Ads by Google Ads by Google

Maua e Leoleo le va’a fagota na tafea mai i Samoa


[ata: foa'i]
ausage@samoanews.com

O le vaveao o le aso Toona’i, 2/17/18, na maua ai i gatai o Pago Pago se va’a fagota alia na tafea mai i Samoa. E to’atolu alii faifaiva sa i luga o le va’a ina ua taunu’u mai i laufanua o le teritori, ma o lo o maloloina uma i latou i le taimi nei. O lo o fa’amautu i latou uma i se tasi o latou aiga i le afioga i Lauli’i, e fa’atali ai le faagasoloina o a latou pepa malaga e toe fo’i atu ai i Samoa.

 

O lo o galulue fa’atasi le Ofisa o le Loia Sili ma le Ofisa o Femalagaaiga a le atunu’u, fa’atasi ai ma le Ofisa o le Konesula o Samoa i Amerika Samoa nei, mo le faia o feutanaiga e fa’amautu ai pepa malaga e toe fo’i atu ai i latou  nei i Samoa.

 

I se faatalatalanoaga ma le Komesina o Leoleo i le vaiaso nei, na fa’amaonia mai ai e le tofa Le’i Sonny Thompson lenei mataupu.

 

Saunoa le afioga i le ali’i Komesina e fa’apea, pe tusa o le itula e 3:00 i le vaveao o le aso Toonai na te’a nei, ae logoina loa le Ofisa o Leoleo e se tagatanu’u o Amerika Samoa, e fa’atatau i se va’a fagota alia na tafea mai ma tuta i tua tonu o le nofoaga o lo o i ai le Ofisa o Tagata Matutua i Pago Pago (TAOA).

 

O le maua ai e Leoleo o lea valaau, na vave ai loa ona aga’i atu se vaega faapitoa o Leoleo e tali i le valaau, fa’atasi ai ma le Vaega Faapitoa e sailia fualaau fa’asaina, ona o le taumafai ina ia mautinoa e le o se taumafaiga lea e auala mai ai fualaau fa’asaina i le atunu’u.

 

“Na taunuu Leoleo ma sailia le tino atoa o le va’a fagota ao molimauina e ali’i e to’atolu o le auva’a, ma faamaonia ai le leai o ni fualaau faasaina poo ni isi lava vaega e iloa ai ni taumafai fa’asolitulafono. Sa faamaonia i suesuega a Leoleo, o le va’a lenei sa malaga mai i Poutasi Faleali’i i Samoa i le po o le aso Faraile na te’a nei, ma le fa’amoemoe e aga’i atu i le sami mo fagotaga, ae o se tulaga faaletonu i le afi na mafua ai loa ona pe le afi o le va’a ma tafea ai loa le va’a”, o le saunoaga lea a Le’i.

 

“E fia faailoa atui le atunu’u, e leai ni gaioiga faasolitulafono na maua i totonu o le va’a fagota sa tafea mai, ma ua i lalo nei o le vaavaaiga a le Ofisa o Leoleo le va’a e faatali ai le tagata e ana le va’a o loo fuafua e taunu’u mai i se taimi o le vaiaso nei mai Samoa, mo le toe auina atu o lana va’a i Apia”.

 

Na faailoa e le au va’a i Leoleo e fa’apea, ina ua faaletonu le isi afi o le va’a, sa faia ai loa le latou faaiuga ina ia faatafea loa le va’a. O se tasi o faafitauli na maitauina e le auva’a e pei ona latou faailoa i Leoleo, o le faigata lea ona latou iloa atu ni atumauga poo ni moli e iloa tonu ai le itu e tatau ona latou aga’i i ai.

 

Sa faatafea le va’a i le po atoa o le aso Faraile seia oo mai i le vaveao o le aso Toona’i na sosoo ai, ae latou vaaia loa moli ma fa’aola ai loa le isi afi sa lelei ma aga’i mai ai loa i uta. Ina ua latou taunu’u ane i uta, na fa’atoa latou iloa ai o le teritori o Amerika Samoa lea ua latou aga’i mai i ai.

 

Na faafetaia e le Komesina le tagatanu’u na tau mai i ai ali’i va’a mai Samoa, lea na mafua ai ona faafesootai Leoleo ma maua ai le fesoasoani mo ali’i na tafefea.