E 50 tausaga le matua o se ali’i ave pasi i totonu o le atunu’u ua tu’uaia nei e le malo i moliaga mamafa e 14, e mafua mai i le fa’alavelave lea ua tu’uaia ai o ia i lona fala lea o uiga mataga fa’afeusuaiga i se teineititi e 15 tausaga le matua e tuaoi o latou fale.

O moliaga ua faila fa’asaga i le susuga a Kerisimasi Faumui e aofia ai moliaga e 3 o lona faia o uiga mata fa’asotoma atoa ai ma le moliaga e 2 o le faiaiga ma se teineititi e i lalo o le 16 tausaga le matua, o ni solitulafono mamafa e mafai ona fa’asala ai se tasi i le toese mo le umi e le silia i le 15 tausaga, ma moliaga ia e mafai ona fa’asala ai o ia i le toese mo le umi e le silia i le 7 tausaga, lea e aofia ai moliaga e 7 o lona faia o uiga mataga fa’afeusuaiga, atoa ai ma moliaga e 2 o lona tagofia o itutinosa o se teineititi e le fa’aipoipo i ai.

Na avea le fiu o le Tina o le teineititi na a’afia e fa’atali se tulaga o lana tagi sa faila i le Ofisa o Leoleo i le tausaga ua mavae e uiga i lenei mataupu, na mafua ai loa ona ia asia le Ofisa o Leoleo i le masina o Aperila na te’a nei mo le toe tulituliloloaina o lana tagi fa’asaga i le ali’i ave pasi, ma tofia ai loa le tama’ita’i leoleo ia PSO Samantha Lam Yuen na te su’esu’eina lenei mataupu.

Ae pei ona taua i fa’amaumauga a le fa’amasinoga, na amata mai le mafutaga fa’aleulugali’i i le va o Faumui ma le teineititi na a’afia ina ua fa’atoa uma lava ona fa’au’u mai le teineititi mai le Vasega 8, tusa lea ua 14 ona tausaga le matua, ina ua fesili atu le ua molia ia te ia pe fia ona tausaga, ona ta’u lea i ai e le teineititi o ia e 14 tausaga lona matua, peita’i na fa’ailoa i ai e le ua molia e fa’apea, e mana’o e faia se la mafutaga fa’aleuo e aofia ai lo la faia o amioga o lo o faia e ulugali’i.

O le mafutaga e pei ona taua i fa’amaumauga a le fa’amasinoga, na amata mai i le fa’atau e le ave pasi o mea mananaia e fa’apele ai le teineititi e pei o lavalava, se’evae ma meaai. Sa ia fa’atauina fo’i se telefoni feavea’i ma tu’u i le teineititi ina ia mafai ai ona la feso’ota’i ma talanoa i soo se taimi.

Na fa’ailoa e le teineitiiti na a’afia i Leoleo e fa’apea, i le va o le masina o Aokuso ma Tesema 2015, soo se taimi lava la te fetaui ai ma le ali’i ave pasi, e na o le kisi lava le gaioiga la te faia, ae i le masina o Fepuari 2016, o iina na ave ai loa o ia e le ali’i ave pasi i totonu o lona potu moe ma fa’ataoto o ia i luga o lona moega, ma ia faia atu ai uiga mataga ia te ia ina ia fa’amalie ai ona lagona tu’inanau, peita’i sa ia taumafai e tete’e ma i’u ai i lona toe alu i lo latou aiga e aunoa ma le fa’ataunu’uina o le manaoga o le ali’i ave pasi la te feusua’i (tulou).

I le masina o Me 2016, na valaaulia ai e le ali’i ave pasi le teineititi na a’afia ma lona uso e o atu e matamata T.V i lona fale, ma ina ua mae’a le matamataga T.V ma toe fo’i le uso o le teineititi i le fale, sa taofi e le ave pasi le teineititi na a’afia i totonu o lona potu ma ia fa’atinoina ai uiga mataga ia te ia e ui la te le’i feusua’i, ae ina ua mae’a ona faia e le ave pasi nei uiga mataga i le teineitiiti, sa ia tu’uina i ai le apa inu e fa’apele ai o ia ma tuli loa e alu i lona aiga.

Ae o le masina loa o Iulai 2016, na fa’atinoina ai loa e le ali’i ave pasi isi gaioiga mataga i le teineititi na a’afia, ma i’u ai loa ina la feusua’i (tulou) i totonu o lona potu moe, ina ua maua le avanoa e alu atu ai le teineititi i lona fale.

Pe a ma le fa’a 4 i le fa’a 5 ona feusua’i le ali’i ave pasi ma lenei teineititi e na o le 15 tausaga le matua, e pei ona taua e le teineititi i Leoleo ina ua fesiligia o ia e uiga i lenei mataupu. Na taua atili fo’i e le teineititi i Leoleo e fa’apea, o le tele o taimi la te talanoa ai ma le ali’i ave pasi i luga o le telefoni, e ala i fetusiaiga e fa’aaoga ai telefoni feavea’i fa’aonaponei, ma momoli atu ai e le ave pasi fa’aupuga fa’agauloto e fa’atosina ai o ia ma ta’utino atu e alofa ia te ia.

O le mataupu lenei na alia’e ina ua maua e se tasi o le aiga fetusia’iga a le ali’i ave pasi ma le teineititi na a’afia i totonu o le telefoni feavea’i a le teineititi, ma logoina ai loa le Tina o le teineititi e uiga i lenei mataupu, ma i’u ai loa i le faila e le Tina o lana tagi i le Ofisa o Leoleo.

Na taua atili e le Tina e fa’apea, e ui ua silia i le 8 tausaga talu ona la tete’e ma le Tama o le aiga, ae o loo popole lona loto ina ne’i ma’itaga lana tama i le ali’i ave pasi, ona tula’i mai ai lea o se isi fa’alavelave e sili atu i le matuia e faia e lona to’alua i le ali’i ave pasi.

Ina ua fesiligia e Leoleo le ali’i ave pasi e uiga i lenei mataupu, sa ia talanoa i le Tina o le teineititi e uiga i le la mafutaga, ma ua uma fo’i ona ia silafia tulaga uma e uiga ia te i laua. Na ioe le ali’i ave pasi i lona fa’atauina o lavalava, se’evae ma mea’ai mo le teineititi, ona e le gafatia e lona aiga ona fa’atau nei mea uma mo ia, peita’i sa ia teena le i ai o se mafutaga fa’aleulugali’i i lo la va, se’i vagana ai lava isi taimi la te talanoa ai ma fa’ai’u ai a la tafaoga i sina kisi pu’upu’u.

Sa ia fa’amaonia fo’i i Leoleo lona tape o fetusiaiga sa laua faia ma le teineititi na a’afia i totonu o le telefoni, ona e le mana’o e iloa fua e se isi a laua talanoaga.

Na teena e le ali’i ave pasi ia tu’uaiga fa’asaga ia te ia i luma o le fa’amasinoga maualuga i le vaiaso na te’a nei, ma ua toe tolopo nei lana mataupu e toe fofogaina i le masina fou i Iuni, ma o loo tumau pea tuutuuga o loo tatala ai o ia i tua i le mae’a ai lea ona ia totogiina o le tupe e $50,000 na fa’atulaga e le fa’amasinoga e tatala ai o ia i tua.