Maliu se ali’i pagota i totonu o le toese

Le Komesina o Leoleo, afioga Save Liuato Tuitele  [ata AF]
ausage@samoanews.com

O le fa’aiuga o le vaiaso na te’a nei na maliu ai se ali’i pagota a o tuli ai lona fa’asalaga i totonu o le toese i Tafuna. I le fefiloi ai o le mau ripoti e fa’atatau i le maliu o lenei ali’i pagota, na mafua ai loa ona fesiligia e le Samoa News le Komesina o Leoleo mo le fa’amaninoina o lenei mataupu.

 

Saunoa le afioga Save Liuato Tuitele e fa’apea, o le ali’i pagota ua maliu, e tele ituaiga gasegase e a’afia ai o ia, e le i leva fo’i ona te’a atu i tua mai le falema’i i Fagaalu sa taofia ai mo se taimi umi.

 

“E sa’o sa i ai se ali’i pagota na maliu mai i totonu o le toese i le [aso Sa na te’a nei], o le ali’i lea e masani lava ona ave i le falema’i ma te’a atu i tua, e mafua mai i le tele o ituaiga gasegase o lo o a’afia ai lenei ali’i, ae tusa ai o ripoti sa tu’uina mai i le nofoaga autu o le toese i Tafuna, na savalivali solo lava le ali’i lea i fafo o le lotoa ma fa’afuase’i ai ona pau i lalo ma maliu ai lava”, o le saunoaga lea a Save i le Samoa News.

 

Na fesiligia Save pe le o masalomia se gaioiga fa’a solitulafono ua mafua ai ona maliu lenei ali’i, ae na saunoa le ali’i Komesina e leai.

 

“E le o masalomia lava se isi gaioiga fa’asolitulafono i lenei fa’alavelave, ae mo le silafia e le atunu’u, e to’atolu pagota o lo o fai ma taofia i le falema’i ona o gasegase tuga o lo o a’afia ai i latou, e pei o se tasi o Tama matua sa taofia i le falema’i i Fagaalu i le taimi nei i le potu tigaina, e mafua mai i gasegase eseese o lo o a’afia ai o ia e pei o le ma’i suka, toto maualuga ma isi, a o lea ua te’a i tua i le isi potu e fa’atalitali ai le taimi e te’a ai i tua”, o le saunoaga lea a Save.

 

Na taua atili e le Komesina le mae’a lea ona ia talosagaina o le Ofisa o le Loia Sili, ina ia faila se talosaga i le fa’amasinoga mo sana poloaiga e tatala ai i tua le Tama matua lea e ave e tausi e lona aiga, ona o tulaga tuga o lo o i ai lona soifua maloloina.

 

Saunoa Save e fa’apea, ua mae’a ona taunu’u mai aiga o le Tama matua lenei mai Samoa, ma ua latou talosagaina se avanoa e mafai ai ona tatala atu lo latou Tama se’i tausi i tua.

 

E le i mafai e le Komesina ona ia fa’amaonia ripoti e faatatau i se ali’i pagota sa tu’uaia le fa’ao’olima i ai o ni isi ali’i pagota i le 2 vaiaso talu ai, e ala i le fa’aaogaina lea i ai o se a’upega maa’i.

 

Na taua e se molimau i le Samoa News e fa’apea, o le vaveao o le aso Sa i le 2 vaiaso talu ai na tula’i mai ai lea fa’alavelave, ina ua malama ane le ta’avale ae tula’i mai le fa’alavelave e pei ona manu’a ai le ali’i pagota.

 

Saunoa Save e faapea, e leai se fa’alavelave fa’apea na tula’i mai i le toese i Tafuna i le 2 vaiaso talu ai, se’i vagana ai le mataupu fa’asaga i se tasi o ali’i pagota, ua tele ripoti o loo taua ai le le usita’i i tulafono a le toese, e aofia ai ma le sola ese i tua.

 

Saunoa le ali’i komesina e fa’apea, o le ali’i pagota e pei ona ia taua, e le gata e a’afia o ia i le fa’afitauli o le ita, a avatu i ai e le pule o le falepuipui meaai ae tago ato ese ma fa’aleaga, o isi taimi na te lafo ai upu palauvale i ni isi o pagota matutua o lo o i ai i le nofoaga, ona alu lea ua vili i lona aiga ma fai i ai e le o lelei le tausiga o ia i le toese, e le fafagaina o ia e leoleo.

 

“Pau lava lena o le fa’alavelave na tuuina mai i lo’u ofisa i ni nai vaiaso e le i mamao atu, ae ua mae’a ona faia i ai le auala e fesoasoani ai i le ali’i pagota o lo o taua”, o le saunoaga fa’ai’u lea a le afioga i le ali’i Komesina o Leoleo.

Comment Here