Manatua pea tiga ma manu’a o le galulolo 2009

ausage@samoanews.com

I le atoa ai i le aso lenei o le 7 tausaga talu ona tuana’i le galulolo na afatia ai Amerika Samoa i le aso 29 Setema 2009, lea na fa’aleagaina ai le tele o meatotino atoa ai ma soifua e 34 na maliliu ai, na taua ai e le afioga i le ali’i kovana ia Lolo Matalasi Moliga i lana saunoaga e fa’amanatu ai lenei aso mata’utia i le tala fa’asolopito o le atunu’u, e ui ua tuana’i atu lenei aso faigata, ae manatua pea ona tiga ma manu’a.

 

“I le aso lenei i le 7 tausaga talu ai, na lagonaina ai e le atunu’u le leo fa’anoanoa ma le fa’amomoi loto, ona o soifua o i latou e to’a 34 o e pele i loto ma agaga, atoa ai ma le tele o meaaoga a tagata ma le atunu’u atoa na fa’aleagaina ona o le malosi o le galulolo”, o se vaega lea o le saunoaga a le ali’i kovana.

 

Saunoa le ali’i kovana e fa’apea, e ui o lea ua mae’a ona toe fa’aleleia ni isi o vaega sa fa’aleagaina talu mai lenei fa’alavelave, e tumau pea lagona tiga ma le misia i loto ma agaga o aiga, ona o i latou e pele i loto ma agaga ua motusia le mafutaga.

 

“E ui o lo o aga’i mai pea le taimi e fa’ate’a ese atu ai lagona mafatia, e le mafai lava ona toe aveese tulaga sa tutupu, ae manatua pea i loto ma agaga o tagata o le atunu’u. Ae ona o talosaga i luma o le Atua i soo se aso, o le a mafai ai ona aveesea nei tiga ma mafatiaga o lo o a’afia ai uo ma aiga”, o se vaega lea o le saunoaga a le ali’i kovana.

 

Ae ui i lagona tiga ma le matuitui o le motusia o mafutaga ma e pele i loto ma agaga, na taua e le ali’i kovana, o lagona faigata nei e aumai ai le fesili tele i tagata uma o le atunu’u ina ia nonofo ma mafaufau i ai, po ua sauniuni i le taimi e aafia ai i tatou i fa’alavelave fa’alenatura fa’apenei.

 

Saunoa le ali’i kovana e fa’apea, o tulaga faapea e aumai ai le mautinoaga atoatoa ma le talitonuga, ua matua saunia uma o tatou aiga i soo se taimi e tutupu mai ai fa’alavelave fa’alenatura fa’apenei.

 

E tatau fo’i i tagata ta’ito’atasi ona tapenapena i soo se auala e fa’asaoina ai i latou mai nei ituaiga fa’alavelave, e aofia ai gaioiga mo auala e sosola ese mai ai i nofoaga e a’afia gofie mo le saogalemu o tagata. E tatau fo’i ona fa’ataua tapenapenaga ma fautuaga o lo o tu’uina mai e le Matagaluega o le Puipuiga o le Saogalemu Lotoifale a le malo.

 

“Ia tatou manatuaina pea agaga o i latou uma na maliliu i lenei fa’alavelave, ina ia fa’amaise le agaga o le Atua i nai o latou aiga o lo o fetaia’i pea ma lagona tiga ona o le motusia o le mafutaga”, o se vaega lea o le saunoaga a le ali’i kovana.

 

I le fa’amanatuina ai o le atoaga o le 7 tausaga talu ona tuana’i lenei fa’alavelave, ua sainia ai e le ali’i kovana sana poloaiga fa’alaua’itele, e avea ai le vaiaso atoa lenei o Setema 24-30, 2016 o se vaiaso e tapenapena ai tagata uma mo le oo mai o fa’alavelave fa’alenatura i le atunu’u.

 

O lo o taua ai i totonu o le poloaiga fa’alaua’itele a le ali’i kovana, le malosi o le mafui’e e 8.1 i le masini fua mafui’e na a’afia ai Amerika Samoa, tusa lea o le 122 maila le mamao mai le itu i saute i sisifo o le motu o Tutuila, ma mafua mai ai loa galu tetele na afatia ai ni isi o vaega o le atunu’u e pei o le afioaga i Pago Pago fa’apea ai ma le afioaga i Leone.

 

I le tapenapena ai o le atunu’u atoa mo ni isi fa’alavelave fa’alenatura fa’apenei i le lumana’i, ua fautuaina ai e le ali’i kovana ia Lolo le atunu’u atoa ina ia tausisi i soo se lapataiga ma fautuaga e fa’atatau i gaioiga e tatau ona faia i le taimi e tula’i mai ai se isi fa’alavelave matuia fa’apenei i le lumana’i.

 

Ua talosagaina fo’i le atunu’u atoa ina ia nonofo tatalo ma manatua aiga o i latou uma na maliliu i lenei fa’alavelave.

Comment Here