Ads by Google Ads by Google

MANU’A: Lolo, o lau pule lea, fa’afetai i lou manatu mai ia Manu’a


Le tofa Le’i Sonny Thompson, o le Komesina fo’i o Leoleo ma ni isi o tagatanu’u o le Luanu’u i le taimi na tatala aloaia ai le Ofisa Tutotonu a le malo, le EOB i le taeao ananafi. [ata AF]

Le Ofisa Tutotonu a le malo i Ofu, lea ua fa’aigoaina ia “Afioga Misaalefua Tausulu Palega”, lea na tatalaina i le taeao ananafi. [ata AF]
ausage@samoanews.com

E na o upu o le fa’afetai ma laufofoga o le fiafia na fa’atumulia ai lagona o le to’atele o tagata o le Luanu’u i Ofu ma Olosega/Sili i le taeao ananafi, ina ua ooti le lipine e tatala aloaia ai le Ofisa autu o le malo i Ofu, lea ua fa’aigoaina “Afioga Misaalefua Tausulu Palega”.

 

“Fa’afetai i lau afioga i le Kovana Sili i lou manatu mai pea ia Manua, e ui i tala e tele fai mai ua leai ni tagata i Manu’a, ae o lo o fa’ailoa mai pea lou naunau mai e atina’e ma fa’aleleia le motu o Manu’a”, o le saunoaga lea a le afioga i le ali’i Senatoa ia Misaalefua J. Hudson i le taimi na tulei saunoa ai e fai ma sui o le Luanu’u i le tatalaina o lenei fa’amoemoe taua.

 

Na malaga fa’apitoa le afioga i le ali’i kovana ia Lolo Matalasi Moliga ma sui o lana Kapeneta mo lenei fa’amoemoe taua, lea fo’i na maua ai ma le avanoa o isi o le atunu’u lautele latou te molimauina lenei fa’amoemoe i le aso ananafi.

 

Na fa’atumulia le nofoaga autu o le Ofisa tutotonu a le malo i Ofu i ta’ita’i o le atunu’u fa’apea ai le to’atele o le Luanu’u na lolofi atu latou te fia molimauina lenei galuega tele, lea sa amata fausia mai i le tausaga e 2014, i le tuana’i ai o le tausaga e tasi talu ona manumalo le faigamalo a Lolo ma Lemanu i le ta’it’aiga o le malo.

 

O lauga faapitoa o le sauniga mo le tatalaina o le Ofisa Tutotonu a le malo e aofia ai le afioga i le ali’i kovana, lea fo’i na tali fuaitau ai le afioga i le ali’i senatoa ia Misaalefua fa’apea ai ma le Kovana o le Itumalo o Manu’a, le afioga i le Fa’atui ia Laolagi Fonoti Savali Vaeao.

 

Na taua e Lolo i lana saunoaga e fa’apea, o le agaga atoa ia te ia ua mafua ai ona fausia lenei Ofisa Tutotonu mo le malo, ina ia i ai se nofoaga e mafai ona aumai uma i ai Ofisa o le malo ma tu’u fa’atasi i ai, nai lo le fa’atutu solo i nofoaga eseese.

 

“O le tali lea i le tele o fesili o lo o fesiligia ai e le to’atele le faigamalo, po o fea o ave i ai tupe o loo aumai e atina’e ai Amerika Samoa, lea ua tatalaina lenei galuega taua, o le isi lenei galuega tele o lo o fa’aalu i ai tupe a le malo”, o le saunoaga lea a le ali’i kovana.

 

Sa ia fa’afetaia faapitoa le Faatonusili o le Ofisa o Galuega Lautele a le malo ia Faleosina Voigt ma lana aufaigaluega, i lo latou galulue malosi e fa’atino lenei galuega aoga mo le atunu’u aemaise tagata Manu’a.

 

Na tutulu le afioga a Misaalefua ao saunoa e fa’afetaia galuega lelei e tele ua faia e le faigamalo o Manu’a aemaise lava i le Luanu’u.

 

“Ua mae’a ona e saunia le va’a mo Manu’a, o lea ua tatala galuega i le eletise e ola mai i le La, ao lea fo’i ua toe tatala lenei galuega tele, fa’afetai i lou manatu alofa mai ia Manu’a”, o le saunoaga fa’afetai lea a Misaalefua na lagolagoina fo’i e le afioga ia Laolagi i lana saunoaga.

 

Saunoa Laolagi e fa’apea, o le tele o taimi e fa’afetai ai le Kovana ma le malo ia Manu’a ona o le naunau e lagolago galuega a le malo, peita’i i lona talitonuga e fai ai o ia ma sui o Tama ma tagata o le Luanu’u, e tatau ona fa’afetaia e le Luanu’u le malo i galuega lelei e tele ua faia mo Manu’a.

 

Na si’itia e Laolagi se tala si’i mai le Tusi Paia e fa’atatau i le Perofeta o Ne’emia i le taimi na naunau ai lona loto e toe fo’i e fausia pa o Ierusalema ua fa’atafunaina, lea na ia alu ai ma toe fa’apotopoto tagata o le nu’u o loo totoe ina ia toe atia’e pa o le aai.

 

“O le ata o le Perofeta o Ne’emia, o se ata fa’apena lea ua ou manatu i ai e fa’atusa i ai le fa’amoemoe ua naunau i ai le Kovana ma le malo, o le naunau lea ina ia toe atia’e Manu’a ma fausia tulaga uma ina ia lelei ma manuia”, o le saunoaga lea a Laolagi.

 

Na taua e le to’atele o tagatanu’u o Manu’a i le Samoa News lo latou fiafia ina ua mafai ona tatala aloaia lenei galuega taua.

 

“O se fa’amanuiaga lenei mo lo matou augatupulaga, sa le i mafai e Tuaa ua lagomau mai Tia Sa ona latou molimauina nei galuega tetele ma le matagofie, a o lenei ua matou molimauina o lo matou vaitaimi, e momoli ai le fa’afetai i le kovana ma le malo ona o nei atina’e e tele ua matou vaai i ai”, o le saunoaga lea a se tasi o Tina matua o Ofu.

 

Ae mo tagatanu’u o Manu’a o loo galulue i le Ofisa o le EOB i Ofu, sa latou fa’aalia lagona fiafia ina ua mafai ona tatalaina le Ofisa ma mautinoa ai loa le amata aloaia o a latou galuega ua leva ona tulimata’i i ai la latou vaai.