sa ia faila i le Ofisa o Taui o Tagata e Manunu’a i galuega, ma ia taua ai le manu’a o lona aao ao fa’atinoina ai ona tiute i totonu o le malae ta’alo a le Veterans Stadium i Tafuna.

O le fa’aiuga o lenei talosaga e pei ona taua e le malo i le latou tagi, na mafua ai ona maua e Langkilde se vaega tupe e silia i le $100,000.

Ae tusa ai o suesuega a le malo e uiga i lenei mataupu, o lo o taua ai ni fa’amatalaga mai ni isi o tagata faigaluega e galulue fa’atasi ma le ua molia i le Sports Complex, lea o loo latou taua ai le pepelo o le ripoti a le ua molia sa tuuina atu i le Ofisa o Taui mo i latou ua manunu’a.

O tagata faigaluega e to’atolu sa mafai ona fesiligia e Leoleo i le taimi na suesueina ai lenei mataupu, e aofia ai Lotoleaga Lepa, Tuli Fa’aola ma Satia Grey.

O le ulua’i iloiloga o le mataupu a Langkilde i lumao le fa’amasinoga faaitumalo i le vaiaso na te’a nei, na mafai ai ona faailoa e le molimau autu a le malo, le alii leoleo ia Det. John Seumanutafa sa suesueina lenei mataupu, fa’amatalaga e tusa ai lana suesuega sa fa’atinoina.

Na taua e Seumanutafa i lana molimau i le taimi o le ulua’i iloiloga sa faia i luma o le afioga i le ali’i Fa’amasino ia Fiti Sunia e fa’apea, e tusa ai o fa’amatalaga sa ia maua mai i tagata faigaluega e to’atolu sa ia fesiligia, sa latou taua ai le le moni o le ripoti sa tuuina atu e le ua molia i luma o le Ofisa o Taui mo Fa’alavelave.

Na taua e Lepa i Leoleo e fa’apea, o ia sa fesoasoani i le ua molia i le saunia o lana ripoti, ae ina ua mae’a ona ia fesoasoani ia Langkilde, sa ia tuuina atu ia te ia le $200 ma fa’afetai atu e tusa ai o lana fesoasoani i lana ripoti.

Na taua e Lepa i Leoleo, na te iloa lelei lava e le moni faamatalaga o loo i totonu o le ripoti, na te mautinoa fo’i e le i lavea le aao o Langkilde i totonu o le galuega, ae na lavea i tua i lona aiga.

Na taua e Fa’aola ina ua fesiligia e Leoleo e fa’apea, a o i ai Langkilde i atunuu i fafo, sa vili atu i lana telefoni ma fai atu ia te ia, afai e fesili ane se tagata o le malo ia te ia e uiga i lona vae, ona fai lea i ai o lona vae sa lavea i le galuega.

Na oo lava foi i le fa’amatalaga a le alii o Grey na tuuina atu i Leoleo, sa ia taua ai le fa’atonu o ia e le ua molia ina ia pepelo i lana molimau, o lona vae na lavea i le galuega.

Mulimuli ane ina ua fesiligia e le loia a Langkilde ia deSaulles ia Grey e tusa ai o lana fa’amatalaga sa tuuina atu i le Ofisa o Taui o Fa’alavelave, na taua ai e Grey e fa’apea, e moni sa lavea le aao o Langkilde i totonu o le tausaga i se taimi o le masina o Aperila 2016.

Sa ia taua atili fo’i lona manatuaina o le taimi na lavea ai le aao o le ua molia, e le gata sa ia fesoasoani e aveese le laupapa sa pipi’i ai le fao lea na lavea ai lona aao, ae sa ia fa’aaoga fo’i le faga’au e fufulu ese ai le toto sa tafe mai i lona aao.