Ads by Google Ads by Google

Manaomia se isi sailiiliga ituaiga auala mafai ona fa’aleleia e le feterale

 Le Faatonusili o le Ofisa o Galuega Lautele a le malo ia Faleosina Voigt  [ata AF]
ausage@samoanews.com

O le iloiloga mulimuli a le maota o sui ma le Faatonusili o le Ofisa o Galuega Lautele a le malo i le vaiaso na te’a nei, na tu’uina atu ai loa e afioga i Faipule a latou fautuaga i le tama’ita’i fa’atonusili ia Faleosina Voigt, i auala e tatau ona uia e le malo ina ia faa faigofie ai ona aofia auala o nu’u i le lisi o auala tetele o lo o mafai ona fa’atupe e le malo tele lo latou fa’aleleia.

 

E pei ona fa’aalia e le tama’ita’i fa’atonusili i le tele o taimi e faia ai a latou iloiloga ma le maota o sui, o se su’esu’ega sa faia e le vaega a le feterale (FHWA) o lo o fa’atupeina le fa’aleleia o auala tetele i totonu o Amerika Samoa, ua atagia mai ai le le mafai lea ona aofia ai ma auala i totonu o nu’u, ona o ituaiga auala ia o lo o fa’aigoaina e i latou o auala lona lua, ma e le agava’a le fa’aleleia i lalo o vaega tupe mai le feterale.

 

Na fa’ailoa e afioga i Faipule i le tama’ita’i fa’atonusili, le tatau lea ona toe fai se isi su’esu’ega i ituaiga auala e tatau ona fa’aleleia i totonu o le atunu’u, ina ia mautinoa e aofia ai ma le tele o auala ua leva ona talosaga i ai nu’u ma itumalo mo le fa’aleleia, ae oo mai lava i le taimi nei e le o faia lava i ai se galuega.

 

Saunoa le affoga i le ali’i faipule ia Vesi Talalelei Fautanu Jr e fa’apea, o su’esu’ega sa faia e le FHWA i ituaiga auala e mafai ona latou fa’atupeina, sa faia lea i le silia i le 20 tausaga talu ai, i le taimi e le i to’atele tagata e nofoia le tele o nofoaga eseese i le atunu’u.

 

“Afai e te toe vaai le FHWA i le suiga lea ua i ai le fa’atupulaia o le to’atele o tagata o le atunu’u, o auala sa taua o auala galue i le 20 tausaga ua mavae, ua avea nei ma auala autu o fesootaiga i ni isi o nu’u ma itumalo, o le mafua’aga lea e tatau ai ona toe fautua la outou Ofisa i le FHWA, ina ia toe faia se su’esu’ega i auala uma i le atunu’u, ina ia mautinoa e aofia ai ma auala e le o agava’a i lalo o vaega tupe fesoasoani mai fafo”, o le fautuaga lea a Vesi ia Faleosina, lea fo’i sa lagolagoina e le to’atele o afioga i Faipule sa auai i le iloiloga, e aofia ai le afioga i le ali’i Faipule mai Fofoga ia Puletuimalo D. Koko, o ia lea sa fa’aulufaleina le i’ugafono na mafua ai le iloiloga, ma le afioga i le Tama’ita’i Faipule ia Vui Florence Saulo, o se tasi o sui ua fa’atele ona finau mo le fa’aleleia o auala a lona itumalo i Tuala-uta.

 

Saunoa Faleosina e fa’apea, sei vagana ua toe faia se isi su’esu’ega e iloilo ai ituaiga auala e tatau ona fa’atupe e le feterale lo latou fa’aleleia, e tumau pea le tulaga o lo o i ai le fa’atinoina o a latou galuega fa’atino i le taimi nei, fuafua lea i tupe o lo o maua mai i fafo, se’i vagana ua i ai se isi vaega tupe e fa’aavanoa mai e le Kovana ma le faigamalo, ona fa’atoa mafai lea ona fa’aleleia ni isi o auala o lo o mana’omia le fa’aleleia i totonu o le atunu’u, e pei o le auala lea e taoto i totonu o le afioaga i Leone, le auala e aga’i i le afu.

 

O le auala lea e pei ona autu i ai le iloiloga, sa gata lona fa’ataina mai i se taimi o le 1990, ma e oo mai lava i le taimi nei, ua matua fa’ateteleina lava le leaga, ae le o i ai lava se gaioiga e mafai e le Ofisa ona faia e fa’aleleia ai, ona e le o i ai se vaega tupe e fa’atino ai galuega mo le toe fa’aleleia.

 

Na pau auala ma taligalu ua mautinoa le maua o vaega tupe e fa’aleleia ai e pei ona saunoa le tama’ita’i Fa’atonusili, o auala ma taligalu i nofoaga ua fa’amaonia le a’afia gofie i galu i taimi o galulolo, e pei ona aofia i galuega fa’atino ua fa’amoemoe le vaega a le FEMA a le malo tele latou te fa’atupe ma fa’aleleia mo Amerika Samoa, talu mai le galulolo o le 2009.