Ads by Google Ads by Google

Meaalofa ma Fa’afiafiaga faapitoa mo Tama ma Tina matutua


Le taimi na tauaao ai e sui o le malo meaalofa mo Tama ma Tina matutua i le polokalame o le kerisimasi o le tausaga ua mavae. [ata AF]
ausage@samoanews.com

Ua fa’atulaga le suiga lea ua sauni le malo e fa’atino ai lana polokalame faapitoa o le Kerisimasi o lenei tausaga mo Tama ma Tina matutua o le atunu’u, lea ua atoa nei le 5 tausaga talu ona fa’atinoina mai e le faigamalo a Lolo ma Lemanu.

 

O le suiga o le polokalame e pei ona fa’amoemoe, e faia i le taeao o le aso 7 o Tesema i le nofoaga autu o Tupulaga Talavou i Pago Pago, e le gata o le a tauaaoina ai meaalofa masani o le a saunia e le malo, ae o le a faia ai fo’i ma se tauvaga fa’apitoa e sailia ai se Tupu ma le Masiofo mai tagata matutua.

 

Na taua e le Faatonusili o le Ofisa o Tagata Matutua (TAOA) ia Evelyn Satele i le fonotaga a le Kapeneta i le vaiaso nei e fa’apea, o le suiga e pei ona fuafuaina i le polokalame o lenei tausaga, na fa’avae mai lea i se fautuaga sa tuuina atu e le afioga i le ali’i Kovana ia Lolo Matalasi Moliga, ina ia i ai ni fa’afiafiaga malie mo nai Tama ma Tina matutua.

 

O le tauvaga la e sailia ai se Tupu ma le Masiofo, o le a faia e pei lava fo’i o tauvaga o lo o sailia ai se Lalelei o Amerika Samoa, e aofia ai taleni, o laei eseese, atoa ai ma le siva Samoa.

 

Na lagolagoina e le ali’i Kovana le suiga e pei ona fa’aalia i le polokalame, ma ia talosagaina ai lana Kapeneta ina ia fa’aalia lo latou lagolagoina o le polokalame mo tagata matutua.

 

“O le 5 ai lenei o tausaga talu ona tatou fa’amanatuina pea ma fa’ataua Tama ma Tina matutua, e mafua lea tulaga ona e talitonu la tatou faigamalo i le taua o le sao atoa ai ma le tautua sa fa’atinoina e i latou nei mo le atunu’u ma le malo i tausaga ua mavae,” o le saunoaga lea a le ali’i kovana.

 

Sa ia taua fo’i le tatau lea ona fa’atino e Ta’ita’i o le malo fa’ata’ita’iga lelei e vaavaai ma mulimuli i ai tupulaga talavou, e aofia ai le fa’atauaina lea o tagata matutua poo matua, aua o le isi lea fa’amanuiaga tele e ala ai ona soifua umi fanau, o le ‘ava i matua e pei ona fai mai ai le Tusi Paia.

 

E le gata i le suiga i le polokalame, ae o le a i ai fo’i se suiga i meaalofa faapitoa o le a tauaaoina atu mo tagata matutua i lenei tausaga.

 

Na fa’afetaia e Lolo lana Kapeneta i lo latou lagolagoina lea o le polokalame mo tagata matutua i tausaga ua mavae. Sa ia toe talosagaina i latou ina ia sauni e toe tautua mo tagata matutua i le polokalame o lenei tausaga, ina ia fa’ailoa atu ai le amanaia e le malo o le tautua a Tama ma Tina matutua o le atunu’u.