Mana’omia iloiloga fa’anatinati mo ni isi o Fa’atonusili a le Kovana


Ni isi o sui o le kapeneta a le Kovana ua mae’a ona filifilia e avea ma ta’ita’i o matagaluega ma ofisa eseese a le malo mo le isi 4 tausaga o loo lumana’i nei. [ata AF]
ausage@samoanews.com

Ua talosagaina e le afioga i le ali’i kovana ia Lolo Matalasi Moliga ta’ita’i o le Fono Faitulafono, mo se avanoa e faia ai iloiloga fa’anatinati mo ni isi o Fa’atonusili filifilia a le malo, ona o i latou ia o le a aofia i le au malaga a le kovana lea ua fuafua mo le fonotaga a Kovana o Setete ma Teritori i le laumua i Uosigitone i le masina fou.

 

O lea fonotaga ua faamoemoe e usuia mai i le aso 22-27 Fepuari, ae o le aso 10 Fepuari lea ua faamoemoe e tuua ai e le kovana ma le isi vaega o le au malaga le atunu’u mo lea fonotaga taua aua le tele o mataupu mo Amerika Samoa e tatau ona manino i lalo o le nofoaiga fou a Peresitene Donald Trump o Amerika.

 

O Fa’atonusili tofia o loo taua i le tusi a Lolo i Ta’ita’i o le Fono e mana’omia le vave faia o a latou iloiloga e aofia ai le Loia Sili ia Talauega Eleasalo Ale, Teutupe ia Ueligitone Tonumaipe’a, o le Fa’atonusili o Uafu ma Malaevaalele ia Taimalelagi Dr. Claire Poumele, Faatonusili o Aoga ia Dr. Ruth Matagi-Tofiga, Faatonusili o le Ofisa o le Paketi ia Catherine Saelua, Komesina o Leoleo ia Le’i S. Thompson, Faatonusili o Fefa’atauaiga ma Alamanuia ia Keniseli Lafaele ma le Faatonusili o le Ofisa o le Puipuiga o le Vaomatua ma le Gataifale ia Vaamua H. Sesepasara.

 

I se vaega o le tusi a Lolo i Ta’ita’i o le Fono Faitulafono sa ia taua ai e fa’apea, talu ai suiga i tulafono ma ta’iala o le a fa’alauiloa e le faigamalo fou a Trump, atoa ai ma suiga e pei ona amata fa’amamalu i tulaga o faiga faiva ma le gataifale, e taua ai le auai o sui o Ofisa a le malo o loo gafa ma le unaia o mataupu fa’apenei o loo a’afia ai le teritori.

 

“O se tulaga taua tele le tatau lea ona maua se avanoa e fa’aleo ai o tatou manaoga atoa ai ma lu’itau ua fetaia’i ma le malo, ina ia mafai ai ona tupu lo tatou tamaoaiga ma mafai ai ona fa’aleleia le soifua manuia o tatou tagata”, o se vaega lea o le tusi a le ali’i kovana.

 

Ona o tulaga e pei ona taua, na talosagaina ai loa e le ali’i kovana Ta’ita’i o le Fono ma le agaga maualalo, ina ia fa’amaonia uma suafa o Fa’atonusili tofia e pei ona taua, ona e taua tele lo latou auai i fonotaga e pei ona fuafuaina i le laumua i Uosigitone.

 

Na fa’ailoa e le ali’i kovana i luma o lana kapeneta i ulua’i fonotaga sa faia i le aso Faraile na te’a nei, le maualuga o lona talitonuga o lo o i ai, o le a fa’amaonia uma i latou e le Fono Faitulafono, i le taimi e fesiligia ai o latou agava’a.

 

Na fa’ailoa e le fofoga fetalai ia Savali Talavou Ale i luma o le maota o sui le taua tele o le talosaga ua tu’uina mai e le ali’i kovana, ma e tatau fo’i i le Fono ona fuafua i ai sa latou fa’aiuga fai.

 

O ni isi o faatonusili tofia e pei ona taua i le tusi a le ali’i kovana, e lei fa’auluina aloaia o latou suafa i luma o le fono e ala i ni i’ugafono, peita’i ua fuafua ta’ita’i o le fono ina ia fa’atinoina le fa’aulufaleina o iugafono mo suafa o fa’atonusili tofia e pei ona talosagaina i le vaiaso nei, ina ia mafai ai ona vave fa’agasolo galuega a le fono e tusa ai o le fa’amaoniaina o i latou nei.

Comment Here