Ua fa’ailoa mai i ripoti mai le Iunivesite o Chaminade i Hawaii le maualuga o taumafaiga a se tasi o alo tama’ita’i o Amerika Samoa, i le naunau lea e avea o ia ma se tasi o tagata e lelei lona tomai i le suesueina lea o olaga o manulele e pei o le Pe’a i totonu o Amerika Samoa.

O le tama’ita’i o Nerisa Vee Taua, lea sa faauluulu i ai le vasega fa’auu a le aoga maualuga a Tafuna i le 2014, ua fa’amoemoe e fa’auu mai i le aso a taeao, Me 15 mai le Iunivesite o Chaminade ma lana fa’ailoga o le BA.

Ua ia maua fo’i le avanoa sikolasipi e fa’aauau ai lana aoga i le Iunivesity o Purdue i le tuuaga o aoga o le a sosoo nei.

I se fa’atalatalanoaga ma le Samoa News i le vaiaso na te’a nei, na taua ai e Nerisa lona naunau ina ia tini lona fa’amoemoe, ma avea ai o ia o se tama’ita’i e fesoasoani i le tausia atoa ai ma le puipuia o manulele i Amerika Samoa.

“O se tasi lenei o miti ua leva ona ou vaai mamao i ai, ia avea a’u o se tasi e fesoasoani i le puipuia o ola o manulele i Amerika Samoa. I lo’u tupu tupu a’e i Amerika Samoa, sa ou molimauina ai le tele o le manaoga mo nisi e galulue e puipuia ola o manulele, o le mafuaaga lena ua ou filifilia ai lenei matata”, o le saunoaga lea a Nerisa.

Ina ua ulufale atu o ia i le Iunivesite o Chaminade ma amata ai lona olaga aoaoina, na taua e Nerisa lona fiafia tele e faia suesuega e faatatau i olaga o manulele. Sa ia taua e fa’apea, o le tomai ua ia maua o le a mafai ona fa’asoa atu i isi tupulaga ina ia latou iloaina ai le taua o le galulue e puipui ma faasao olaga o manulele i le atunu’u.

O le manulele o le Pe’a e pei ona ta’atele i laufanua o Amerika Samoa, o se tasi lea o meaola na taua e Nerisa lona fiafia tele e suesue ma malamalama i lona olaga.

“E leai ni saienitisi i Amerika Samoa e faia le galuega o le puipui ma fa’asao lenei meaola. E taumafai lava Amerika Samoa e aumai ni tagata mai Amerika e i ai lenei tomai e fa’atinoina le galuega. O le avea ai o a’u ma se tasi ua i ai lenei tomai, o le a ou ofoina atu ai lo’u agava’a e fesoasoani ai i le puipuia atoa ai ma le fa’asaoina o lenei meaola i le atunu’u”.

I se pepa o fa’amatalaga na tuuina mai e le aoga a Nerisa, o lo o taua ai le lagolagoina e le aoga o taumafaiga uma a lenei tama’ita’i ina ia mautinoa e i’u manuia lana taumafaiga i le fa’amae’aina lea o lana aoaoga i le matata ua ia filifilia.

O aoaoga ma suesuega sa faia i le potu suesue a le Iunivesite o Chaminade sa maitauina ai le sogasoga o lenei tama’ita’i e suesue ma sailiili i olaga o meaola aemaise ai manu felelei.

O lona sogasoga i lenei matata na mafua ai ona unaia malosi o ia e le ali’i faiaoga ia Dr. Gali Grabowsky ina ia fa’amaoni i ana suesuega ina ia manuia lana aoga. O lona naunau e fa’alautele lona iloa i lenei mataupu na tatala atu ai loa ma le faitoto’a e maua ai le avanoa sikolasipi e ulufale atu ai i Purdue Univesity e fa’aauau ai lana aoga.

“E ui o le Iunivesite i Purdue e mafuli lava i tamaiti aoga papa’e e aooga ai, e to’alaiti lava fo’i nai fanau aoga mai le Pasefika ua talia ai i totonu, ae ua filifili Nerisa ina ia ulufale atu i ai ma avea o lona aiga moni lea, ina ia mafai ai ona fa’aauau lana aoga ma fa’ataunu’u ai le sini ua leva ona ia momo’o i ai”, o se vaega lea o le ripoti mai le aoga aoga i Chaminade University i Hawaii (CUH).

O le matati’a ua ausia e Nerisa, ua mafua ai ona tuuina mai e le CUH se lu’itau mo isi tupulaga Amerika Samoa o lo o tau to manatu poo fea le ituaiga lumana’i e aga’i i ai, ina ia mulimuli i tulagavae o Nerisa, e avea ai i latou ma tagata suesue faapitoa i olaga o meaola eseese i Amerika Samoa.

Na taua e Dr. Grabowsky e faapea, “E saili gata ni tagata e fa’atinoina lenei ituaiga galuega i Amerika Samoa. O se atunu’u e tele ai meaola o lo o puipuia i lalo o tulafono o le Siosiomaga ma Paka Faasao a le malo tele, e manaomia ai fo’i ni isi mai Amerika Samoa latou te fa’atinoina lenei galuega”.

O le mae’a ai o le fa’auuga a Nerisa i le vaiaso nei ua fuafua ai loa o ia e malaga mai i lona aiga ma le atunu’u, ao lei toe aga’i atu e fa’aauau lana aoga.

“Ou te manatu ina ia avea lenei tulaga maualuga ua ou ausia ma itu e lu’itau ai isi fanau aoga ina ia finau ma taumafai mo se lumana’i lelei. O tupulaga talavou e faalagolago i ai le manuia o aiga ma le atunu’u”.

Na taua e le Tina ia Miriama Vee lona fiafia tele ina ua ausia e si ona alo lenei tulaga maualuga i lona olaga aoaoina. Sa ia taua fo’i le lagolagoina malosi e le aiga o taumafaiga uma a Nerisa, amata mai lava i le amata seia oo i le aso o lona fa’auuga.