Molia se ali’i faifaiva i lona umia fa’asolitulafono o mariuana

ausage@samoanews.com

Ua tu’uaia nei e le malo se ali’i fai faiva e galue o se tagata fagota i luga o le va’a fagota o le Natalia Victoria, i lona umia fa’asolitulafono lea o vaega o le laau fa’asaina o le mariuana, ina ua maua i ai e ali’i Ofisa o le Tiute mariuana i luga o le va’a i le vaiaso na te’a nei.

 

O le susuga a Christopher Reynolds, ua molia nei o ia e le malo i le moliaga mamafa o lona umia fa’asolitulafono o lea o vaega o le laau fa’asaina o le mariuana, atoa ai ma le moliaga mama o lona taumafai e fa’aulufale fa’asolitulafono mai fualaau fa’asaina i Amerika Samoa.

 

O le vaiaso na te’a nei na tula’i ai Reynolds i luma o le Fa’amasinoga Fa’aitumalo, ma fa’atulaga ai loa e le afioga i le ali’i Fa’amasino ia Fiti Sunia lana ulua’i iloiloga e faia i le vaiaso nei, e iloilo ai e le Fa’amasinoga mau a le malo o le a tu’uina atu, pe lava ma totoe e lagolagoina ai le tagi ua faia fa’asaga ia te ia.

 

E $2,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’atalitali ai taualumaga o lana fa’amasinoga.

 

I fa’amaumauga a le fa’amasinoga o lo o taua ai e fa’apea, o le aso 27 Novema i se taimi o le taeao, na aga’i atu ai sui o le Ofisa o Tiute a le malo mo le fa’atinoina o a latou galuega masani, o le siakiina lea o le taunu’u mai i totonu o le uafu tele o le va’a a le Natalia Victoria.

 

Ina ua taunu’u at i totonu o se tasi o potu, sa fa’alogoina ai e ali’i Ofisa o le Tiute le malosi o le manogi mariuana o lo o sau mai ai. Sa faagasolo le sailiga ma maua ai se tama’i apa container pa’epa’e, e le o i ai ni meatotino i totonu, se’i vagana ai le malosi o le manogi mariuana o lo o fa’alogoina ai.

 

Sa faapea fo’i ona maua e ali’i Ofisa le isi tama’i fagu fualaau pa’epa’e, o lo o i ai isi ituaiga fualaau eseese e fa’aaoga e foia ai le tiga i vaega o le tino. O le potu lea e nofo ai le ali’i o Reynolds.

 

Sa fesiligia e alii Ofisa ia Reynolds pe aisea ua malosi ai le manogi mariuana i totonu o le apa container sa latou maua, ae na tali le ua molia, sa tu’u i ai se vaega itiiti o ana mariuana sa i ai.

 

O lana tali lea na mafua ai loa ona fesiligia o ia e ali’i Ofisa o le Tiute, po o i ai ni vaega o fualaau fa’asaina i luga o le va’a, ae na tali le ua molia, o lo o i ai ae le tele naua. Na aga’i le ua molia ma fa’asino i ali’i Ofisa o le Tiute le vaega o lo o nana ai mariuana, lea sa ia teuina i totonu o se fasi paipa uga na tu’u i lalo o kalone lapisi.

 

Sa faia se suega i le vaega o le laau fa’asaina o le mariuana sa i totonu o le fasi paipa, ma fa’amaonia ai o vaega moni ia o le laau fa’asaina o le mariuana. Ona o lea tulaga, sa logoina ai loa le Vaega o Leoleo ma taofia ai loa Reynolds i lalo o le vaavaaiga a Leoleo.

 

Ina ua fesiligia e Leoleo le ua molia e tusa ai o lenei mataupu, sa ia ta’utino ai e fa’apea, na te le iloaina e fa’asa ona aumai vaega o fualaau fa’asaina i totonu o Amerika Samoa. Sa ia fia malamalama fo’i poo le a le fa’asalaga o le tagata na aumaia se vaega laititi o fualaau fa’asaina i le teritori.

 

Na taua e ni isi o ali’i fai faiva e galulue fa’atasi ma le ua molia i luga o le va’a fagota e fa’apea, e leai se isi o i latou na iloa le gaioiga sa faia e le ua molia, talu mai aso e 29 sa latou fagogota ai i luga o le sami. E le gata fo’i i lea, o Reynolds e fou i le latou va’a, e leai se isi o i latou e iloa e faia e ia ia ituaiga gaioiga.

Comment Here