Ina ua lutaluta le tai i loto popo'e ae naunau fo'i i le pale o le manumalo i le tauvaga Sipela i le Gagana Peretania - Spelling Bee - a le fanau a'oga tulaga muamua  lea sa fa'atautaia ma maimoaina e le atunu'u atoa i luga o le KVZK-TV, na tula'i mai lava le to'atasi o atali'i mai le to'alima o le fanau e 31 na tauva, ma ave le manumalo i le laumua o South Pacific Academy.

O ia lea o Michael Sun mai le afio'aga o Vaitogi, ae o le fa'alua ai lea ona tauva o ia i lenei tauvaga. O lana sau muamua o le tausaga na vasega ono ai o ia, ae o lea ua vasega 8 ma o lona toe avanoa fo'i lenei, ae umia loa e ia le fa'ailoga - Sipela Numera Tasi.

O le upu na mua'i sipela e Michael ina ia mautinoa ua ausia e ia le siamupini a'ia'i o le "Stunner" ae tatau mai e tusa ma aiaiga o le tauvaga, i le isi upu fou lava e toe ausia ona sa'o i lana sipela, ma ia toe sipelaina ai le "joyous." O i'ina ua mautu ai, e le toe i ai se avanoa mo le tulaga lua ma le tolu e toe sipela ai nisi upu pe toe sofa'i ai le manumalo.

O le tama'ita'i na tulaga lua o le sui na avea ma sui o le A'oga Tafuna Elementary, Kristina Marie Timoteo ma o le fa'alua ai fo'i lea ona tauva o ia i le tauvaga sipela a le teritori. Ua o'o fo'i i lona toe tausaga, ma sa faigata tele ona taofia ona loimata, ina au sisi'i lima o le tama o Michael, ua mae'a ausia e ia le tulaga muamua i lenei tausaga.

O le tulaga tolu e to'alua na tutusa ai, o lona uiga e tasi lava le ta'amilosaga na sasi ai la'ua sipela ia la'ua upu na tu'uina atu e sipela. O i la'ua ia o le sui mai Midkiff Elementary i Leone, Pitolua Savaliolefilemu Sunia ma le ali'i sa loa o tula'i mai e sipela mo le a'oga a Alofau, Hardrian Asofa'afetai Uili.

O Hadrian o lo'o vasega lima o ia i lana a'oga, ma le tama'ita'i o Pitolua o lo'o vasega  6 o ia i lana a'oga i Leone, e mautinoa lava o lo'o ia i la'ua le fa'anaunauta'iga, e toe tauva i le tauvaga Sipela i tausaga o lumana'i a'o le'i mae'a la'ua vasega 8.

I lenei tausaga ua fa'ailoa mai, e le o toe faigofie ona fesasia'i tamaiti. O le aofaiga o taamilosaga e 24, peita'i mai le mae'a ai o le ta'amilosaga lona valu ua totoe mai le to'a 11 o le fanau o tauva. Alu le ta'amilosaga 9 se'ia o'o i le ta'amilosaga 14 fa'ato'a maua se tasi e pa'u mai i le tauvaga. O iina fo'i na toe vala'au ai le malologa pu'upu'u.

E mae'a atu lea malologa ae soso'o ma le ta'amilosaga 15 ae sasi ai le sipela a le sui mai Aua Elementary ona sau lea o le ta'amilosaga 16 e leai se isi na sasi ai o le au tauva.

Uma atu o'o i le ta'amilosaga 17 ae sasi le sui mai le a'oga St Theresa i Leone, ae o le sasi lea sa le manatu o ia o sese lana sipela i le Upu "Vivac" na sipela e ia i le "Vivache."

I le ta'amilosaga 17 na sasi ai le sipela a le sui mai Pavaiai Elementary i le upu "Pefeffernuss" e le'i maua e ia le sipelaga sa'o o lea upu.

I le ta'amilosaga 18 ua toe to'afitu o totoe mai ma sa iloga ona toe fa'alogoina ua aga'i ina faigofie upu, ma e tatau lava ona fesili fo'i le fanau i le uiga o le upu ma le gagana e afua mai ai lea upu ina ia mautinoa e le fanau, o sa'o lelei le latou sipela. O upu e pei o le "fluke" "enrich" "retail" "tally" ae sau loa le "sewn" ae sasi ai le sipela a le sui e to'atasi mai le Manu'atele na tauva i le vaega mulimuli o le tauvaga mai le a'oga Faleasao Elementary, le tama'ita'i o Allyson Lalovilama Liusamoa.

O le ta'amilosaga lava lea na soso'o ma le avanoa o Lauli'i Elementary as sasi fo'i ma ua le au ai le taumafaiga i lenei tausaga a le tama'ita'i o Mariafaustina Lualua Fa'alogo.

Ta'amilosaga lona 19 leai se tasi na sasi o e na totoe, ae o'o i le ta'amilosaga 20 ae sasi ai le sui mai le Manumalo Baptist Academy o Amber Leota. O le upu na sasi ai lana sipela o le "burly."

O le ta'amilosaga 20 na sasi ai le sipela a le ali'i pito i la'ititi na totoe i le tauvaga o Hardrian Asofa'afetai Uili i lana sipelaga o le 'Bypass" ua sasi i le "bipass" ma soso'o mai ma le avanoa o le Midkiff Leone ae sasi fo'i ma ia, totoe loa na'o le sui mai Tafuna Elementary ma le ua manumalo mai le South Pacific Academy.

O le upu na sasi ai le sui mai Tafuna Elementary o le "Horseraddish" ae o lona sipelaga sa'o o le "Horseradish" o se ituaiga mea'ai.

I lenei tausaga o le sui pito i la'ititi ua va'aia ua tauva ai o le tama'ita'i na malaga mamao mai Fitiuta Elementary, Lilien Jonita Ve'e, e vasega 4 ma ua ia fa'ailoa mai, "Ou te taumafai a le pale i lenei tausaga, ou te toe taumafai atili pe maua e a'u ae le'i o'o i lo'u tausaga vasega 8."

E laititi lona tino, ae o lona lagona fa'aalia, e iloga ai e soifua tauva o lenei tama'ita'i. Ina ua fesiligia pe i ai se tasi sa fesoasoani malosi ia te ia i lenei tausaga, ae fa'ailoa mai e ia, "Na fesoasoani tele ia te au lou uso matua, Melody Vee, sa tauva fo'i i le tauvaga sipela ae o lea ua vasega 11 nei o ia i Manu'a High School, fa'atasi ai fo'i ma si o'u tuagane o Joe Vee na sau fo'i e fai ma sui o le matou a'oga i le tausaga ua te'a, ae o lea ua vasega 9 nei o ia i Manu'a High. O nei lea ua toe fo'i ai i Manu'a, ae ou nofo e tauva pe a mai sa'u taumafaiga."

O lo ua iloga mai o Michael Sun ma lona faia'oga e fesoasoani ia te ia i le tauvaga sipela a le Iunaite Setete atoa o le a malaga i Uosigitone DC mo le tauvaga e faia i le vaitau o Me 27 se'ia o'o ia Iuni 1, 2018.

O le fa'afetai na fa'aalia e le tama'ita'i Pule o le Samoa News, Robin Annesley, i le vasega o pisinisi sa latou tofu sao mo le fa'atinoga o le tauvaga Sipela i lenei tausaga. O le McDonalds American Samoa o le Kamupani lea ua nafa ma le tele o pasese ma tupe fa'aalu e sui o le a malaga ma le Siamupini o Sipela i Uosigitone ma nisi o kamupani sa foa'i fo'i e aofia ai le Carls JR, TecConnec ma Pacific Youth Development, fa'afetai i lo outou sao ua mafai ai le tatou tauvaga sipela a le fanau i lenei tausaga.