Maua Ofisa o Tiute le tele o oloa na aumai fa’anana mai fafo

 Le Pulesili o le Ofisa o Tiute, susuga Moetulu’i Fuiava  [ata AF]
ausage@samoanews.com

Na fa’amaonia e le Pulesili o le Ofisa o Tiute a le malo ia Moetulu’i Fuiava i luma o le maota maualuga i le vaiaso nei, le tele o oloa eseese ua mafai ona maua e lana aufaigaluega o aumai fa’anana mai totonu o containers mai fafo, lea o lo o ulufale mai i totonu o le atunu’u.

 

O ni isi o nei oloa e aofia ai fana, fualaau fa’asaina, atoa ai ma oloa e fa’aaoga mo aiga e pei o meaalofa ma ta’avale.

 

Ina ia taofia la le toe aumaia fa’anana o ituaiga oloa nei mai fafo i totonu o le atunu’u, sa fautuaina ai loa e le Ofisa o Tiute le faigamalo a Lolo ma Lemanu, mo se avanoa e fa’atau mai ai le masini lea e saili ai containers ma soo se oloa mai fafo, ina ia mafai ai ona saili ia maua le tele o oloa o lo o aumai fa’anana e tagata, ae sili ai i lo ia mafua’aga, ia maua ai se isi tupe fa’aopoopo a le malo.

 

Na fa’ailoa e le afioga a Moetulu’i i luma o le Komiti o le Sailiga o le Tamaoaiga a le maota maualuga i le vaiaso nei e fa’apea, o tagata o lo o latou aumaia fa’anana oloa i totonu o le atunu’u, e fa’a-lima atu ona televave lo latou iloa i tomai ma fesootaiga fa’aonaponei nai lo mafaufau o tagata o le atunu’u, o le mafua’aga fo’i lena e mana’omia ai le tatau lea ona i ai se masini e fa’atino ai le galuega.

 

Na fesili le afioga i le ali’i senatoa ia Laolagi Fonoti Savali Vaeao ia Moetulu’i, pe moni tala salatua sa ia maua, fa’apea sa i ai ni pepa sikaleti na maua o aumai fa’anana i containers a se o kamupani i le atunu’u, lea fo’i na tali le ali’i pulesili o le Ofisa o Tiute, e fa’amaonia le tulaga lea.

 

Saunoa Moetulu’i e fa’apea, o le container a le kamupani a le StarKist sa latou maua ai ni isi o oloa na aumai fa’anana e pei o meaafale, oloa, atoa ai ma katuni sikaleti mo se aiga i Pago Pago.

 

Na viia e Moetulu’i le galuega fita sa fa’atinoina e le vaega a le K-9, lea na mafua ai ona maua oloa e pei ona fesiligia e le ali’i senatoa.

 

E 4 masini ua fuafua le Ofisa o Tiute e fa’atau mai, lea e aofia ai masini e 3 ua fa’amoemoe e taunu’u mai i le fa’aiuga o le masina lenei, ma le isi masini e tasi fa’atoa taunu’u mai i le masina fou o Oketopa.

 

E ui i le tele o fa’asea mai ni isi o afioga i Senatoa i le mafua’aga e ala ai ona mana’omia e le malo masini nei, peita’i o le saunoaga a le afioga a Fuiava i luma o le komiti i le vaiaso nei, ua atagia mai ai le mana’omia tele e le malo o le masini lenei, ina ia mafai ai ona saili oloa o lo o aumai fa’anana i le atunu’u.

 

“O le mea moni lava le mamalu o le maota, e tele naua oloa o lo o aumai fa’anana i Amerika Samoa e le o mafai e lo’u ofisa ona maua, e le alofia lena tulaga, e mafua mai i le tulaga lea, e le mafai e le poto o le tagata ona fa’afetoai le saoasaoa o masini fa’aonapo nei, ae afai loa e taunu’u masini nei, o le mea moni lava, e le toe i ai se oloa e aumai fa’anana e sao, ae o le a maua uma i le taimi e siaki ai”, o le saunoaga lea a Moetulu’i.

 

Mo se fa’ata’ita’iga e pei ona taua e le ali’i fa’atonu, e eseese uma lava lanu e mafai ona ta’u mai e le masini mo soo se oloa e aumai i totonu o container, e ese le lanu o le u’amea, ese fo’i lanu o fualaau fa’asaina pe afai e maua o aumai fa’anana i totonu o container.

 

Na fa’aalia e le afioga i le ta’ita’i komiti ia Gaea Perefoti Failautusi, lea fo’i sa avea ma Teutupe a le malo i le 2008 i le taimi o le nofoaiga a Togiola ma Faoa e fa’apea, na mafua ona ave e le malo sui o le aufaigaluega a le Ofisa o Tiute e aooga i le fa’aaogaina o ta’ifau o le K-9, ina ia taofia ai le aumai fa’anana o fualaau fa’asaina i le atunu’u, ae afai o lea ua mana’omia e le malo le masini, lona uiga la ua leai se aoga o ta’ifau o lo o fa’aaoga e le vaega a le K-9.

 

Peita’i na saunoa Moetulu’i e fa’apea, e le o fa’aitiitia le aoga o ta’ifau o le vaega a le K-9, aemaise lava i taimi e taunu’u mai ai malaga a va’alele, e pei o le isi lea taimi e pito sili ai ona aoga ta’ifau, o le siakiina lea o tagata malaga i tino ma ato, po o aumaia ai vaega o fualaau fa’asaina.

 

Na fesiligia e Gaea ia Moetulu’i i le mafua’aga ua ala ai ona ave container a pisinisi e su’e i tua, ae le fa’aaoga luga o le uafu e su’e ai, ina ia mautinoa ai o lo o fa’amaoni le fa’atinoina o le galuega, peita’i na tali Moetulu’i e fa’apea, e leai se sene apa a le Ofisa o Tiute ma le malo e maua pe afai e fa’aaoga luga o le uafu e su’e ai uta o container, se’i vagana ua ave i tua ona fa’atoa totogi lea o lana aufaigaluega.

 

Ae na taua e Gaea e fa’apea, na matua tele lava tupe a le malo na maua i le 2008 i le taimi ao avea o ia ma Teutupe, ina ua ia taofia le toe ave i tua o containers e su’e ai, ae fa’aaoga lava luga o le uafu e su’e ai oloa ma fa’atino ai le galuega a le aufaigaluega.

 

“O mea sa tutupu i tausaga ua mavae, na ona o atu lava o tama faigaluega saini loa le pepa e fa’amaonia ai ua mae’a ona saili le container, e aunoa ma le sailiina o totonu o containers i oloa o lo o aumai ai, ae ina ua su’e i luga o le uafu containers ma oloa na aumai i fafo, e le gata na maua ai oloa na aumai fa’anana, e pei o le container e pito mai i luma le uta o oloa ae fa’apito i tua le ta’avale, ae sa tele ai fo’i tupe a le malo na mafai ona maua ai i le suiga sa ou faia”, o le saunoaga lea a Gaea.

 

Na fa’ailoa e le afioga a Laolagi le lagolagoina e le maota maualuga o le fuafuaga a le malo e fa’atau mai masini su’e oloa nei mo le atunu’u, ae o le itu o lo o popole ai, o le maualuga o totogi fou ia ua fa’ae’e e le malo mo le sailia o uta ma oloa mai fafo.

 

Saunoa Magalei e fa’apea, o lona popolega o lo o i ai i totogi fou ia ua fuafua e malo e fa’aee i luga i pisinisi ma tagata lautele, e ono fa’asaga mai ai le aufai pisinisi fa’ati’eti’e le mamafa o tau nei i luga o le tau o oloa, ona tigaina ai loa lea o le atunu’u lautele, ae na mafua mai i le malo.

 

Sa ia fa’ailoa ia Moetulu’i e fa’apea, afai e silasila i le paketi a le malo, e tusa ma le 80% o tagata faigaluega e le atoa se ta’i $30,000 o a latou totogi i le tausaga, ma o se tulaga ua atagia mai ai le to’atele o tagata e le gafatia le toe sii o le tau o le soifuaga i le lumana’i.

Comment Here