O lo ua mae'a fa'ailoa aloaia mai e le Pule Sili o le Ofisa o Palota a le tatou Malo Uiagalelei Dr. Lealofi Uiagalelei, ua mae'a le taimi atofaina mo se fa'alavelave i le sui na sili ana palota i le sailiga o se sui e tula'i e fa'aauau le tofi Faipule o le Itumalo o Sua #1, lea na tu'ua e le latou Faipule sa tula'i mai ai, Puleleiite Tufele Li'amatua, ua aloa'ia ai nei le faletua o Fialupe Felila Fiuaui Lutu.

O ltumalo o Sua #1 e aofia ai le afio'aga o Fagaitua, Amaua, Auto, Avaio, Alega, Aumi ma Lauli'i. O le tamau ai o le filifiliga o se tasi e avea ma Faipule o se itumalo e ao ina taoto le i'uga na maua i le Palotaga se'ia mae'a le 7 aso talu ona faia le palota. O lea fitu aso, e mafai ona fa'alavelave se tasi e tusa o se mea na fa'aletonu i le faiga o le Palota, pe manatu fo'i e ao ina toe faitauina le aofai o palota ma isi lava vala e mafai ai ona fa'auia le fa'ai'uga o le faitauga o le palota i le fa'amasinoga ina ia fa'afinaua le i'uga o i ai.

Peita'i i lenei palotaga na faia ia Oketopa 24, 2017 i lea itumalo, e leai ma se fa'auilavea o aumaia, ua malilie uma fo'i sui na tauva i le i'uga ua maua mai le palotaga na fa'atino e le Ofisa o Palota a le tatou Malo.

Na faia le fa'asalalauga aloa'ia lenei e le Komesina o le Ofisa o Palotaga, Uiagalelei Dr Lealofi Uiagalelei ina ua to'ai i le aso 31 Oketopa, 2017 ae le'i i ai lava se fa'auilavea i le iuga ua taoto ma fa'amauina e lona ofisa.

O le aofai o tagata palota i lea itumalo na fa'amauina e 357 i latou. Na maua e Fialupe F. Lutu le aofaiga e 94 palota, Ketesemane Meaole 20 Palota; Laloniu P Maloa 57; Tuialofi Fa'alae Lauatua'a Tunupopo 64 Palota; Tufagalilo P. Vele 72 palota ma Fale S. Uele 50 palota. Maua ai loa le aofaiga o i latou na palota mo le latou itumalo atoa.

O le tula'i ai lenei Faipule mo lona itumalo e fa'ato'a faamuta lea ia Ianuari 3, 2019. Peita'i mai le amataga o tauaofiaga o le Fono Faitulafono ia Ianuari 2018, ua aofia ai ma Fialupe Felila Fiuaui Lutu o le sui mamalu o le itumalo numera #5 Sua #1.

O le taimi nei ua malolo tauaofiaga o le fono faitulafono a Amerika Samoa se'ia toe amatalia ia Ianuari 2018.

O isi gaoioiga uma e ao ina fa'auia i le Sui Faipule e fa'atalia le taimi e fa'atauto ai mo ona tiute fa'atino o le Faipule o Sua #1 ona fa'ato'a fa'auia lea ia te ia, e tusa ai o vala o le tulafono o le fa'avae o le tatou Malo fa'ateritori o le Iunaite Setete o Amerika.

Pe afai fo'i o le a tula'i lea sui i lona tofiga ua i ai nei, o le a vaava'alua ai i la'ua ma le faipule tama'ita'i o Vui Florence Saulo i le Maota o Sui. O i la'ua o Faipule Tama'ita'i o le Maota. Peita'i, i le Maota Maualuga ua to'atasi pea le sui tama'ita'i o tutula'i ai, Fonoto Tafaifa Aufata.