O le ofoina atu o togafitiga atoa ai ma fesoasoani i tagatanu’u o le atunu’u o lo o a’afia i le fa’afitauli o fualaau fa’asaina, o se tasi lea o mataupu na taua e le afioga i le ali’i Fa’atonusili ia Samana Semo Veavea, i lana saunoaga i le sauniga o le fa’au’uga o Leoleo fou i le vaiaso na te’a nei, e tatau ona tutu fa’atasi ai Ta’ita’i o Ofisa uma a le malo o lo o galulue i le fa’amalosia o tulafono, ina ia mafai ai ona maua se auala e fesoasoani ai ia i latou o lo o a’afia i nei a’afiaga tuga o le olaga.

“O le mataupu e pito sili ona pele i lo’u loto e tatau ona tele se taimi tatou te talanoa i ai, o tulaga i fualaau fa’asaina o lo o a’afia ai le to’atele o fanau, faapea ai uso ma tuafafine, aua e i ai lo’u talitonuga ua ou fa’atusaina le fa’ama’i o fualaau fa’asaina i se silailagi, a uma ona oso i le isi ou aoao (tulou), ona toe oso lea i le isi ou aoao, pau la le tulaga e mafai ai ona foia lea fa’afitauli, o le ave i le foma’i e tipi ese ina ia malolo ai le tagata ma’i”, o se vaega lea o le saunoaga a le afioga a Samana, o ia lea o le Fa’atonusili o le Matagaluega o le Puipuiga o le Saogalemu Lotoifale (DHS).

“O i latou uma o lo o a’afia i le fa’afitauli o fualaau fa’asaina, e manaomia e i latou ni togafitiga ina ia mafai ai ona foia a’afiaga tuga o lo o a’afia ai i latou. O i latou uma lava o lo o a’afia i le tulaga o le fa’atauina atu o fualaau fa’asaina, i latou o lo o fa’aaogaina atoa ai ma i latou o lo o gaosia mai, e mafai ona tatou fa’aigoaina i latou o tagata o lo o a’afia i faiga fa’asolitulafono, ma ua tatau ona ofo atu i ai ni togafitiga e fesoasoani ai i o latou fa’afitauli”.

“E tatau la ona lava la outou onosa’i e fa’atino ai le galuega, ae aua fo’i ne’i galo e lamatia lo outou saogalemu i soo se taimi tou te fa’atinoina ai lenei galuega, pau le fautuaga ia lava mea faigaluega e fa’atinoina ai la outou tautua ma mafai ai ona puipuia lo outou saogalemu”.

O le afioga a Samana, o le isi lea failauga faapitoa e to’afa i ai failauga na saunoa i le fa’auuga o le Vasega lona 25 a Leoleo, lea sa fa’ataunu’uina i le aso Faraile o le vaiaso na te’a nei i le Fale Laumei i Utulei. O isi failauga sa auai i le sauniga o le fa’auuga e aofia ai le Loia Sili ia Talauega Eleasalo Ale, o le afioga i le Kovana ia Lolo Matalasi Moliga, o le afioga i le Maoputasi ia Mauga Tasi Asuega, ma le Komesina o Leoleo, tofa Le’i Sonny Thompson.

“O la outou tiute tauave o le puipuia lea o le saogalemu atoa ai ma mea totino a le atunu’u, e le faigofie la outou galuega aua e i ai tagata e fai outou mo latou fili, latou te le fiafia pe afai tou te fa’atinoina le mea moni ma le sa’o, ae fa’atoa latou manatuaina lava outou pe afai e i ai se fa’alavelave matuia e tula’i mai”, o se tasi lea o saunoaga a Samana e fa’amalosia ai Leoleo fou ina ia fa’amalosi e fa’atino a latou tiute ma le fa’amaoni.

Na fa’ai’u le saunoaga a Samana i lona fa’ailoa lea ia Le’i le tatau lea ona o mai fa’atasi uma Ofisa a le malo o lo o galulue i le fa’amalosia o tulafono e pei o le Ofisa o le Puipuiga o le Saogalemu Lotoifale (DHS), Ofisa o Leoleo, Ofisa o Tiute, Ofisa o Femalagaaiga, fa’apea ai le Ofisa o Mataupu Tau Samoa, Pulega a ali’i ma faipule o afioaga ma itumalo eseese, e galulue fa’atasi mo le sailia o se auala e foia ai le fa’afitauli o fualaau fa’asaina i totonu o le atunu’u.

E pei ona manino i le fuafuaga a le afioga i le ali’i Komesina ia Le’i, o le toe fa’aauau lea o le tautua a le Vaega o le Vice & Narcotics a le Ofisa o Leoleo, mo le taumafai e saili auala uma e foia ai le toe alia’e mai o le fa’afitauli tau fualaau i totonu o le atunu’u, aemaise lava i totonu o aoga.

E pei ona manino i le folasaga a Le’i sa tu’uina atu i luma o le Fono Faitulafono i le amataga o le tausaga nei, o le a tofia ni Leoleo e tiute i nofoaga eseese o lo o i ai Aoga Maualuluga i totonu o le atunu’u i le taimi atoa o aoga, ina ia fesoasoani ai i le fa’afitauli o le a’afia atu ai ma fanau aoga i le fa’afitauli o le umia lea fa’asolitulafono o fualaau fa’asaina.

I le saunoaga a le ali’i kovana ia Lolo, sa ia taua ai e fa’apea, o le puipuiga o le saogalemu lautele o tagata, e le o se galuega e fa’apatino mo na o Leoleo, ae o le galuega a tagatanu’u uma o le atunu’u.

“E mafua ona ou fai atu o le galuega e fa’atino e tagata uma, ona o le avea ma Leoleo o se galuega lea e amata mai i totonu o le aiga, e ala i le vaega a matua e aoaoina ai le tama ma le teine, ona fa’atoa oo mai ai lea i le avea ma Leoleo e tautuaina le atunu’u lautele”, o se vaega lea o le saunoaga a le ali’i Kovana.

Na fa’atepa e le ali’i kovana le taua o le galuega fa’a leoleo, ona o le ulua’i tofiga lea sa filifilia e le Atua i ona po o le feagaiga tuai, e pei ona tofia ai lana auauna o Mose e tofia e avea ma Leoleo o Isaraelu, atoa ai ma le fa’atonuina o Mose e fai ia Isaraelu e mulimuli ma usita’i i le tulafono a le Atua.

“E taua tele le tiute o le Leoleo, o se tiute fo’i e mamalu ma maualuga, e le tau fa’amamaluina, aua ua uma ona tofia ma fa’amamaluina e le Atua, pau la tatou galuega e fai o le fesoasoani i Leoleo i la latou pito laau, aua e tatau fo’i ona fesoasoani i ai aiga uma, tagata uma, nu’u ma le atunu’u atoa”, o se vaega lea o le saunoaga a le ali’i Kovana.

Sa ia fautuaina le vasega fa’au’u ina ia fa’amaoni i le fa’atinoina o a latou tiute, ma ia fa’amaoni i le fa’amalosia o le tulafono.

“A saili se isi galuega e tatau ona ave i ai le fa’amuamua a le malo e lagolago ma puipui, o le galuega i le puipuia o le saogalemu o tagata ola uma o le atunu’u, aua o iina lea e mafua ai ona tula’i mai tulaga manuia i totonu o soo se faigamalo, afai e lelei ma fa’amaoni Leoleo i le fa’atinoina o a latou tiute, e fa’apena fo’i ona manuia le atunu’u atoa, aemaise lava i le taumafai e foia le fa’afitauli o fualaau fa’asaina”, o le fa’aiuga lea o le saunoaga a le ali’i kovana.