Mana’omia fesoasoani a le Fono i le atina’eina au ta’aalo a AS

Afioga i Senatoa ia Faletagoa’i Tuiolemotu ma Uti Petelo.  [ata AF]
ausage@samoanews.com

Na fa’ai’u le molimau a le afioga i le Fa’atonusili o le Ofisa o Paka ma Malaetaalo a le malo ia Maeata’anoa Pili Gaoteote i luma o le Komiti Soofaatasi o le Paketi a le Fono Faitulafono i le taeao ananafi, i lona fa’atula’i lea o se lu’i i ta’ita’i o le Fono, i le mana’omia lea o le latou fesoasoani i le atina’eina o au ta’aalo a Amerika Samoa o lo o autova’a atu i soo se ta’amilosaga fa’avaomalo a le Pasefika ma le lalolagi atoa.

 

I le avea ai o Maeata’anoa o se tasi o sui o le au malaga a Amerika Samoa mo ta’aloga a le Olimipeka sa faia i Brazil i le masina o Aokuso na te’a nei, sa ia taua ai i luma o le Fono i le taeao ananafi le tele o fa’afitauli o lo o maitauina, i le le lelei lea o le atina’eina atoa ai ma le tapenaina o au ta’aalo a le atunu’u.

 

“E lagona le fa’anoanoa i le tele o ta’amilosaga fa’avaomalo e fa’atasi atu i ai au ta’aalo a Amerika Samoa, e maitauina ai le le lelei o le tapenaina o au ta’aalo a le atunu’u, i lo’u talitonuga mai le tele o tausaga sa masani ai ona ou malaga i ta’aloga e tausinio ai au ta’aalo a le atunu’u, ua oo i le taimi ua tatau ai ona tula’i mai le Fono Faitulafono e ofo atu lana fesoasoani mo le fa’aleleia o ta’aloga i totonu o Amerika Samoa”, o le saunoaga lea a Maeata’anoa.

 

Sa ia taua atili fo’i e fa’apea, e tele naua fa’amanuiaga tau tupe o lo o maua e au taaalo a le tele o atunu’u o le lalolagi, e ala i le fesoasoani a le malo ma le atunu’u atoa, ma i lona talitonuga, ua oo i le taimi ua tatau ai ona fesoasoani le malo ma le Fono Faitulafono e atina’e tulaga tau ta’aloga.

 

E le gata na aofia i le saunoaga a Maeata’anoa tulaga fa’aletonu sa i ai au ta’aalo a Amerika Samoa i le olimipeka i Brazil, ae oo lava fo’i i ta’aloga a le Pasefika sa faia i Papua Niu Kini i le tausaga na te’a nei, sa ia taua fo’i le tele o le fa’aletonu sa i ai i le le lelei lea o le tapenaina o ‘au a le atunu’u.

 

E pei ona silafia e le atunu’u, mai le aofa’i o le au malaga e to’a 12 sa fai ma sui o Amerika Samoa i ta’aloga a le Olimipeka i Brazil i lenei tausaga, o le to’a 4 o i latou nei o tagata afeleti, ae o le isi to’a 8 o tagata malaga e aofia ai ma faiaoga.

 

E tusa ai o fa’aiuga o taumafaiga a i latou nei e to’afa, e leai ma se isi na manuia sana taumafaiga i a latou ulua’i ta’aloga, e lei mafai fo’i ona fa’amanuiaina Amerika Samoa i se pine.

 

Mo ta’aloga a le Pasefika sa faia i Papua Niu Kini i le tausaga na te’a nei, sa fa’amanuiaina ai Amerika Samoa i pine e 11, e aofia ai pine auro e 4, e sili atu ai i ta’aloga a le Pasefika sa faia i Niu Kaletonia i le 2011, lea na fo’i fua mai au ta’aalo e silia i le to’a 100 sa malaga e fai ma sui o le atunu’u e aunoa ma se pine na maua.

Comment Here