Ads by Google Ads by Google

Molia ave taxi 66 tausaga faia uiga mataga teineititi 9 tausaga


[ata: SN]
ausage@samoanews.com

E 66 tausaga o se toeaina ave taxi mai Pago Pago na pu’e fa’apagota e Leoleo i le po o le aso Sa o le vaiaso nei, ona o tu’uaiga i lona faia lea o uiga mataga i se teineititi e 9 tausaga le matua.

 

E pei ona taua i fa’amaumauga a le Fa’amasinoga, e va lalata lava le fale e nonofo ai le teineiitiiti na a’afia ma lona aiga, ma le fale e nofo ai le toeaina ave taxi amio valea ua taofia nei e Leoleo i le Falepuipui i Tafuna.

 

E 2 moliaga ua molia ai e le malo ia Pitone Sivatia. O ia moliaga e aofia ai le moliaga mamafa e tasi, o lona tagofia lea o itutinosa o se teineititi e laititi i lalo o le tulafono, lea e mafai ona fa’asala ai se tasi i le toese mo le umi e le silia i le 5 tausaga; atoa ai ma le moliaga mama o lona faia o gaioiga e lamatia ai le saogalemu o fanau laiti, o se solitulafono e mafai ona taofia ai se tasi i le toese mo le umi e le sili atu i le tasi le tausaga.

 

O lenei mataupu na tofu atu i le Ofisa o Leoleo i Fagatogo i le po o le aso Sa na te’a nei, Ianuari 28, ina ua logo e ni isi o le aiga le Ofisa o Leoleo mo se fesoasoani, i le mae’a ai lea ona fa’amatala e le teineititi i ona matua o le faalavelave sa tupu.

 

Na aga’i atu Leoleo i Pago Pago ma aumai le teineititi na a’afia ma lona Tina, atoa ai ma le pu’e fa’apagota mai o le ali’i amio valea o Sivatia. Ina ua mae’a ona fesiligia e Leoleo le teineititi na a’afia ma lona Tina e tusa ai o lenei fa’alavelave, sa aga’i atu ai loa Leoleo ma latou fesiligia le ali’i o Sivatia.

 

Na faamatala e le teineititi na a’afia e fa’apea, na tuli o ia se tasi o ali’i e alu ia Sivatia e faanoi mai se .50 sene e fa’atau ai sana apainu. Na alu le teineitiiti ma tu’itu’i le faitoto’a o le fale o Sivatia, ma tatala mai ai e Sivatia le faitoto’a.

 

Na fesili Sivatia i le teineititi na aafia pe i ai se mea e mana’o i ai, ona tali lea i ai o le teineititi, o ia na alu atu e faanoi mai sana .50 sene e fa’atau ai sana apa inu. Na fai Sivatia i le teineititi e alu atu i totonu o le fale. Ina ua ulufale le teineititi i totonu, sa tapuni e Sivatia le faitoto’a ma fai i le teineititi la te o i totonu o le potu.

 

Na ave e le ua molia le teineititi i luga o lona moega, ona ia fai lea i ai e sosoo atu ia te ia peita’i sa musu le teineititi. Na aapa atu le ua molia ma toso atu le teineititi e faalatalata atu ia te ia, ona ia fa’atino ai loa lea o uiga mataga e ala i lona tagofia o vaega o lona tino.

 

Ao fa’atino e Sivatia ia gaioiga uma e pei ona fa’amatala e le teineititi i Leoleo, sa faalogoina e le teineititi le malosi o le manogi pia o lo o alu atu i lona tino. Sa vaaia fo’i e le teineititi ni apa pia ua uma ona inu o lo o taatitia i totonu o le lapisi i totonu o le fale a le ua molia. Na tu’u e Sivatia le .50 sene i le teineititi na a’afia ma fai ai loa e alu i fafo ma le fale. Na faatali le teineititi se’i taunu’u atu le uo tama a lona Tina, ona fa’atoa ia fa’amatala lea i ai le faalavelave sa tupu.

 

Ina ua fesiligia e Leoleo ia Sivatia e uiga i lenei fa’alavelave, na matua teena malosi e ia fa’amatalaga uma a le teineititi o lo o tu’uaia na ‘aafia. Na taua e le ua molia i Leoleo e fa’apea, na te le o manatuaina se taimi na alu atu ai le teineititi lea i totonu o lona fale.

 

Na pau tamaitai na taua e le ua molia i Leoleo na o atu i lona fale i le aso lea, o ona niece e to’alua na o atu e avatu lana meaai ma latou tafafao. Na matua teena malosi e le ua molia lona faia o ni gaioiga mataga e pei ona tu’uaia ai o ia e le teineitiiti ma lona aiga.

 

Ae na fa’amatala e le Tina o le teineititi i Leoleo e fa’apea, e le o se taimi muamua lea ua tula’i mai ai lenei fa’alavelave i le va o Sivatia ma lana fanau teine. I le tausaga na te’a nei, sa faia ai fo’i e le ua molia ni uiga mataga i lana tama teine matua, peita’i na mafai lava ona teuteu i tua i le va lelei ma faia ai loa le tonu e le logoina Leoleo.

 

Ae talu ai o lea ua toe tula’i mai lenei fa’alavelave, ua ia manatu ai loa e logo le Ofisa o Leoleo mo se fesoasoani.

 

E $5,000 le tupe lea ua fa’atulaga e le Fa’amasinoga e totogi, ona fa’atoa mafai lea ona tatala Sivatia i tua mai le toese i Tafuna. Afai ae mafai ona totogi e Sivatia le tupe e tatala ai o ia i tua, ua fa’asa e le Fa’amasinoga ona ia toe taumafai e faafesootai le teineititi na aafia poo nisi o lona aiga.

 

O lo o taofia pea Sivatia i le falepuipui i le taimi nei, se’i vagana ua totogi le $5,000 ona fa’atoa mafai lea ona tatala o ia i tua.