Ads by Google Ads by Google

Molia se ali’i Leoleo i le fa’aoolima tulaga tolu ma le fa’atupu vevesi


[ata: archive]
ausage@samoanews.com

E 2 moliaga mama tu’uaia ai nei e le malo le ali’i Leoleo ia Semi Sago, e mafua mai i se fa’alavelave na tula’i mai i le masina o Iuni o le tausaga na te’a nei, lea o lo o tu’uaia ai o ia i lona fa’ao’olima lea i se isi ali’i ao faia ona toniga Leoleo.

 

E ui o le fa’alavelave e pei ona tu’uaia ai e le malo ia Sago o loo taua sa tula’i mai i le aso 21 Iuni 2016, peita’i o le taeao ananafi na fa’atoa tula’i ai Sago i luma o le fa’amasinoga fa’aitumalo e ala i se Tusi Samania, ma ia teena ai tu’uaiga fa’asaga ia te ia.

 

O moliaga mama e lua o lo o tu’uaia ai e le malo ia Sago e aofia ai le fa’atupu vevesi i nofoaga faitele, atoa ai ma le fa’ao’olima i le tulaga tolu.

 

I le aso 21 Iuni 2016 pe tusa o le itula e 3:30 i le afiafi, na taunu’u ai le tagi a le ali’i na a’afia i le Ofisa o Leoleo fa’asaga ia Sago, ma tofia ai loa le ali’i Leoleo ia Time Loia na te su’esu’eina lenei mataupu.

 

Na taua e le ali’i na a’afia i Leoleo e fa’apea, i le taeao o le aso e pei ona taua, sa alu ai i le fale inisinia a se tasi o ana uo, ae alu atu o lo o tu mai ai ma Sago. Na fesili Sago i le ali’i na a’afia poo fea ana uo ia sa latou tau vevesi i le aso ua mavae, ae na tali le ali’i na a’afia, ua toe malaga uma i Upolu le ana uo o loo ia fesiligia.

 

Na fesili Sago i le ali’i na a’afia pe fia fusu ia te ia, ae na tali le ali’i na a’afia e leai, ona o loo fai lona toniga Leoleo, o le taimi lea na fa’afuase’i ai loa ona tula’i atu le ua molia e pei ona taua i fa’amaumauga a le fa’amasinoga ma ia tu’iiina loa le mata o le ali’i na a’afia, ma tuli oso atu ai loa isi ali’i sa i ai e aofia ai ma le ali’i leoleo sa to’alua atu ma Sago ma vaovao le vevesi.

 

Na taua e se tasi o molimau sa i ai i le taimi na tula’i’ mai ai le fa’alavelave i Leoleo, lona vaaia o Sago o ia tu’iina foliga o le ali’i na a’afia ao faia ona toniga Leoleo i le taimi lea, lea na ia oso atu ai loa ma taumafai e vaovao le vevesi.

 

Ina ua fesiligia e Leoleo le isi ali’i leoleo sa to’alua ma Sago i le taimi na tula’i mai ai le fa’alavelave, na taua ai e le ali’i leoleo lea e fa’apea, o ia sa i totonu o le ta’avale a Leoleo sa la malaga atu ai ma Sago, o loo talanoa i lana telefoni, ae ona fa’alogoina loa talanoaga a Sago ma le ali’i na la vevesi, peita’i sa le’i alu tele i ai lona mafaufau ona sa i ai lona manatu ai o ni la tala ula o loo faia, ae ina ua ia fa’alogoina le faifai tetele i luga o leo o Sago ma le ali’i na a’afia, na mafua ai loa ona ia faliu e vaai, ae fetaui loa ma lona iloaina atu o Sago u aia tu’iina le ali’i na a’afia, ma ia oso atu ai loa ma vaovao le vevesi.

 

Na teena e Sago moliaga fa’asaga ia te ia i le aso Faraile na te’a nei, ma ua tolopo e le afioga i le ali’i fa’amasino o le fa’amasinoga fa’aitumalo ia Fiti Sunia lana mataupu e toe fofogaina i le aso 16 Me. A o fa’aauau ai pea le tatalaina i tua o Sago, ua poloaina o ia e le fa’amasinoga ina ia aua ne’i ona toe taumafai e fa’afeso’ota’i molimau a le malo o lo o taua i fa’amaumauga a le fa’amasinoga e aofia ai ma le na a’afia i lenei mataupu.

 

O le ali’i loia ia Woodrow Pengelly o loo tula’i mo le itu a le malo, ae o le ali’i loia ia Marcellus T. Uiagalelei o lo o tula’i mo Sago.

 

E le o se taimi muamua lenei ua tula’i mai ai ni mataupu fa’apenei e tu’uaia ai ni isi o Leoleo i lo latou fa’ao’olima i tagatanu’u lautele, a o laei le toniga a Leoleo.

 

E to’alua ni ali’i Leoleo na ta’usala e le fa’amasinoga fa’aitumalo i ni nai tausaga ua mavae atu i le moliaga o le fa’ao’olima i le tulaga tolu, e mafua mai i mataupu sa tutupu i ni taimi eseese, lea na la fa’ao’olima ai i ni tagatanu’u o le atunu’u.

 

O le isi ali’i Leoleo sa ia fa’ao’olima i se ali’i pagota na fiu e fa’afilemu ae sa fa’aauau pea le pisapisao ona o le ova o le ‘ona, ae o le isi ali’i Leoleo sa ia fa’ao’olima i se ali’i ave pasi i luma o le kamupani a le StarKist Samoa, ma poloaina ai e le afioga i le ali’i fa’amasino sa i ai i lea vaitaimi ia John Ward II le taofia o i laua i le toese i Tafuna mo ni aso, ona o le matuia o gaioiga sa laua faia.

 

O se tasi o ia ali’i Leoleo e le o toe galue o ia i le galuega fa’a Leoleo e oo mai i le taimi nei, ae o le isi ali’i Leoleo sa mafai ona toe fa’a faigaluegaina o ia seia oo mai i lava i le taimi nei.