Ads by Google Ads by Google

Maliu fitafita Samoa, Shaleen Maiava i Fort Meade, Maryland


O se va’aiga i le tama’ita’i fitafita Samoa ua maliu, ae sa fa’atino lava ona tiute. Fa’afetai mo lau tautua, fa’amaise le Atua i matua ma aiga loto fa’anoanoa ona o le vala’au ua amia ai oe, a’o talavou. [ata: foa’i]

O se va’aiga i le tama’ita’i Fitafita Samoa, Shaleen Maiava (ogatotonu) ua amia e le malaga a le maliu ma le oti a’o talavou lava o ia. [ata: foa’i]

O se tala fa’anoanoa i le maliu o se tasi o alo o le atunu’u, le tamaita’i fiafita ia Pvt Shaleen Maiava. Ma sa tautua i vaega au i Fort Meade, Maryland.

 

“Ua matua le mautonu o ma’ua mafaufau, e ui ina e talavou le afafine, ae o lona loto lava na tauto ai e alu i le US Army, ina ia saili ai lona lumana’i. Talofa e, isi a’u tama ua le tau lau lona fa’amoemoe sa i ai,” o le tala lea a le tina loto fa’avauvau, Lesaoa’i Maiava mai Utulei.

 

“Ae ou te fa’afetai, ua avea na’o ia, ae o tu’ua le to’atele o alo ma fanau a le paia lasilasi o le atunu’u. E ui ina matua matuitui ma o’ona lenei ipu ua ma’ua inumia.”

 

Na fa’au’u mai Shaleen i Samoana i le tausaga 2015, lea fa’ato’a atoa ia Aukuso 2017 le lua o tausaga talu mai ona amatalia lana auaunaga i le US Army.

 

O lona soifua a’oa’oina fo’i sa matua iloga ona avea uma e ia avanoa mo ta’aloga na mafai ona talia ai o ia. Ta’alo o le ‘au Volleyball, Au Basketball ma le ‘au Baseball ae maise o le ‘au Soccer a Samoana High. E tele na’ua ana uo mamae, ma ua matua fa’ate’ia i latou uma i lenei mea ua tupu mai ia te ia.

 

I le fa’amatalaga a le tina, sa vala’au mai Shaleen ia te ia, ma fa’ailoa mai ia te ia, ua matua lagona e ia le ma’i, o lona moa e tutumu ma ua le sao ai sana mea’ai. “Ou te masani ai i lea ituaiga ma’i, e i ai fo’i ma le fofo e masani ona togafitia ai.”

 

O le taimi na vala’au mai ai o ia, a’o i ai i latou i le van, i a latou koleniga masani e ao ina fa’atautaia i le vao ma momoe ai. Sa le mafai ai e ia ona asia se foma’i, ae sa fesoasoani atu si ona tina ma fa’ailoa ia te ia le fofooga o le ma’i lea.

 

Na fai lea ma amio, le siaki pea e i la’ua ma le tama o le aiga le asiasi ia te ia i le telefoni. Peita’i, ua sao lana mea’ai o fuala’au ‘aina mata ua aoga ae maise lava moli. Ua siaki atu lava ua talanoa ata mai ua ese ma le mea sa i ai i le amataga ina ua faato’a vala’au mai. “Na vili mai lea i le itula e 4:00 i le afiafi o le aso Sa ma fai ai lava le talanoaga umi ma a’u ma fa’ailoa mai ua fo’i mai le vao, aua le popole ua ok lava ia,” o le tala lea a le tina.

 

I le taeao po o le aso Gafua a’o alu i le galuega na toe vili atu ai, ae talanoa ata mai ua malolo lava latou ona o lea fa’ato’a o mai le vao. Na umi na talanoa ma lona tama, ma sa fai lava la’ua tala malie, ua mama ai fo’i ia ma’ua se mea e toe ono tupu mai.

 

Peita’i, ina ua oo i le aso Lua, sa toe vili e le tina ia Shallen e toe siaki ma fautua i ai e alu e va’ai le foma’i, ae ua leai se tali mai o lana telefoni. Na toe vili fa’alua, tali mai le leo teine ma toe tuu i lalo le telefoni. Fiu lava e toe vili atu, ae leai ua le talia.

 

Na faigaluega matua, ae le’i toe maua mai se tala, peita’i, e manava mai, sa i ai le telefoni na talia i le fale, ae leaga e le o i ai i la’ua uma o matua. O le aso lava lea na toe vili mai ai i le afiafi, ma fa’ailoa mai le tala fa’anoanoa, ua maliu Shaleen.

 

“Ua matua leai lava se isi fa’amatalaga ua toe fai maia, se’iloga e o’o mai le ali’i o le Malo o lo’o malaga fa’apitoa mai e talanoa ma i ma’ua matua, ae o le a le fa’ailoa mai lava se isi tala e talaatu o lena fa’ai’uga a le USArmy,” o le tala lea a le tina.

 

“Ua ma’ua toe mafaufau i tua, ma iloa ai, ua mae’a ona fa’ailoa mai e Shaleen ia i ma’ua o lo’o ma’i, ae talofa ua le oo i le taimi na faia ai le matou fa’ai’uga, ina ia fai ni ona livi ae sau se’i fofo lona moa se’i manuia ona toe alu atu ai lea.”

 

“O se teine e loto aiga tele Shaleen, ua manatu lava o ia, o se ala lea e vave ona fesoasoani ai mo i matou uma. Fa’afetai i le Atua mo Ia, sa maua le mafutaga ma ia ma ua iloa fo’i ona uiga matagofie, ma ona uiga fo’i e pei lava o tamaiti uma e fa’alogogata ma fai aso i nisi taimi. Ae to’aga lava ia i le a’oga ma ana ta’aloga. Ua misia nei o ia i le li’o o le matou aiga, ae le mafai ona galo o ia i o ma’a loto ma le tama, e le o faigofie lenei vaitaimi ia ma’ua.”

 

Na tu’uva’a ese atu Shaleen ma avea lana BCT i Fort Jackson, South Carolina, pasia fo’i lana AIT ona si’itia lea i Fort Meade, Maryland. O ia o le lona lua o le fanau e to’atolu a ona matua, Fetalaiga  ma Leasaoa’i Maiava. O le tama’ita’i matua o lo’o avea lana misiona mo lana ekalesia LDS ae o le ui’i o le tama, lea o lo ua sauni nei e fa’au’u mai le Samoana High ma ua filifili fo’i e amata lana tautua i le US Army pe afai e mae’a lana aoga.

 

“Peita’i, e le o toe mailoa pe suia nei se lagona o le atali’i ona o lenei mea e le’i mafaufauina, ua tupu mai,” o se tala lea a le tina loto fa’anoanoa.

 

O Fetalaiga ma Lesaoa’i e faigaluega uma i le Star Kist Samoa ma ua fa’ailoa mai, ua auau fa’atasi i latou ma le latou aufaigaluega uma i le la nofo fa’anoanoa ona o le amia o le tama’ita’i Fitafita Samoa, ma ua mae’a fo’i ona fa’atulaga o la’ua aso malolo mo le masina atoa, se’i mafuli ane mo le fa’alavelave ua loma nei.

 

Fa’amaise atu le Samoa News i le paia o aiga, ae maise matua loto fa’avauvau.