Ads by Google Ads by Google

Maua e Leoleo le au gaoi ua leva ona tau sailia

ausage@samoanews.com

Mai le silia i le to’a 20 i latou na taofia e Leoleo i le fa’aiuga o le vaiaso na te’a nei ona o tu’uaiga i le fa’atupu vevesi i nofoaga faitele, a o pisi ai le atunu’u i tulaga pagatia ona o le ‘afa o Gita na afatia ai le atu Samoa i le fa’aiuga o le vaiaso na te’a nei, na aofia ai i totonu o le silia i le to’a 20 ni ali’i se to’alua sa tu’uaia i le gaoi ua leva ona tau saili mai e Leoleo talu mai le tausaga na te’a nei.

 

O i laua e to’alua e aofia ai Vincent Aupaau ma Sam Tavita, lea ua tu’uaia i moliaga mama o le fa’atupu vevesi i nofoaga faitele, ma le fa’amoemoe e faila e le malo moliaga fa’aopoopo e aofia ai le gaioi ma le talepe fale fa’asaga ia te i laua i se taimi o le vaiaso nei.

 

O le to’atele o i latou na taofia e Leoleo mai le fa’aiuga o le vaiaso, na toe tatala uma i tua e aunoa ma ni tupe na fa’atulaga e tatala ai i tua, e fa’atalitali ai taualumaga o a latou fa’amasinoga. Sei vagana ai lava Aupaau ma Tavita ua toe taofia i le toese i Tafuna se’i vagana ua totogi le ta’i $1,000 a le tagata, ona fa’atoa mafai lea ona tatala i tua.

 

Ae afai e mae’a ona faila e le malo moliaga fa’aopoopo fa’asaga ia te i laua i se taimi o le vaiaso nei, o le a i ai loa le avanoa e toe faaopoopo ai e le Fa’amasinoga le tupe e tatala ai i laua i tua, fuafua lava i le matuia o tu’uaiga o le a tu’uaia ai i laua.

 

O lo o tu’uaia e le malo ia Tavita i lona osofaia lea o se fale o se aiga ma se faleoloa i Leone, ae o Aupaau o lo o tu’uaia i lona osofaia o ni fale o ni aiga se to’atolu i se vaega o Tafuna.

 

E pei ona taua e le malo i le latou tagi fa’asaga ia Tavita, o ni molimau la te silafia fa’amatalaga e uiga i le faalavelave sa tupu, na la manatu e fesoasoani i Leoleo e ala i le ofoina atu i ai o fa’amatalaga, a o pisi ai Leoleo e tau tu’u fa’atasi fa’amatalaga ma molimau e uiga i lenei mataupu.

 

Na taua e le isi molimau i Leoleo lona iloa o le tagata na alu Tavita  ma fa’atau i ai ni isi o meafaigaluega sa ia gaioia mai i le fale o le aiga na a’afia, ae fa’afesuia’i ma fualaau fa’asaina. Na aga’i atu Leoleo ma fesiligia le tagata na tu’uaia sa fa’atau i ai e Tavita mea faigaluega, ma ta’utino ane ai lea ali’i i Leoleo, e moni sa alu atu Aupaau ma fa’atau atu ia te ia le ili laupapa e alu i le uila, ona o le mana’o i se $100 e fesoasoani ai i le fa’atupeina o le malaga a lona uso e toe fo’i i Samoa i le faaiuga o le tausaga na te’a nei.

 

Na ave e le tagata lea le tupe ia Tavita ona o le agaga e fia fesoasoani, atoa ai fo’i ma lona talitonuga, o Tavita o se tagata kamuta, o le ili laupapa na alu atu ma ia o lana lava ili laupapa, ae le o se ili gaoi.

 

Na faailoa e le isi molimau i Leoleo le alu atu o Tavita ma talanoa atu ia te ia, e fesoasoani ai i lana taumafaiga e osofa’i se faleoloa i Leone. Na musu le ali’i lea e fesoasoani ia Tavita, peita’i na fa’ateia o ia ina ua faalogo i tala o lo o tau saili e Leoleo le tagata poo ni tagata na osofaia le faleoloa, o le mafuaaga lea na ia manatu ai loa e fia talanoa i Leoleo.

 

I le mataupu o lo o tuuaia ai Aupaau, o lo o taua ai e le malo le ulufale fa’amalosi o lea ali’i i totonu o fale o aiga i le po ma le fa’amoemoe e fa’atino ai isi solitulafono e pei o le gaoi, atoa ai ma le faia o uiga mataga i tama’ita’i.

 

O lo o tu’uaia le ulufale o Aupaau i totonu o le fale o le isi aiga i le po e aunoa ma se faatanaga, ma taumafai e fai uiga mataga i se tamaitai o loo moe, ae na vave iloa e le tamaitai le ua molia ma ia ee ai loa mo se fesoasoani, ma toe sola ese ai le ua molia.

 

Sa ia ulufale i le fale o le aiga lona lua na aafia ma le faamoemoe e faatino ai le solitulafono o le gaoi, peita’i na vave ona iloa ma toe sola ese ai o ia.

 

Ae o le aiga lona tolu na ulufale faamalosi i ai le ua molia i totonu, na maua ai loa o ia ma taofi ai e le aiga e fa’atali ai le taunu’u ane o Leoleo.