Ads by Google Ads by Google

Misa ni Tina to’alua vaega paka ai tagata i ai manaoga faapitoa tino

ausage@samoanews.com

Na avea le paka sese o le ta’avale a le isi fafine i le vaega tonu e paka ai ta’avale a i latou e i ai manaoga fa’apitoa o le tino, i le vaega e paka ai ta’avale a le Tedi of Samoa i Fagatogo i le aso Faraile na te’a nei, ma itu na tula’i mai ai se vevesi i le va o ni fafine se to’alua.

 

E fetaui le taunu’u o le Samoa News i le nofoaga lea ae tula’i mai ai loa le vevesi i le va o fafine e to’alua, ina ua fa’atonu e le fafine o lo o i ai lana pine e fa’ataga ai ona paka lana ta’avale i le vaega e paka ai ta’avale a i latou e i ai manaoga faapitoa o le tino ma le mafaufau, le fafine lea o lo o paka lana ta’avale i le pakaga ae leai sana pine, ina ia aveese lana ta’avale, ae se’i paka atu lana ta’avale i le vaega lea.

 

Na fa’alogoina e le Samoa News le tali a le fafine e le o i ai sana pine e paka ai i le vaega lea, o fai i le fafine na mulimuli atu, e leai se malosi ia te ia e aveese ai lana ta’avale mai le vaega ua paka ai, e le o ia fo’i o se Leoleo.

 

Na umi se taimi o fa’aauau pea fetaliaiga i le va o fafine e to’alua, ma taua ai e le fafine o lo o i ai lana pine le tulafono fou lea fa’atoa pasia e le Fono Faitulafono e fa’amalosia atili ai ta’iala ma fa’asalaga mo i latou e maua o paka sese i pakaga fa’apitoa nei.

 

O le mae’a ai o taugaupu fafine ia e to’alua, na fa’afeso’ota’i ai loa e le fafine o loo i ai lana pine le Ofisa o Leoleo mo se fesoasoani, ma e talitonu le Samoa News, e to’alua ali’i Leoleo na aga’i atu mo le tau fa’ato’afilemuina o lenei mataupu.

 

O le taua ai e le fafine sa i ai lana pine o le tulafono fou lea ua pasia e le Fono Faitulafono, e tu’u atu ai le malosi i le Ofisa e Puipuia aia tatau o i latou e i ai manaoga faapitoa o le tino ma le mafaufau (OPAD), latou te fa’asalaina ai ave ta’avale e maua o paka i pakaga e pei ona taua, na mafua ai ona fesiligia le afioga i le ali’i Komesina o Leoleo e uiga i lenei mataupu, pe ua i ai se tasi ua molia, peita’i na taua e le afioga Save Liuato Tuitele e fa’apea, e le i o o atu se ripoti i lona Ofisa e fa’atatau i se mataupu fa’apea, ae o le a ia fesiligia Leoleo se tiute i le aso e pei ona taua e uiga i lenei mataupu.

 

E ui e le i finagalo le fafine sa i ai lana pine e fa’ailoa lona suafa, peita’i sa ia fa’aalia i le Samoa News lona fa’anoanoa tele i le fa’atamala o le malo i le fa’amalosia o tulafono, ma fa’asala ai i latou o lo o soli le tulafono.

 

“O le tele o nofoaga ou te alu i ai, ou te alu atu ua paka mai ta’avale a i latou e leai ni pine i pakaga e paka ai la’u ta’avale, ona ou tau alu lea e saili se isi vaega mamao e paka ai la’u ta’avale, ma ou savali mai ai i le nofoaga mamao e aga’i atu i totonu o le faletupe poo se fa’aoloa fo’i, i lo’u taofi, ua tatau ona lelei le fa’amalosiina o tulafono nei ina ia mautinoa ai o lo o amanaia aia tatau o i matou nei o tagata mama’i”, o le saunoaga lea a lea tina.

 

O le agaga o le faigamalo a Lolo ma Lemanu na mafua ai ona fa’aulu lenei tulafono i luma o le Fono Faitulafono, ina ia tu’u atu ai le malosi i tagata faigaluega a le Ofisa o le OPAD latou te tu’uina atu ai pepa sala (ticket) i ave ta’avale e maua o lo o soli le tulafono.

 

E ui ua leva ona i ai le tulafono, ae o lo o molimauina lava le to’atele o ave ta’avale e le o manatu mamafa i le tulafono, e ala i le paka o a latou ta’avale i pakaga faapitoa nei e ui e le o i ai ni a latou pine e paka ai.