Molia se ali’i i lona fa’aaoga o se naifi fa’aoo ai manu’a lona to’alua


[ata: SN]
ausage@samoanews.com

Ua taofia nei i le toese i Tafuna se ali’i e 29 tausaga le matua, ona o le fa’alavelave lea na tula’i mai i Mesepa i le fa’aiuga o le vaiaso na te’a nei, lea ua tu’uaia ai o ia i lona fa’aaoga o se tama’i naifi e fa’aoo ai manu’a i si ona to’alua.

 

E 38 tausaga le matua o le fafine na taofia i le falema’i i Fagaalu ma manaomia ai se taotoga i lona lima agavale, e mafua mai ina ua a’afia le ponaivi o le lima i le u’amea o le naifi na fa’aaoga e le ua molia e fa’asaga i lona to’alua.

 

Na teena e le ali’i o Matthew Mikaele le moliaga o le faatupu vevesi i nofoaga faitele ina ua tula’i i luma o le fa’amasinoga fa’aitumalo i le vaiaso nei, ma ua fa’amoemoe le malo latou te faila ni isi moliaga mamafa fa’asaga i le ua molia, pe afai ae mae’a suesuega a Leoleo o lo o fa’agasolo e uiga i lenei mataupu.

 

Ina ua tula’i Mikaele i luma o le fa’amasinoga, sa fa’atulaga ai loa e le afioga i le ali’i Fa’amasino ia Fiti Sunia le tupe e $2,000 e totogi ona fa’atoa mafai lea ona tatala o ia i tua. Afai ae mafai ona tatala o ia i tua, ua fa’asa ona ia taumafai e fa’afesoota’i lona to’alua i soo se auala, fa’asa fo’i ona ia toe umia se a’upega mata’utia, a ia avea o ia ma tagata e tausi i tulafono a le malo i soo se taimi, ma auai i taimi uma e valaau ai lana mataupu.

 

O le mataupu lenei na tofu atu i le Ofisa o Leoleo i Tafuna i le aso 6 Aperila, ina ua logo se Tama’ita’i Tausima’i leoleo mo se fesoasoani, fa’asaga i se Tina o lo o taofia i le falema’i ona o manu’a e mafua mai i se a’upega maai.

 

Na aga’i atu leoleo ma latou molimauina ai le mafatia o le Tina na a’afia i manu’a o le tino, o lea na manatu ai loa e fa’atali teisi seia maua sona mapu ona fesiligia lea o ia.

 

E le i mana’o le Tina e faila sana tagi fa’asaga i lona to’alua ina ua ulua’i fesiligia o ia e leoleo, ae ina ua mae’a ona fa’ailoa e leoleo i le Tina na a’afia le tatau lea ona fa’ailoa sauaga i totonu o aiga aemaise lava i sauaga fa’asaga i fafine ma tamaiti, na manatu ai loa le Tina e faila lana tagi fa’asaga i lona to’alua.

 

Na fa’ailoa e le Tina i leoleo e fa’apea, e le o se taimi muamua lenei ua fasi ai e lona to’alua o ia.

 

O le fa’alavelave na tula’i mai i le fale o le uo a le Tina i Mesepa, lea na nofo ai pe tusa o le 3 aso ae lei tula’i mai le fa’alavelave. Na taua e le Tina i leoleo e fa’apea, o se feeseeseaiga lava fa’aleulugalii i lo la va ma lona to’alua, na alu ai loa ma nofo i le fale o lana uo i Mesepa.

 

I le aso na tula’i mai ai le fa’alavelave, na alu atu ai lona to’alua i le fale o lana uo e fia talanoa ia te ia. Ao la talanoa ma lona to’alua, na tu’uaia ai e lona to’alua o ia fai mai sa la momoe ma le isi tamaloa, ma avea ai loa lea fa’amatalaga ma itu na tula’i mai ai se taugaupu i lo la va ma lona to’alua.

 

Na faia le la taugaupu, na fa’afuase’i ona ia fa’alogoina le pe o lona lima, e lei umi ae ona vaaia le tafe mai o le toto (tulou). Sa ia vaaia lona to’alua o loo ia uu se tama’i naifi i lona lima. O le taimi lea na alu ai loa i le atoa lona to’alua.

 

Ina ua fesiligia e leoleo le ua molia, sa ia teena ai lona fa’aaoga o se tama’i naifi e fa’aoo ai manu’a i lona to’alua. Na taua e Mikaele e fa’apea, na taumafai e tui o ia i le naifi, ae na avea le taumafai o lona to’alua e aveese mai le naifi mai ia te ia ma itu na manu’a ai loa lona lima.

Comment Here