Ads by Google Ads by Google

Mana’omia le fa’atuina o se Komiti Suesue a le Maota o Sui

ausage@samoanews.com

Ua talosagaina e le afioga i le ali’i Faipule mai Manu’a #2 ia Toeaina Faufano Autele le oo i le taimi ua tatau ai i Ta’ita’i o le Maota o Sui, ona toe fa’atula’i se Komiti Suesue na te iloiloina ni isi o mataupu tuga ua alia’e mai i le atunu’u i le taimi nei.

 

O le valaau ina ia toe fa’atula’i se Komiti Suesue a le Maota o Sui, na afua mai lea ina ua salalau ripoti mai le Samoa News fa’asaga i sauaga o lo o faia i ni ali’i pagota o loo taofia i le toese i Tafuna, ona o le sosola soo i tua mai le falepuipui.

 

Saunoa Toeaina e faapea, o le tiute tonu lava lea o le Fono Faitulafono, o le silasila toto’a ia uala e tali atu ai i le augani mai o tagatanu’u mo se fesoasoani, aemaise lava tulaga o le fa’atinoina o gaioiga e soli ai le tulafono.

 

Saunoa atili Toeaina e fa’apea, o ripoti e pei ona faasalalau i le nusipepa i le vaiaso na te’a nei, ua mafua ai ona tutupu lagona ua tatau ona toe tofia se Komiti Suesue e gafa ma le iloiloina o nei mataupu.

 

Sa ia taua le taua tele o le galuega a le Komiti Suesue a le maota o sui, e le gata e mafai ai ona valaaulia molimau e oo atu e molimau, ae maua ai fo’i ma le avanoa e faafofoga ai sui o le komiti i fa’amatalaga auiliili e fa’atatau i mea o loo tutupu.

 

“E le tatau i se leoleo ua tofia e faamalosia le tulafono ona ia faatinoina ni gaioiga faapenei. Sa tutupu muamua fo’i faafitauli faapenei i le toese i Tafuna i tausaga ua mavae, lea na mafua ai ona falepuipui ni ali’i Leoleo e aofia ai ma le Pule o le falepuipui i Tafuna, ae foliga mai o lea fo’i ua toe alia’e mai nei tu’uaiga”, o le saunoaga lea a Toeaina.

 

O le mataupu e pei ona taua e Toeaina, na alia’e mai ina ua faailoa e le ali’i pagota o Joe Togitogi i luma o le fa’amasinoga i le vaiaso na te’a nei, sauaga mata’utia o loo faia e leoleo fa’asaga ia te ia ma le isi pagota i totonu o le falepuipui.

 

O ia sauaga e aofia ai le fasi fa’amo’amo’a o i laua e aunoa ma le auina atu i le falema’i mo le togafitiina o la manu’a, atoa ai ma le fa’apologaina o i laua.

 

O le vaiaso na te’a nei fo’i na faailoa mai ai e ni pagota o loo taofia i le falepuipui i Tafuna i le Samoa News, ni isi o tuuaiga faasaga i le faapologaina e leoleo o ni alii pagota se to’alua.

 

O gaioiga faapologa e aofia ai le loka o la lima i le taimi e aai ma momoe ai, atoa ai fo’i ma le faaoolima i ai o Leoleo.

 

Saunoa Toeaina e fa’apea, afai ua le mafai e le Fa’amasinoga ona faia se gaioiga e fesoasoani ai i le foiaina o lenei fa’afitauli, o le taimi tonu lenei o le Fono e tula’i atu ai. O le aso Gafua o le vaiaso fou lea ua faatulaga e faia ai le iloiloga a le Komiti o Fa’amasinoga a le maota o sui lea ua faamoemoe e molimau ai le Loia Sili, Loia Fautua, atoa ai ma le Pule o le Ofisa Faanofovaavaaia.