Ads by Google Ads by Google

Molia se ali’i faia o uiga mataga i le tama a lona Tuafafine


[ata: SN]
ausage@samoanews.com

O le vaiaso na te’a nei na pu’e fa’apagota ai e Leoleo se ali’i pe a ma le 40 tausaga le matua, ona o tu’uaiga i lona faia lea o uiga mataga i lona niece, po o le tama a lona lava tuafafine.

 

Ona o puipuiga i lalo o le tulafono, o le a le mafai ai ona fa’alauiloa fa’amatalaga uma e uiga i le ali’i ua molia, ona o puipuiga ina ia le mafai ai ona iloa le tama’ita’i o lo o a’afia i lenei mataupu. O le tama’ita’i o lo o a’afia i lenei mataupu e 12 tausaga le matua.

 

O lenei mataupu na tofu atu i le Ofisa o Leoleo, ina ua talosagaina e le Tina o le tama’ita’i se fesoasoani mo lenei mataupu, i le mae’a ai lea ona fa’ailoa e le teineititi na a’afia i lona Tina le fa’alavelave sa tula’i mai i le va o ia ma lona uncle.

 

E pei ona taua i fa’amaumauga a Leoleo, o lenei mataupu o lo o tu’uaia na tula’i mai i le fale o le ali’i ua molia, i le taimi na alu atu i ai le teineititi e tafao i lana fanau. Na fa’atonu e le ali’i ua molia lona niece e alu e fufulu ipu i luga o le sink. A o galue le teineititi i le fufuluina o ipu, na fa’afuase’i ona ia fa’alogoina lima o se tagata ua pa’i atu ia te ia.

 

Na faliu i tua le teineitiiti e vaai poo ai, ae tau lana vaai i lona uncle o lo o tu i ona tua. Na taua e le teineititi i Leoleo lona le mautonu i lea taimi, ona o uiga e pei ona fa’aali atu e lona uncle ia te ia. Na fa’afuase’i ona tago atu le ua molia i le tino o le teineititi i se auala e atagia mai ai ona lagona tu’inanau.

 

Na taumafai le teineititi e alu ese peita’i sa taofi e le ua molia o ia, ao fa’asolo atu ona lima i le fatafata atoa ai ma le itu tinosa o lona niece. Mulimuli ane, na maua e le teineititi le avanoa e alu ese ai ma tamo’e ese loa mai le fale o lona uncle ae aga’i atu i le latou fale.

 

O le afiafi ina ua fa’atoa manava atu lona Tina, na fa’atoa faailoa ai loa e le teineititi le faalavelave sa tupu, ma logo ai loa e le Tina le Ofisa o Leoleo.

 

Na taunu’u Leoleo ma latou pu’e fa’apagota le ua molia ae auina atu i le Ofisa mo suesuega. O lo o taua i faamaumauga a le Fa’amasinoga le fa’alogoina e Leoleo o le manogi ‘ava malosi mai le tino o le ua molia i le taimi na fesiligia ai o ia, atoa ai ma ona mata e matua malosi le mumu.

 

O lo o tu’uaia e le malo le ua molia i moliaga mamafa e aofia ai lona tagofia o itutinosa o se teineititi e laititi i lalo o le tulafono, faia o uiga mataga fa’asotoma, atoa ai ma lona faia o gaioiga e lamatia ai le saogalemu o fanau laiti.

 

O lo o taofia pea le ua molia i le toese i Tafuna e fa’atali ai lana ulua’i iloiloiga lea ua fa’atulaga e faia i le masina o Mati o lo o lumana’i nei.