Ads by Google Ads by Google

Mata’utia tulaga ua i ai fualaau fa’asaina i totonu o Amerika Samoa


Le Faatonusili o le Matagaluega o le Puipuiga o le Saogalemu Fa’alotoifale, Samana S. Veavea. [ata AF]
ausage@samoanews.com

O le iloiloga a le Komiti o le Puipuiga o le Saogalemu Lautele a le maota o sui, ma le Fa’atonusili o le Matagaluega o le Puipuiga o le Saogalemu Fa’alotoifale a le malo i le taeao ananafi, na fa’amanino ai e Samana S. Veavea le tulaga mata’utia ua i ai le fa’afitauli o fualaau fa’asaina i totonu o Amerika Samoa i le taimi nei, talu ona amata mai su’esu’ega a se vaega fa’apitoa a lona Ofisa.

 

E mafua ona mata’utia le tulaga ua i ai le fa’afitauli o le fualaau fa’asaina i le atunu’u e pei ona saunoa Samana, ona o ni isi o tagata o lo o a’afia i le aumaia atoa ai ma le fa’atauina o fualaau fa’asaina, o tagata o lo o galulue i totonu o Ofisa a le malo ma pisinisi tua.

 

“Ua matua le iloga se auala e ulufale mai ai fualaau fa’asaina i le atunu’u, e le gata ua sau i va’alele, o va’alalo ae ua oo lava fo’i i va’a fagota alia, ma ua avea nei mau auala eseese ua mafua ai ona fa’atupulaia fualaau fa’asaina i le atunu’u ma a’afia atu ai ma fanau aoga”, o le saunoaga lea a Samana.

 

“I le aoga lava ia a Fagaitua, e le gata ua i ai fanau aoga ua a’afia ae o lo o a’afia ai fo’i ma ni isi o faiaoga i le fa’atauina atu o fualaau fa’asaina, o totonu o afioaga ua a’afia ai fo’i ni isi o Pulenu’u, i su’esu’ega a lo’u Ofisa o lo o fa’agasolo pea lava i le taimi nei, ua manino mai ai o lo o iloa uma lava e aoga ma afioaga ia faiaoga ma Pulenu’u o lo o a’afia i lenei fa’afitauli, ae o le fa’alavelave e fefefe i latou e talanoa mai e uiga i lenei mataupu, ma afai la e tu’u ai lava fa’apea e le faia i ai se galuga, ona atili ai loa lea ona mata’utia lenei fa’afitauli”.

 

Saunoa atili Samana e fa’apea, soo se nofoaga lava i le atunu’u o lo o masalomia le i ai o fualaau fa’asaina, e mautinoa fo’i lava o lo o tele ai ma a’upega fa’asaina, ma o lona popolega numera tasi lena o lo o i ai i le taimi nei, o le saogalemu a lana aufaigaluega o lo o gafa ma le su’esu’eina o lenei mataupu, aua e leai ma se isi o i latou o i ai se a’upega e puipuia ai lona ola.

 

O le fa’afitauli lea ua tula’i mai i le taimi nei, talu ona galulue le Ofisa o le Puipuiga o le Saogalemu Fa’alotoifale e su’esu’e ma sailiili fa’amatalaga e uiga i fualaau fa’asaina e pei ona saunoa Samana, ua amata ai ona tula’i mai fete’enaiga i le va o tagata faigaluega a ni isi o Ofisa a le malo, ma latou fesiligia ai le aia e su’esu’e ai fua e lona Ofisa lenei mataupu.

 

“O isi taimi a tau fesiligia atu sui o le Ofisa o Tiute ae fa’asaga mai ma fesiligia lo’u Ofisa, o fea tou te o i ai, ma ua tau tula’i mai ai tulaga fete’ena’i i galuega fa’atino, ae o le agaga atoa e pei ona finagalo i ai le ali’i kovana, ia fa’aitiitia le fa’afitauli o fualaau fa’asaina i Amerika Samoa”, o le saunoaga lea a Samana.

 

Na fa’amaonia e Samana i luma o le komiti, le i ai o tagata faigaluega a le Ofisa o Tiute ua masalomia lo latou auai i le aumaia fa’anana o fualaau fa’asaina i le atunu’u, ma ua mae’a ona silafia e lana aufaigaluega tulaga ia.

 

Sa ia fa’amaonia atili i lana molimau i luma o le komiti a le maota o sui, o va’alele mai Samoa atoa ai ma le va’alele mai Hawai’i, o isi ia auala o femalagaaiga ua maua e lana aufaigaluega o lo o ulufale mai ai fualaau fa’asaina i le atunu’u, e o o lava fo’i i va’a fagota alia, e na o le sau lava o le va’a alia ma lana uta lafoa’i mai i le isi va’a i Tutuila nei ona toe malaga ese atu lea e aunoa ma se isi na te iloa, ma o tulaga uma ia o lo o galulue i ai lona Ofisa ina ia su’esu’eina ma fa’amautu lelei mau e lagolagoina ai.

 

Na fesili le sui fofoga fetalai ia Fetui Fetu Jr pe i ai ni fa’amaoniga o nei molimau, ae na saunoa Samana, e i ai fa’amaoniga ua mae’a ona maua e lona Ofisa, ae le mafai ona ia fa’amatu’uina atu i luma o le komiti, ona o puipuiga lava i ola o le aufaigaluega o lo o gafa ma le fa’atinoina o su’esu’ega.

 

Na fesili le afioga i le tama’ita’i faipule ia Vui Florence Saulo pe fa’apefea uta o lo o aumai i totonu o containers i luga o le uafu, pe ua i ai ni fualaau fa’asaina ua maua ai talu ona aumai masini e su’e ai uta (scanners) a le malo, ae na saunoa Samana e fa’apea, ua i ai ni isi o containers ua maua i ai fualaau fa’asaina talu ona fa’aaoga masini a le Ofisa o Tiute e su’e ai, ae o le isi fo’i tulaga lea ua maitauina e lona Ofisa, e le o containers uma e ulufale mai i totonu o le atunu’u e siaki e le aufaigaluega a le Ofisa o Tiute, ma o le mea moni, e iloa loa o le container o loo aumai ai fualaau fa’asaina ona fa’aui ese loa lea i le isi itu.

 

Ina ia foia fa’afitauli i fualaau fa’asaina, na taua e Samana le mae’a lea ona tu’uina atu o se talosaga a lona Ofisa i le vaega a le feterale o loo auala mai ai le latou alagatupe fesoasoani, e fa’atau mai ai se va’a e fesoasonai i le latou galuega i luga o le sami, ina ia mautinoa latou te mata’ituina tulaga o loo masalomia le auala mai ai o fualaau fa’asaina i le atunu’u.