Ads by Google Ads by Google

Molia se ali’i ave pasi i lona fa’amalosia o se tama’ita’i 17 tausaga


[ata: SN]
ausage@samoanews.com

O le vaiaso na te’a nei na pu’e fa’apagota ai e Leoleo se ali’i ave pasi, ona o tu’uaiga i lona fa’amalosia lea o se tama’ita’i e 17 tausaga le matua ma ia faia i ai uiga mataga.

 

O le fa’alavelave e pei ona tu’uaia ai le ali’i o Michael Sene na tula’i mai i le aso 31 Oketopa, 2017 ae o le vaiaso na te’a nei na fa’atoa pu’e fa’apagota ai e Leoleo le ali’i ave pasi i le mae’a ai lea ona faila e le malo o moliaga fa’asaga ia te ia.

 

O moliaga mamafa e 4 ua tu’uaia ai e le malo ia Sene e aofia ai le fa’amalosi teine, ave faamalosi o se tagata, faia o amioga faasotoma, atoa ai ma le tagofia o itutinosa o se tama’ita’i e le fa’aipoipo i ai.

 

I le mae’a ai o le ulua’i iloiloga a Sene i luma o le Fa’amasinoga Fa’aitumalo i le vaiaso na te’a nei, na toe taofia ai loa o ia i le falepuipui i Tafuna ina ua le mafai ona ia totogiina le tupe e $50,000 ua fa’atulaga e tatala ai o ia i tua.

 

Afai ae mafai ona tatala o ia i tua mai le toese, ua fa’asa ona ia toe taumafai i soo se auala e faafesootai le tamaitai na aafia, pe na te toe soliina fo’i se tulafono, a ia avea o ia ma se tasi e tausisi i tulafono uma a le malo.

 

O le mataupu lenei e pei ona taua i fa’amaumauga a le fa’amasinoga, na tofu atu i le Ofisa o Leoleo i Tafuna, ina ua talosagaina e se uo a le tama’ita’i na a’afia se fesoasoani a Leoleo i le aso 2 Novema o le tausaga na te’a nei, mo se avanoa latou te suesueina ai le mataupu e fa’atatau i le tama’ita’i na a’afia sa fa’amalosi ona faia i ai se alii ave pasi ni uiga mataga.

 

Na maua le avanoa e fesiligia ai e Leoleo le tama’ita’i na a’afia, ma ia fa’amatalaina ai loa le fa’alavelave na tula’i mai.

 

Na taua e le tama’ita’i lea e fa’apea, i le aso 31 Oketopa, sa alu ai i le Kolisi Tuufaatasi e su’e lana uo teine, ae ina ua fiu e saili lana uo teine e le maua, na ia fa’atuina ai loa le pasi e alu i Leone ma ti’eti’e ai loa i luga ma le fa’amoemoe e alu ai i le fale. O le pasi sa fa’afoeina e le ali’i o Sene, le ua molia.

 

Na taua e le tama’ita’i na a’afia i Leoleo e fa’apea, o le pasi a Sene e masani ona ti’eti’e ai lana uo teine o loo tau sailia, o le mafua’aga lea na ia fesiligia ai le ave pasi pe lei vaai i lana uo, ae na tali le ave pasi e leai.

 

Ina ua latalata i lona fale, sa fa’afuase’i ona fai atu le ali’i ave pasi ia te ia aua nei nofo, ae la tietie e momoli muamua isi tagata o le pasese ona fa’atoa momoli ai loa lea o ia. Na musu le tama’ita’i na a’afia ina ne’i saili o ia e ona matua, peita’i sa fai i ai le alii ave pasi o Sene, faitalia lava o ia ma toe momoli o ia i lona aiga.

 

Ina ua mae’a ona momoli uma isi tagata o le pasese i Leone, na toe aga’i mai ai loa le pasi a le ua molia ma pasia le fale a le tama’ita’i na a’afia. Na faatonu e le ua molia le tama’ita’i e alu e nofo i le nofoa pito i tua o le pasi ina ua pasia lle nofoaga sa tatau ona nofo ai o ia.

 

Na taua e le tama’ita’i na a’afia i Leoleo le aga’i sa’o o le pasi i Nuuuli i le fale a le ua molia, o iina na fa’amalosi ai loa e le ua molia o ia i totonu o se fale tuufua, e ui sa ia matua teena malosi gaioiga sa fa’atinoina e le ua molia ia te ia, ae sa mafai lava ona fa’atino e le ua molia e ala i lona fa’aaoga o lona malosi.

 

Ina ua maea ona faamalosi e le ua molia le tama’ita’i na a’afia, sa nofo o ia i luga o le nofoa ma ata. Mulimuli ane, sa ia alu loa ma momoli le tama’ita’i na a’afia i lona aiga i le afiafi o le aso lava lea.