Ua molia nei e le malo se ali’i e faigaluega i le Ofisa o Tiute a le malo o Amerika Samoa i lona umia o fualaau fa’asaina o le mariuana, e mafua mai i le fa’alavelave lea na maua ai se vaega o mariuana e tusa ma le 7 pauna na aumai fa’anana i le Falemeli i Fagatogo.

O le aso Gafua na te’a nei na tula’i ai Lagona Tigilau i luma o le Fa’amasinoga Fa’aitumalo mo lana ulua’i tula’i, ae o le itula e 1:00 i le aoauli nei lea ua fa’amoemoe e faia ai loa lana ulua’i iloiloga faapitoa i luma o le afioga i le ali’i fa’amasino ia Fiti Sunia.

E $30,000 le vaega tupe lea ua fa’atulaga e totogi ona fa’atoa mafai lea ona tatala le ua molia i tua e fa’atalitali ai taualumaga o lana mataupu.

Ua tuuaia nei Tigilau i moliaga mamafa e lua o le umia faasolitulafono o mariuana, atoa ai ma le umia fa’asolitulafono ma le fa’amoemoe e tulei ma fa’atau atu i isi tagata. O ia moliaga na afua mai i afifi mariuana na aumai fa’anana i le Falemeli.

Ae o le isi moliaga e tolu i ai moliaga fa’asaga ia Tigilau, le moliaga o le umia fa’asolitulafono o vaega o le pauta oona o le aisa, lea fo’i ua molia ai o ia, na mafua mai ina ua saili e leoleo lana ta’avale ae maua ai se paipa tioata e fa’aaoga e ula ai fualaau faasaina, o loo totoe ai i totonu vaega o le pauta pa’epa’e o le aisa.

E pei ona taua i fa’amaumauga a le fa’amasinoga e fa’apea, o lenei mataupu na alia’e mai i le aso 6 Aperila na te’a nei, i le taimi a o pisi ai ali’i faigaluega o le Ofisa o Tiute e siaki faamomoli mai fafo, ae fa’afuase’i ai ona fa’ailo atu e le ta’ifau (K-9) le afifi o lo o masalomia le i ai o fualaau fa’asaina i totonu.

O se taimi o le aso lava lea na aga’i atu ai loa se ali’i sa faigaluega muamua i le Ofisa o Tiute ia Fiatupu Tavai e piki le afiafi. A o le i aga’i atu Tavai e piki le afifi, ua mae’a ona fa’ailoa atu i ali’i Ofisa o le Tiute sa galulue i le Falemeli i lea aso, o le a alu atu Tavai e piki le afifi.

I totonu o le afifi lea na fa’atuatusi atu i le igoa o Tavai, sa maua ai i totonu e ali’i Ofisa o le Tiute ni afifi se lua o loo i ai lau mamago lanumeamata. Sa faia se suega i lau mamago lanu meamata nei ma fa’amaonia ai, o lau mariuana.

Ina ua fa’ailoa e ali’i Ofisa o le Tiute ia Tavai fualaau fa’asaina o loo i totonu o le afifi, sa faailoa atu ai loa e Tavai i ali’i Ofisa o Tiute, e le o ia e ana le afifi, ae o le ali’i o Tigilau, lea na alu atu piki mai o ia i lona fale la te o mai e piki atu lana afifi sa aumai i lana pusa meli.

E pei ona taua i fa’amaumauga a le fa’amasinoga e fa’apea, ina ua fa’ailoa e le ali’i Ofisa o le Tiute fualaau fa’asaina o lo o i totonu o le pusa, o le taimi lea o loo tu ai Tigilau i tafatafa o Tavai. Sa tago atu loa Tigilau ma taumafai e toe tuu afifi o lo o i ai fualaau faasaina i totonu o le pusa ma mana’o e alu ma le pusa, peita’i sa fai i ai le ali’i Ofisa o le Tiute, e le mafai ona ia aveesea le pusa, e le alu ese fo’i Tavai mai le Falemeli.

O le taimi lea na ta’utino ai loa Tigilau i le ali’i ofisa o le Tiute, o ia e ana le pusa lea na aumai i le pusa meli a Tavai.

Na talosaga Tigilau i le ali’i Ofisa o le Tiute, mo se avanoa la te talanoa ai i fafo. Na faatonu ai loa e le alii Ofisa o Tiute le isi ona sui e vaai fa’alelei le pusa ae se’i la o ma Tigilau la te talanoa i fafo.

Ina ua taunu’u i fafo, sa matua talosaga Tigilau i le ali’i Ofisa mo se avanoa mo ia, ina ia mafai ai ona alu ma le pusa, atoa ai ma lana ta’utinoga e le toe tupu lea tulaga, peita’i sa fa’ailoa i ai e le ali’i Ofisa o Tiute, e le mafai ona ia faia se tulaga fa’apena, e tatau ona fa’atino lana galuega ma le fa’amaoni.

I le mae’a ai o le talanoaga a Tigilau ma le ali’i Ofisa o Tiute, na tago ai loa le ali’i ma fa’afesootai le telefoni a lana Ta’ita’i ma faailoa i ai le tulaga ua tupu, atoa ai ma lona talosagaina o ia ina ia aga’i atu i le Falemeli mo le tau fofoina o le mataupu.

Na mae’a ona talanoa le ali’i Ofisa o Tiute ma lana ta’ita’i, ae te’i ina ua alu atu i luga o le laulau ua leai se pusa sa i ai, ua leai fo’i Tigilau mai le nofoaga lea, se’i vagana ai Tavai o loo i ai pea.

Na aga’i atu ali’i Ofisa o le Tiute ma maua ai Tigilau i totonu o lana ta’avale, ua sauni e alu ese ma le nofoaga, ma toe aumai ai loa le pusa sa i totonu o lana ta’avale.

Ina ua fesiligia e leoleo ia Tavai, sa ia faailoa i ai, o Tigilau e ana le pusa na aumai i totonu o lana pusa meli.

Na saili e leoleo le ta’avale a Tigilau ma maua ai se paipa tioata o lo o totoe ai vaega o le pauta oona o le aisa.