Ads by Google Ads by Google

Molia se ali’i i lona fa’apapa o se fana i le po o le Super Bowl

ausage@samoanews.com

O le vaiaso nei lea na pu’e fa’apagota ai e Leoleo se ali’i ma molia i moliaga o le umia faasolitulafono o se a’upega, e mafua mai i le fa’alavelave lea ua molia ai o ia i lona fa’apapa o se fana i fafo o se fale kalapu i le po o le Aso Sa o le vaiaso i ona tua atu, le po tonu lava lea na sailia ai le siamupini o le ta’aloga o le Super Bowl.

 

O le aso Lua na te’a nei na tula’i ai Hapakuki Fotuaika i luma o le Fa’amasinoga Fa’aitumalo mo le ulua’i taimi, ma fa’atulaga ai e le afioga i le ali’i Fa’amasino ia Fiti Sunia le tupe e $10,000 e totogi ona fa’atoa mafai  lea ona tatala o ia i tua e fa’atalitali ai taualumaga o lana mataupu.

 

Na faamaonia mai e se molimau i le Samoa News, ua mae’a nei ona tatala i tua le ua molia ina ua ia totogi le tupe sa faatulaga e tatala ai o ia i tua, i lalo o tuutuuga e ao ona ia usitai i ai. O ni isi o ia tuutuuga e aofia ai le faasa lea ona ia toe umia se a’upega mata’utia poo fualaau fa’asaina, fa’asa ona ia taumafai e fa’afesootai molimau a le malo, fa’asa fo’i ona ia toe soli se tulafono i soo se taimi.

 

O le vaiaso fou lea ua fa’atulaga e toe tula’i ai le ua molia i luma o le Fa’amasinoga Faaitumalo mo le isi ana iloiloga.

 

O lenei mataupu na tofu atu i le Ofisa o Leoleo, ina ua faila e le na a’afia sana tagi fa’asaga ia Fotuaika, i lona fa’apapa lea o se fana i luga o le ea i fafo o se fale kalapu i Tafuna i le po o le aso e pei ona taua.

 

E vaiaso atoa o galulue Leoleo mo le tau sailia o le tusi saisai mai le fa’amasinoga, ma latou pu’e fa’apagota ai loa le ua molia i le afiafi o le aso Gafua na te’a nei.

 

Na taua e ni molimau i Leoleo lo latou vaaia o le ua molia ua aga’i atu i totonu o lana ta’avale sa paka i fafo o le fale kalapu, ma ia aumai ai le fana ma fa’apapa i luga o le ea. Ina ua mae’a ona pu’e fa’apagota e Leoleo le ua molia, sa latou aga’i atu ai loa ma sailia lona fale ma maua ai se fana.

 

Na taua e le to’alua a le ua molia i le Samoa News lona le fiafia tele i le auala na fa’atinoina ai e Leoleo le pu’e fa’apagota o lona to’alua. Na taua e le Tina e fa’apea, na fa’ateia i latou a o malaga i luga o le auala ma lona to’alua ma le la tama pepe e 4 tausaga ina ua taofi fa’afuase’i le latou ta’avale e ni ta’avale a Leoleo, ma tau fai ta’i atu ai fana a Leoleo i le latou ta’avale.

 

Sa ia taua le fefe o si ana tama i lea taimi, ma ua avea ai ma tulaga ua popole ai lava le loto o lana tama, ma i’u ina ia tu’u fesili ai pe aisea na o atu ai Leoleo e fana lona Tama. Na taua e le Tina e fa’apea, sa le tatau lava ona fa’atinoina e Leoleo nei ituaiga gaioiga a o la i ai ma lana tama i totonu o le ta’avale. Sa fiu fo’i e ee atu i Leoleo o lo o i ai lana tama i totonu o le ta’avale, ae sa fa’aauau pea ona ta’i atu fana a Leoleo i le ta’avale.

 

Na faamaonia e le Tina lo latou aga’i atu ma Leoleo ma su’e lo la fale, ma maua ai e Leoleo se fana o lo o teu malu i totonu o le fale.